၁အရာမဒှ်နူတံပထမ။ အရာပိုဲညးမမိၚ်။ အရာမညာတ်နကဵုမတ်ဇကုဂှ် ရံၚ်မွဲဗိုန်ဗိုန်တုဲ အရာမလာံသပေါတ်နကဵုတဲ ဇကုမတွံဂးအရာမဆေၚ်ကဵုဂလာန်မဂျိုၚ်လမျီုဂှ် ပိုဲညးဟီုထၜးကဵုမၞးတံရောၚ်။ ၂လမျီုတေံဂှ် နွံကောံကုမအံက်မ္ဂး ပြာကတ်တုဲ ပိုဲညးတံဝွံ ညာတ်တုဲရ။ လမျီုတေံဂှ် ဒှ်လမျီု ထာဝရမပြာကတ်ပ္ဍဲပိုဲညးတုဲရ။ သာ်ဝွံ ပိုဲညးဒုၚ်သက်သဳတုဲ ဟီုထၜးကဵုမၞးတံအိုတ်ရ။ ၃ပိုဲညးတံဝွံ ကဵုမအံက်ဂှ်လေကီု။ ကဵုကောန်မအံက်ယေသှုခရေတ်ဂှ်လေကီု။ ဒက်မိသဟာဲယဂှ်ဒှ်တုဲမၞးတံဝွံ ညံၚ်ဂွံဒက်မိဿဟာဲယကဵုပိုဲညးအရာ ပိုဲညးမမိၚ်ညာတ်ဂှ်ဟီု ဟီုထၜးကဵုမၞးတံအိုတ်ရ။ ၄တၞဟ်နသၟိက်ကဵုအိုဟ်တၟိုဟ်မၞးတံဍိုက်ပေၚ်တုဲ အရာဝွံ တံဂှ် ပိုဲညးချူဏာကဵုမၞးတံရောၚ်။
၅ဒတိတ်ဒဒှ် ပိုဲညးမမိၚ်ပ္ဍဲထာန်တဳလပိုန်တုဲဂှ် ဟီုပၟိၚ်ကဵုမၞးတံမ္ဂးဂှ်။ ကျာ်ဂမျိုၚ်ဝွံ မဒှ်လယးရောၚ်။ ပ္ဍဲကျာ်ဂမျိုၚ်ဂှ် ဒမၠုဟွံမွဲသက်သက်။ ၆ပိုဲညးတံဝွံ ဒက်မိသဟာဲယကဵုကျာ်ဂမျိုၚ်တုဲရ သာ်ဝွံ ဟီုတုဲ လန်ဂၚေၚ်ပ္ဍဲဒမၠုမ္ဂး ဒှ်မဟီုဂလာန်မုသာရ။ အတိုၚ်သစ္စဂှ် ဟွံပ။ ၇ညံၚ်နဲကျာ်ဂမျိုၚ်မနွံပ္ဍဲလယးဂှ် ပိုဲညးတံဝွံ လန်ဂၚေၚ်ပ္ဍဲလယးမ္ဂး ဇကုကဵုဇကုဂှ် ဒက်မိသဟာဲယတုဲ ဆီကောန်ကျာ်ယေသှုခရေတ်ဝွံ နူကဵုဒုဟ်အိုတ်သီုတံဂှ် ကြာတ်ကြဴပိုညးသ္အးဇ္ၚးရောၚ်။ ၈ပိုဲညးတံဝွံ ဒုဟ်ဟွံမွဲ သာ်ဝွံ ဟီုမ္ဂး ဇကုဇကုဂှ် ဇကုလှေံစတုဲ ပ္ဍဲပိုဲညးဂှ် သစ္စဟွံမွဲ။ ၉ဒုဟ်ဇကုဂှ် ဟီုထၜးဒုၚ်ဂုန်မ္ဂး ဗလးဒုဟ်ပိုဲညးတုဲ တၞဟ်နသၟိက်ကဵုသ္အးဇ္ၚးနူဒုစရိုတ်အိုတ်သီုတံဂှ် တဳလပိုန်ဝွံ နကဵုသစ္စဂှ်လေကီု။ နကဵုဒဒှ်မသ္တပ်လ္ဂူဂှ်လေကီု။ ဍိုက်ပေၚ်တဴရ။ ၁၀ပိုဲညးတံဝွံဟွံလေပ်ပဒုစရိုတ် သာ်ဝွံ ဟီုမ္ဂး။ ပ္ဍဲကျာ်ဂမျိုၚ်ဂှ် နၚ်ဒုဟ်ဂလာန်မုသာရောၚ်။ ဂလာန်တဳလပိုန်ဂှ်လေ ဟွံမွဲပ္ဍဲပိုဲညး။