၁သၟီဇၞော်ဍာဝိဒ်ဝွံ အယုက်ဇၞော်တုဲကာလမဗျု၊ လတက်ယာတ်တုဲ ဂီုဟွံမာန်။ ၂ဒှ်သာ်ဂှ်တုဲ၊ ဍိက်တံဂှ် ဝုတ်ကညာသၟတ်ဂှ် ကဵုဂွံဂၠာဲသွက်သၟီဇၞော်ညိ။ ညးဝွံ ခစသၟီဇၞော်တုဲ ကဵုထၜသ္ဘာ်ညိ။ ညံၚ်ဂွံကဵုမဟာသၟီဂီုဂှ် ကဵုတိက်ပ္ဍဲဂၠးသြိုဟ်ညိ သာ်ဝွံ ပ္တီအိုတ်ရ။ ၃ညံၚ်နဲသာ်ဂှ် ဝုတ်ဗြဴရုပ်သာ်မဂေါဝ်ဂှ် ဂၠာဲအလုံမွဲရးဣသရေလတုဲ၊ ဆဵုအၜိသှက်ညးဍုၚ်သှုနေမ်ဂှ်မ္ဂး ပလံၚ်နၚ်ပ္ဍဲထာန်ဨကရာတ်အိုတ်ရ။ ၄ဗြဴတေံဂှ် ရုပ်သာ်ဂေါဝ်ဆာဲဗွဲမလောန်ရ။ ကၠောန်ဗစဝဳပရာဨကရာတ်ဂှ်ရ။ ၜိုန်ဂှ်လေ ဨကရာတ်ဟွံသီကေတ်။
၅ကြဴဂှ်၊ အဍောဝ်နိယကောန်ဟဂ္ဂိတ်ဝွံ ပဨကရာတ်ရောၚ် သာ်ဝွံ နွံကသပ်တုဲ၊ ဇကုဂှ် ဇကုထၜပ္တိုန်တုဲ ကွဳဂမၠိုၚ်ကဵုချေံဂမၠိုၚ်ဂှ်လေကီု၊ မၞိဟ်မဒးဒြေပ်အာပ္ဍဲဂတဇကုမသုန်စှ်ောတံဂှ်လေကီုပြုပြေၚ်ရ။ ၆မအံက်ဂှ်လေ၊ မၞးဝွံ မူဟိုတ်ပသာ်ဂှ်ရော သာ်ဝွံ၊ ညံၚ်စိုတ်ညးဂွံဂိဂှ် ဆမွဲဝါဟွံကေၚ်ဟီု။ တေံညးဝွံ ရုပ်သာ်လေ ဂေါဝ်ဆာဲ ဗွဲမလောန်ရ။ ဒှ်ဒေံအၜသှလောမ်ရ။ ၇ညးဝွံ တိုၚ်ဗၚ်ကဵုယောဲၜကောန်ဇေရုယာ၊ ယတ်ပရောဟိတ်အဗျာထာတုဲ၊ ညးတံဝွံ မံၚ်ပ္ဍဲလ္ပာ်အဍောဝ်နိယအိုတ်ရ။ ၈ယတ်ပရောဟိတ်ဇာဍောက်၊ ၜေနာယကောန်ယဝ်ယဍ၊ ပရဝ်ဖေတ်နာထာန်၊ မပတံကဵုသှိမိရေဣတုဲ၊ အမာတ်ဒဴဗညာ ဍာဝိဒ်ဂမၠိုၚ်မ္ဂးဂှ် ဟွံလုပ်ပ္ဍဲလ္ပာ်အဍောဝ်နိယအိုတ်။ ၉အဍောဝ်နိယဝွံ ပ္ဍဲဇရေၚ်တၟံဇဝ်ဟေလေတ်တွိုၚ်ဍုၚ်ရောကလမပ္တံကဵုသဵုဂၠဴတုဲ သတ်မကြိုအ်ကၠေၚ်တံဂှ် ဂစိုတ်တုဲမ္ဂး၊ ကော်ပၟိၚ်ကောန်ဨကရာတ်ဒေံဇကုဂမၠိုၚ် ကဵုဍိက်ဨကရာတ်မၞိဟ်ယုဍအိုတ်သီုတံဂှ်ရ။ ၁၀ပရဝ်ဖေတ်နာထာန် ၜေနာယ၊ မပ္တံကဵုအမာတ်ဇၞော်ဒဴဗညာဇၞော်ဒေံသှဝ်လမောန်မ္ဂးဂှ် ဟွံကော်ပၟိၚ်။
၁၁ကာလဂှ် နာထာန်ဝွံ အာပ္ဍဲထာန်ၜါထသှေၜမိသှဝ်လမောန်တုဲ။ အဍောဝ်နိယကောန်ဟဂ္ဂိတ်ဝွံ ဒဒှ်မပဨကရာတ်ဂှ် မိၚ်တုဲရဟာ။ တလ ပိုဲဍာဝိဒ်ဝွံ ဟွံတီရသွံ။ ၁၂လၟုဟ်မ္ဂးဂှ် လမျီုမၞးကဵုလမျီုသှဝ်လမောန်ညံၚ်ဂွံလလံသွာဂှ်၊ ကဵုအဲဍိက်ဂွံကဵုကသပ်ညိ။ ၁၃လုပ်ပ္ဍဲထာန်သၟီဇၞော်ဍာဝိဒ်တုဲ၊ အဵုမသှာတ်သၟီဇၞော်၊ တဳလဂုန်ဂှ် ကောန်တလအဲသှဝ်လမောန်ဝွံ အုပ်လဒံ ပ္ဍဲဒၟံၚ်အဲတုဲ၊ ဒးဂဇံနန်ရောၚ် သာ်ဝွံ၊ ဟီုဒုၚ်သွဴကဵုအဲဍိက်ဗြဴတုဲရဟွံသေၚ်ဟာ။ ဒှ်သာ်ဂှ်မ္ဂး၊ အဍောဝ်နိယဝွံ ပသာ်မဂွံအုပ်လဒံညိရော သာ်ဝွံ ဟီုပ္တီညိ။ ၁၄ကာလမဟီုပ္တီ ပ္ဍဲထာန်ဨကရာတ်သာ်ဂှ်၊ အဲဍိက်လုပ်တုဲ ထံက်မဂလာန်မၞးရောၚ် သာ်ဝွံ အတိုၚ်မကဵုကသပ်ဂှ်။ ၁၅ၜါထသှေၜဝွံ လုပ်အာပ္ဍဲဂဒံဒၞာဲဨကရာတ်မနွံရ။ ဨကရာတ်ဝွံ ဗျုဗွဲမလောန်တုဲ၊ ညးဍုၚ်သှုနေမ် အၜိသှက်ဝွံ ကၠောန်ဗ္စဒၟံၚ်ရ။ ၁၆ၜါထသှေၜဝွံ ဖျေဟ်က္ဍိုပ်တုဲ၊ ရေဟ်သေဟ်ဨကရာတ်မ္ဂး၊ ဨကရာတ်ဝွံ၊ မူပၟိက်မနွံရော သာ်ဝွံ သၟာန်တဴရ။ ၁၇ၜါထသှေၜဂှ်လေ၊ နာဲအဲဍိက်၊ တဳလဂုန်ဂှ်၊ ကောန်မၞးသှဝ်လမောန်ဝွံ အုပ်လဒံဒၞာဲအဲတုဲ ဒးဂဇံနန်ရောၚ် သာ်ဝွံ၊ ဒုၚ်လယိုၚ်ကဵုကျာ်ထာဝရ ကျာ်ဂမျိုၚ်တဳလဂုန်တုဲ၊ ဟီုဒုၚ်သွဴကဵုအဲဍိက်ဗြဴတုဲရ။ ၁၈လၟုဟ်မ္ဂးဂှ် အဍောဝ်နိယအုပ်လဒံဒၟံၚ်ရ။ တဳလဂုန်သၟီဇၞော်လေ ဟွံတီ။ ၁၉အဍောဝ်နိယဝွံ မပ္တံကဵုသဵုဂၠဴတုဲ သတ်မကြိုအ်ကၠေၚ်တံဂှ် ဂစိုတ်တုဲမ္ဂး၊ သီုကဵုကောန်သၟီဇၞော်အိုတ်သီုမွဲစွံကော်ပၟိၚ် ယတ်ပရောဟိတ်အဗျာထာ၊ ဂအုပ်ပၞာန်ယောဲၜတံဂှ်ရ။ ဍိက်တဳလဂုန် သှဝ်လမောန်မ္ဂးဂှ် ဟွံကော်ပၟိၚ်။ ၂၀အဵုမသှာတ်သၟီဇၞော်၊ ပ္ဍဲဒၞာဲသၟီဇၞော်အဲဍိက်ဗြဴအုပ်လဒံတုဲ၊ မူရဴညးမွဲမဒးဂဇံနန်ဂှ် ဟီုပၟိၚ်ရောၚ် သာ်ဝွံ ကောန်ဂကူဣသရေလ အိုတ်သီုတံဝွံ လၟဳရံၚ်ဒၟံၚ်တဳလဂုန်အိုတ်ရ။ ၂၁သာ်ဂှ် ဟွံသေၚ်၊ မသှာတ်သၟီဇၞော် အဲဍိက်ဗြဴဝွံ ကာလမစိုပ်အနိစ္စကဵုဇုဇဗဴလမွဲစွံ၊ အဲဍိက်ဗြဴကဵုကောန်သှဝ်လမောန်ဝွံ ဒှ်ညးမဒးဒုၚ်ရာဇာဒန်ရောၚ် သာ်ဝွံ ပ္တီရ။ ၂၂ကာလပ္တီ ပ္ဍဲထာန်ဨကရာတ်သာ်ဂှ်၊ ပရောဗက်နာထာန်ဝွံ လုပ်မ္ဂး ပရောဗက်နာထာန်ကၠုၚ်ရသာ်ဝွံပ္တီအိုတ်ရ။ ၂၃နာထာန်ဝွံလေ၊ ကာလမစိုပ် ပ္ဍဲဂတဨကရာတ် အောပ်မာဖျေံက္ဍိုပ်တုဲ၊ ၂၄အဵုမသှာတ်သၟီဇၞော်တဳလဂုန်၊ အဍောဝ်နိယ အုပ်လဒံဒၞာဲအဲတုဲ ဒးဂဇံနန်ရောၚ် သာ်ဝွံ ဟီုပၟိၚ်တုဲရဟာ။ ၂၅ညးဝွံ စှ်ေအာပ္ဍဲတ္ၚဲဏံတုဲ၊ သဵုဂၠဴမကြိုအ်ကၠေၚ်တံဂှ် ဂစိုတ်တုဲမ္ဂး၊ ကောန်သၟီဇၞော်အိုတ်သီုတံဂှ်လေကီု၊ ဒကိုပ်ပၞာန်ဂမၠိုၚ်ကဵုယတ်ပရောဟိတ် အဗျာထာဂှ်လေကီုကော်တုဲရ။ ညးတံဝွံ သုၚ်စဒၟံၚ်ပ္ဍဲဂတအဍောဝ်နိယတုဲ၊ သၟီဇၞော်အဍောဝ်နိယဝွံ ကဵုဂျိုၚ်လမျီုညိ သာ်ဝွံ လရိုအ်ကမြဴတုဲ လၟုဟ်နွံဒၟံၚ်အိုတ်ရ။ ၂၆အဲဍိက်၊ ဍိက်တဳလဂုန် ယတ်ပရောဟိတ် ဇာဍောက်၊ ၜေနာယကောန်ယဝ်ယဍ၊ ဍိက်တဳလဂုန် သှဝ်လမောန်တံမ္ဂးဂှ် ဟွံကော်ပၟိၚ်။ ၂၇ပ္ဍဲဒၞာဲမသှာတ်သၟီဇၞော် မူရဴညးမွဲမဒးဂဇံနန်ဂှ် ဟွံထၜးကဵုအဲဍိက်တုဲ။ ပွဝွံဂှ် မသှာတ်သၟီဇၞော်စဳရေၚ်တုဲရဟာ သာ်ဝွံ ပ္တီရ။
၂၈ကာလဂှ် သၟီဇၞော်ဍာဝိဒ်ဝွံ၊ ကော်နၚ်ၜါထသှေၜဂှ်ညိ သာ်ဝွံ အတိုၚ်အသံမနွံဂှ်၊ ၜါထသှေၜဝွံ ကၠုၚ်တုဲ ဒတဴဒၟံၚ်ပ္ဍဲဂတဨကရာတ်ရ။ ၂၉ဨကရာတ်ဂှ်လေ၊ လမျီုဝိညာန်အဲဂှ် နူအပ္ဍဲဒုက္ခအိုတ်သီုနာဲမဟံၚ်ပြာ်ကျာ်ထာဝရအတိုၚ်မဂျိုၚ်လမျီုဂှ်။ ၃၀ကောန်မၞးသှဝ်လမောန်ဝွံ အုပ်လဒံဒၞာဲအဲတုဲ၊ ဒးဂဇံနန်စဏးဇကုအဲရောၚ် သာ်ဝွံ ပသစ္စပ္ဍဲကျာ်ထာဝရကျာ်ဂမျိုၚ် ဂကူဣသရေလတုဲ၊ အတိုၚ်အဲဟီုဒုၚ်သွဴကဵုမၞးဂှ်၊ အဲပတ္ၚဲဏံရောၚ် သာ်ဝွံ၊ ဟီုဒုၚ်သွဴမွဲဝါပၠန်ရ။ ၃၁ၜါထသှေၜဝွံ ဖျေံက္ဍိုပ်အောပ်မာတုဲရေဟ်သေဟ်ကဵုဨကရာတ်မ္ဂး၊ မသှာတ်သၟီဇၞော်ဍာဝိဒ်ဝွံ လမျီုကဵုဂျိုၚ်ဒၟံၚ်လ္အိတ်တွိုဝ်ညိ သာ်ဝွံ ဟီုဂးရ။ ၃၂သၟီဇၞော်ဍာဝိဒ်ဂှ်လေ၊ ကော်နၚ် ယတ်ပရောဟိတ်ဇာဍောက်၊ ပရဝ်ဖေတ်နာထာန်၊ ၜေနာယကောန်ယဝ်ယဍတံဂှ်ရ သာ်ဝွံ အတိုၚ်ဟီုပၟိၚ်ဂှ်၊ ညးတံဝွံ လုပ်ကၠုၚ်ပ္ဍဲဂတဨကရာတ်အိုတ်ရ။ ၃၃ဨကရာတ်ဂှ်လေ၊ ဍိက်နာဲမၞးတံဂမၠိုၚ်ဂှ် ကော်တုဲ၊ ကောန်အဲသှဝ်လမောန်ဂှ် ကဵုဍိုက်ပ္ဍဲလတူချေံဠာအဲတုဲ၊ ပလံၚ်ဏာပ္ဍဲဍုၚ်ဂိဟောန်အိုတ်ရ။ ၃၄ယတ်ပရောဟိတ် ဇာဍောက် ကဵုပရဝ်ဖေတ် နာထာန်ပ္ဍဲဍုၚ်ဂှ် ကဵုဘိသေခတုဲ။ ထၜပ္တိုန်ပ္ဍဲဒၞာဲဨကရာတ် ဣသရေလတုဲမ္ဂး၊ ဗဂိုဟ်ခပဵုတုဲ သၟီဇၞော်သှဝ်လမောန်ကဵုဂျိုၚ်လမျီုညိ သာ်ဝွံ လရိုအ်ကမြဴအိုတ်ရ။ ၃၅ကြဴဂှ်၊ မၞးတံဗက်တုဲ၊ ကောန်အဲဝွံ ကၠုၚ်တုဲ ဒးဂဇံနန်ရောၚ်။ စဏးဇကုအဲဒးဒှ်ဨကရာတ်ရောၚ်။ တေံညးဂှ် အဲခါန်ကၞက်လဝ်ပ္ဍဲဒၞာဲသၟီဣသရေလဒၞာဲသၟီယုဍရ သာ်ဝွံ ဟီုပၟိၚ်ရ။ ၃၆ၜေနာယကောန်ယဝ်ယဍဂှ်လေ အာမေန်။ ကျာ်ထာဝရကျာ်ဂမျိုၚ်မသှာတ်သၟီဇၞော်မရေဟ်သေဟ်ဂှ်လေ၊ ကဵုနွံအသံသာ်ဂှ်ညိ။ ၃၇ကျာ်ထာဝရဝွံ ညံၚ်နဲ မနွံပ္ဍဲလ္ပာ်သှဝ်လမောန်ညိ။ လောန်နူရာဇာပၞၚ်မသှာတ်သၟီဇၞော်ဍာဝိဒ်ရာဇာပၞၚ်ကောန်ဝွံ ညံၚ်ဂွံဇၞော်ကဵုတြဳဇှ်ဗွဲမလောန်ဂှ်၊ ကဵုစဳရေၚ်ညိ သာ်ဝွံ ကလေၚ် ပ္တီကဵုဨကရာတ်ရ။ ၃၈ကာလဂှ် ယတ်ပရောဟိတ်ဇာဍောက်ပရဝ်ဖေတ်နာထာန်၊ ၜေနာယကောန်ယဝ်ယဍ၊ မၞိဟ်ခေရထိ၊ မၞိဟ်ပေလထိတံဝွံ တိတ်တုဲ၊ သှဝ်လမောန်ဂှ် ကဵုဍိုက်ပ္ဍဲလတူချေံဠာသၟီဇၞော်ဍာဝိဒ်တုဲ၊ ပလံၚ်ဏာပ္ဍဲဍုၚ်ဂိဟောန်အိုတ်ရ။ ၃၉ယတ်ပရောဟိတ်ဇာဍောက်ဝွံ ဗဳကၠေၚ်နူအပ္ဍဲတာဲဂှ် ကေတ်တုဲ ကဵုဘိသေခကဵုသှဝ်လမောန်တုဲမ္ဂး၊ ညးတံဝွံ ဗဂိုဟ်ခပဵုတုဲ၊ သၟီဇၞော်သှဝ်လမောန်ဝွံ လမျီုကဵုဂျိုၚ်တဴရောၚ် သာ်ဝွံ၊ မၞိဟ်အိုတ်သီုတံဝွံ လရိုအ်ကမြဴအိုတ်ရ။ ၄၀မၞိဟ်အိုတ်သီုတံဝွံ တက်ဗဂိုဟ်တုဲ၊ ဗက်လက်ကရဴမ္ဂး၊ ဒဵုကဵုတိဇၞော်မနွံဒကးအာဂှ် ရမျှာၚ်မမိပ်ဇြိပ်ဂှ် ပအိုတ်ရ။
၄၁အဍောဝ်နိယကဵုဆောဖွက်ညးတံဝွံ ကာလပေါဲမသုၚ်စတုဲ ဒှ်ဂှ်၊ မိၚ်ရမျှာၚ်ဂှ် အိုတ်ရ။ ရမျှာၚ်ဗဂိုဟ်ခပဵုဂှ် ယောဲၜမိၚ်မ္ဂး၊ အလုံမွဲဍုၚ်ရမျှာၚ်ရုရုသံၚ်သံၚ်မ္ဂးဂှ်၊ ပသာ်ရော သာ်ဝွံ ကာလမသၟာန်ဒၟံၚ်ဂှ်၊ ၄၂ယဝ်နထာန်ကောန်ယတ်ပရောဟိတ်အဗျာထာဝွံ ကၠုၚ်မ္ဂး၊ အဍောဝ်နိယဂှ် လုပ်ညိ၊ မၞးဝွံ ဒှ်မၞိဟ်ခိုဟ်တုဲ၊ ပရိုၚ်မခိုဟ်ဂှ် ဟီုလဴစရောၚ် သာ်ဝွံ ဟီုမ္ဂး၊ ၄၃ယဝ်နထာန်ဂှ်၊ ဒှ်ကွေံသ္ဍာံသၟတ်နာဲပိုဲညးတံသၟီဇၞော် ဍာဝိဒ်ဝွံ ခါန်ကၞက်လဝ် သှဝ်လမောန် ပ္ဍဲဒၞာဲဨကရာတ်တုဲရ။ ၄၄ဨကရာတ်ဝွံလေ ယတ်ပရောဟိတ်ဇာဍောက်၊ ပရဝ်ဖေတ်နာထာန်၊ ၜေနာယကောန်ယဝ်ယဍ၊ မၞိဟ်ခေရထိ၊ မၞိဟ်ပေလထိတံဂှ် ဗလးနၚ်ကဵုသှဝ်လမောန်မွဲစွံတုဲ၊ ကဵုဍိုက်ပ္ဍဲလတူချေံဠာတုဲရ။ ၄၅ယတ်ပရောဟိတ် ဇာဍောက်ကဵုပရဝ်ဖေတ်နာထာန်တံဝွံ သှဝ်လမောန်ဂှ် ပ္ဍဲဍုၚ်ဂိဟောန်ကဵုရာဇာဘိသေခတုဲရ။ နူဍုၚ်ဂှ် သီုမအိုဟ်တမိုဟ်ဂှ် ကၠုၚ်ပၠန်တုဲ၊ အလုံမွဲဍုၚ်ရမျှာၚ်ရုရုသံၚ်သံၚ်ဂှ် တဳလဂုန်ဂွံမိၚ်ရ။ ၄၆သှဝ်လမောန်ဝွံလေ၊ ဂဇံပ္ဍဲလတူရာဇာပၞၚ်ရ။ ၄၇ဍိက်ဨကရာတ်တံဂှ်လေ၊ ညံၚ်ဂွံကဵုပသေက်ပသဝ်နာဲသၟီဇၞော်ပိုဲဍာဝိဒ်ဂှ် အာတုဲ၊ ကျာ်ဂမျိုၚ်ဝွံ နာမသှဝ်လမောန်ဂှ်၊ လောန်နူနာမမအံက်ကဵုထၜပ္တိုန်ညိ။ ရာဇာပၞၚ်ညးဂှ် ညံၚ်ဂွံကဵုဇၞော် တြဳဇှ်လောန်နူရာဇာပၞၚ်မအံက်ဂှ်၊ ကဵုဂွံစဳရေၚ်ညိ သာ်ဝွံ ပ္တီမ္ဂး၊ ဨကရာတ်ဝွံ ဖျေံက္ဍိုပ်ပ္ဍဲလတူဒေန်တုဲ။ ၄၈အဲဝွံ ညံၚ်ဂွံညာတ်ကဵုမတ်ဇကုဂှ် ညးမဂွံဂဇံပ္ဍဲလတူနန်အဲဂှ် မဇိုန်ကဵုပ္ဍဲတ္ၚဲဏံကျာ်ထာဝရ ကျာ်ဂမျိုၚ်ဂကူဣသရေလဝွံ ကဵုနွံမၚ်္ဂလညိ သာ်ဝွံ၊ ဒဒှ်မဟီုပၟိၚ်ဂှ် ကလေၚ်ဟီုပ္တီကဵုအဍောဝ်နိယရ။ ၄၉ကာလဂှ် ညးမပံၚ်ဖက်ကဵုအဍောဝ်နိယ၊ အိုတ်သီုတံဝွံ ဖေက်ဒၟံက်မ္ဂး၊ က္တဵုတုဲ ညးမွဲတၞဟ်တၞဟ် အာအိုတ်ရ။ ၅၀အဍောဝ်နိယဝွံလေ ဖေက်ဒၟံက် သှဝ်လမောန်မ္ဂး က္တဵုအာတုဲ၊ ဒြၚ်ပၞၚ်ယတ်တံဂှ် ရပ်ဒၟံၚ်ရ။ ၅၁အဍောဝ်နိယဝွံ ဖေက်ဒၟံက်သၟီဇၞော်သှဝ်လမောန်တုဲ၊ ဒြၚ်ပၞၚ်ယတ်တံဂှ် ရပ်တုဲ၊ သၟီဇၞော်သှဝ်လမောန်ညံၚ်ဟွံဂွံဂစိုတ်အဲဍိက်ဂှ်၊ ပ္ဍဲတ္ၚဲမကဵုဟီုဒုၚ်သွဴညိ သာ်ဝွံ ဒဒှ်မဟီုဂှ်၊ ဟီုပ္တီပ္ဍဲသှဝ်လမောန်မ္ဂး၊ ၅၂သှဝ်လမောန်ဂှ်၊ ညးဝွံ ဒှ်မၞိဟ်ခိုဟ်မ္ဂး၊ ဆသော်က္ဍိုပ်မွဲတၞုၚ်ဟွံဒးဒတုံပ္ဍဲတိ၊ ဒုဟ်နွံမ္ဂး ဒးဒုၚ်ဂစိုတ်ရောၚ်။ သာ်ဝွံ အသံနွံတုဲ။ ၅၃ဗလးဏာမၞိဟ်မ္ဂး၊ အဍောဝ်နိယဂှ် အတိုၚ်မကော်နၚ်နူပၞၚ်ယတ်ဂှ်၊ ညးဝွံ ကၠုၚ်တုဲ ဖျေံက္ဍိုပ်ပ္ဍဲဂတသၟီဇၞော်သှဝ်လမောန်ရ။ သှဝ်လမောန်ဂှ်လေ၊ အာပ္ဍဲသ္ၚိမၞးရ သာ်ဝွံ ဟီုပၟိၚ်ရ။