၁-၂ပ္ဍဲကဵုမၞိဟ်မပြးချာဲဒၟံၚ်ပ္ဍဲရးပါန္တု။ ရးဂလာတိ။ ရးကာပ္ပာဍဝ်ကိ။ ရးအာသိ။ ရးၜိသုနိတံဂှ်။ တၞဟ်နသၟိက်ကဵု ကလၚ်ဂှ်လေကီု။ တၞဟ်နသၟိက်ကဵုဗရဲနကဵုဆီယေသှုခရေတ်ဂှ်လေကီု။ ပ္ဍဲမၞိဟ်မဒုၚ်ရုဲစှ်နကဵုဝိညာန်မသ္အးဇ္ၚးအတိုၚ်ညာန်အနာဂတ်မအံက်ဂှ် ကလုတ်ယေသှုခရေတ်အဲပေတရုဝွံ ပၟိၚ်ဏာမ္ဂးဂှ်။ ဂုန်ကဵုဒဒှ်မၜိုဟ်သြိုဟ်ဂှ် ကဵုတောတက်ပ္ဍဲမၞးတံအိုတ်ညိ။
၃-၄ပ္ဍဲကျာ်ဂမျိုၚ်မအံက် နာဲပိုဲယေသှုခရေတ်ဂှ် ကဵုနွံမၚ်္ဂလညိ။ တေံမအံက်ဝွံ နကဵုမကဵုယေသှုခရေတ်ဂျိုၚ်တိုန်နူဂစိုတ်အတိုၚ်ကရုတ်ဏာဇကုမဇၞော်ပ္ဍဲဒဒှ်မရံၚ်လၟဳမဂျိုၚ်လမျီုမဆေၚ်ကဵုအာဲကၟာဲမဗၠးသၠး နူကဵုဒဒှ်မလီုလာ်ပၠန်ဂတးကၠေက်လ္ၚေၚ်။ ဇြသြေၚ်ဂှ် ကဵုပိုဲညးသၠးဂဗ္ဘမွဲဝါပၠန်တုဲရ။ ၅တေံအာဲကၟာဲဂှ် သွက်ပိုဲညးမၞိဟ်ဣဓိကျာ်မမၚ်လဝ် နကဵုဒဒှ်မပ္တေဟ်ဒဵုကဵုစိုပ်ဒဒှ်မဟံၚ်ပြာ်မပြုပြေၚ်လဝ်ညံၚ်ဂွံ ပြာကတ်ပ္ဍဲကာလကြဴအိုတ်ဂှ် ဒေပ်လဝ်ပ္ဍဲဘုံအကာသရ။
၆-၇ဒဒှ်မစံၜတ်စိုတ်ပ္တေဟ်မၞးတံမပြဲလောန်နူဒဒှ်မစံၜတ်ထဝ်မလေပ်လီုဂှ် ဒုၚ်စံၜတ်နကဵုပၟတ်တုဲ ပ္ဍဲကာလယေသှုခရေတ်မပြာကတ်ညံၚ်ဂွံ ဒှ်ဒဒှ်မထိုၚ်သးကဵုတြဳဇှ်အနူဘဴဂှ် လမုဟ်ဝွံ အပ္ဍဲမွဲချိုန်ခနှဂှ် ဟိုတ်မၞးတံမဒးဒုၚ်ကၞုက်ကၞာဲတၟေၚ်တၟေၚ်တၟဟ်တၟဟ်တံဂှ် လီုစိုတ်ၜိုန်ဒှ်ကီု ရန်ကဵုဒဒှ်မဟံၚ်ပြာ်ဂှ်တုဲအိုဟ်တၟိုဟ်အိုတ်။ ၈နာဲတေံဂှ် မၞးတံဟွံကေၚ်ညာတ်ၜိုန်ဒှ်ကီုဆာန်အိုတ်ရ။ လမုဟ်ဂှ်လေ ၜိုန်ဟွံညာတ်ဂှ် နကဵုစိုတ် ပ္တေဟ်မဆေၚ်စပ်ကဵုစရာဲတြဳဇှ် နကဵုစိုတ်သလောၚ်ခပဝ်။ ဟီုအိုတ်ဟွံမာန်မိပ်စိုတ်အိုဟ်တၟိုဟ်ဂှ် ဒှ်အိုတ်တုဲ။ ၉ဖဵုစိုတ်ပ္တေဟ်မတွံဂးဒဒှ်မဟံၚ်ပြာ်စိုတ်ဝိညာန်ဂှ် ဂွံဒုၚ်အိုတ်ရ။
၁၀တေံဒတိတ်ဒဒှ်မဟံၚ်ပြာ်ဂှ် ပရောဗက်တံဝွံ ဂၠိုက်ဂၠာဲသၟာန်သၟုက်စၟဳစၟတ်ဗိုန်ဗိုန်တုဲ ဒတိတ်ဒဒှ်ဂုန်မၞးတံမဂွံဒုၚ်ဂှ် ဟီုတွံအိုတ်တုဲရ။ ၁၁ဒဒိုက်ခရေတ်မဒးဒုၚ်ဂှ်လေကီု။ ဒုၚ်ဒဒိုက်တုဲ တြဳဇှ်အနုဘဴမဒှ်ကြဴဂှ်လေကီု။ ဝိညာန်ခရေတ်မနွံ ပ္ဍဲညးတံဂှ် ကာလမဒုၚ်လဝ်သက်သဳမူရဴညးမွဲဂှ်လေကီု။ မူရဴပယာံ ကာလမွဲဂှ်လေကီု။ သၟိက်ဂွံဟီုဂးဂှ်။ သၟာန်သၟုက်ဂၠိုက်ဂၠာဲအိုတ်ရ။ ၁၂ဒမံၚ်ဇကုတံမဟီုတွံ ဥပ္ပကာတံဂှ် သွက် ဇကုဟွံသေၚ်။ ဒှ်သွက်မၞးတံရောၚ် သာ်ဝွံ လ္ပံက်ထၜးပ္ဍဲကဵုညးတံဂှ်ရ။ ဝိညာန်မသ္အးဇ္ၚးမစကာနၚ်နူဘုံအကာသဂှ် ဗၠးကၠုၚ်တုဲ ပ္ဍဲမၞးတံဂှ် ညးမတွံဓဝ်ဨဝံၚ်ဂေလိတံဝွံ တေံအရာတံဂှ် ဟီုတွံပ္ဍဲမၞးတံလမုဟ်အိုတ်ရ။ တေံအရာတံဂှ် ကလုတ်အကာသတံဝွံ မနွံ စိုတ်စေတဏာသၟိက် ဂွံရံၚ် မွဲဗ္စာရဏာဗိုန်ဗိုန်အိုတ်ရ။
၁၃ဒှ်သာ်ဂှ်မ္ဂး စိုတ်မၞးတံဝွံ စန်ခါယျဗန်တုဲ နွံကဵုသမ္မာသတိအိုတ်ရ။ ကာလယေသှုခရေတ်ပြာကတ်တုဲ လာပ်ဂုန်ကျာ်မစိုပ်ပ္ဍဲမၞးတံ ဒဵုကဵုစိုပ်ကၞောတ်ဂှ် ရံၚ်လၟဳအိုတ်ရ။ ၁၄-၁၅နူကၠာတေံဂှ် မၞးတံဝွံ အပ္ဍဲမနွံကဵုစိုတ်ဒမၠုဂှ် အတိုၚ်မလေပ်မက်မတ်လမုဟ်ဝွံ ဟွံဒ္ဂေတ်ဒှ်ညံၚ်ကဵုသၟတ်မလေပ်ကလၚ်ဂှ်ဒှ်တုဲ ညးမကော်မၞးတံညံၚ်နဲ မသ္အးဇ္ၚးဆပွမၞးတံ မပဂှ် ကဵုဒှ်သ္အးဇ္ၚးအိုတ်ရ။ ၁၆ဟိုတ်မ္ဂးဂှ်။ အဲဝွံ ဟိုတ်မသ္အးဇ္ၚးတုဲ မၞးတံဂှ်လေ ကဵုနွံဒဒှ်မသ္အးဇ္ၚးအိုတ်ရ သာ်ဝွံ သၠပတ်မကၠုၚ်ရောၚ်။ ၁၇ဟွံလေပ်ရံၚ်မုက်မၞိဟ် မအံက်ကျာ်ဂမျိုၚ်မစဳရေၚ်အတိုၚ်ဒ္ဂေတ်ဇၟာပ်မၞိဟ်အိုတ်သီုဂှ် မၞးတံဝွံ ရာဒၞာမိက်မ္ဂး အလုံမွဲကာလမဒှ်တၟုဲနကဵုစိုတ်မဖေက်ဂွဂှ် ဒ္ဂေတ်ဒၟံၚ်အိုတ်ရ။ ၁၈နူဒဒှ်ဒ္ဂေတ်ပွဟွံမွဲကဵုဟိုတ်ဖဵုမၞးတံမဒုၚ်ကေတ်နူဇုဇဗဴလတံဂှ် မပ္တံနကဵုဒြပ်ရတ်ထဝ်သြန်မလေပ်ပၠန်ဂတးလီုလာ်ဂှ် တဳလပိုန်မကၠးပ္တိတ်မၞးတံဟွံသေၚ်။ ၁၉ဆဗၞတ်ဒုဟ်မွဲမွဲဟွံမွဲ ညံၚ်နဲ သဵုသၟတ်မဗၠးနူကဵုကၠိပပ်ကၠေက်လ္ၚေၚ် နကဵုဆီခရေတ်မပြဲဂှ် ကၠးပ္တိတ်မၞးတံရောၚ် သာ်ဝွံ သမ္တီအိုတ်ရ။ ၂၀တေံခရေတ်မ္ဂးဂှ် နူကၠာကဝ်ဟွံတန်ဟွံမွဲဏီဂှ် ကျာ်မကဵုဒၟံၚ်ပ္တိုန်လဝ်ဒၞာဲဂှ် ဒှ်တုဲ နကဵုတဳလပိုန်။ သွက်မၞးတံ မၞိဟ်မပ္တေဟ်ကျာ်ဂမျိုၚ်ပ္ဍဲကာလကြဴအိုတ်ဂှ် ပြာကတ်တုဲရ။ ၂၁မၞးတံဝွံ ရန်ကဵုကျာ်ဂမျိုၚ်တုဲ ဒဒှ်မပ္တေဟ်။ ဒဒှ်မလၟဳဗနုဟ်တၞဟ်နသၟိက် ကဵုနွံမ္ဂး။ နာဲတေံဂှ် ကျာ်ဂမျိုၚ်ကဵုဂျိုၚ်တိုန်နူဂစိုတ်တုဲ အပ္ဍဲတဳလပိုန်ဂှ် ဇိုန်ကဵုဂုန်တြဳဇှ်တုဲရ။
၂၂နကဵုမ။ မလေပ်လီုလာ်ပၠန်ဂတးဂှ် မကဵုမၞးတံသၠးဂဗ္ဘမွဲဝါပၠန်ဟွံသေၚ်။ နကဵုမ။ ၂၃ဟွံလေပ်လီုလာ်မတွံဂးနကဵုဂလာန်ကျာ်မဂျိုၚ်ဒၟံၚ်လမျီုလ္အိတ်တွဵုဂှ် မကဵုသၠးဂဗ္ဘမွဲဝါ ပၠန်ဂှ်ဒှ်တုဲ နကဵုဝိညာန်ပ္ဍဲမကလၚ်ဓဝ်သမ္မာဂှ် ကဵုစိုတ်ဝိညာန်ဇကုသ္အးဇ္ၚးတုဲ ပ္ဍဲဒဒှ်မဆာန်ကောဒေံသ္ဍာံသၟတ် နကဵု ကောန်စိုတ်မသ္ဇုၚ်ဂွုဇကုကဵုဇကုဂှ် ဆာန် ဗိုန်ဗိုန်အိုတ်ရ။ ၂၄ဂကူမၞိဟ်ဝွံဂှ် ဒှ်ညံၚ်နဲတၞံချောဲရ။ ဆတြဳဇှ်မၞိဟ်မနွံဂှ်လေ ဒှ်ညံၚ်နဲကဴချောဲရ။ တၞံချောဲဂှ် မလေပ်ဇြသြေၚ်တဴရ။ ကဴဂှ်လေ မလေပ်ပြဟ်တဴရ။ ၂၅တွဟ်ပါၚ်ကျာ်ထာဝရမ္ဂးဂှ်။ တန်ဒၟံၚ်လ္အိတ်တွဵုရ။ တေံတွဟ်ပါၚ်ဂှ် ဒှ်ဓဝ်ဨဝံၚ်ဂေလိမဟီုတွံပ္ဍဲမၞးတံရောၚ်။