၁ကောန်ဍုၚ်ဨဖရေတ်ဇုဖ၊ တောဝ်ဟူ၊ ဨလိဟူ၊ ဆက်ဆေန်ကၠုၚ်နူ၊ ယေရဝ်ဟာမ်တုဲ၊ မံၚ်ပ္ဍဲဍုၚ်ရာမထိမ်ဇုဖိမ်ပ္ဍဲလတူဒဵုဨဖရိမ်၊ ယၟု ဨလကာနမနွံညးမွဲရ။ ၂တေံညးဝွံ နွံဗြဴၜါရ။ ညးမွဲမ္ဂးဂှ်၊ ဟန္န၊ ညးမွဲမ္ဂးဂှ် ပေနိန္နမနွံယၟုရ။ ပ္ဍဲပေနိန္နဂှ် ကောန်နွံဒၟံၚ်ရ။ ပ္ဍဲဟန္နဂှ် ကောန်ဟွံမွဲ။ ၃ဨလကာနဝွံ ရေဟ်သေဟ်ကျာ်ထာဝရတလဗဵုလဗးအကာသတုဲ တၞဟ်နသၟိက်ဂွံပူဇဴယတ်၊ နူဒၞာဲဍုၚ်ဇကုမလေပ်အာပ္ဍဲဍုၚ်ယှိလောဝ်ရိုဟ်ဒဒှ်သၞာံရ။ ယတ်ပရောဟိတ်ကျာ်ထာဝရကောန်ဨလိ၊ ဟဝ်ဖနိကဵုဖိနဟာတ်ဝွံ နွံပ္ဍဲဍုၚ်သှိလဝ်ရောၚ်။
၄ဨလကာနဝွံ ကာလမစိုပ်အခိၚ် ပူဇဴယတ်၊ ပ္ဍဲသမ္ဘာပေနိန္န ကဵုကောန်ညးအိုတ်သီုတံဂှ် ပရအ်ကဵုရ။ ၅ဟိုတ်မဆာန်ဟန္န၊ သွက်ၜါဆဂှ် ကဵုပ္ဍဲညးရ။ ၜိုန်ဂှ်လေ၊ ပ္ဍဲဟန္နကျာ်ထာဝရဝွံ၊ အခေါၚ်ဂွံသၠးကောန်ဂှ် ဟွံကဵု။ ၆ဟိုတ်နူကျာ်ထာဝရဟွံကဵုအခေါၚ်သာ်ဂှ်၊ ညံၚ်စိုတ်ဟန္နဂွံကၠိဂှ်၊ သတ်တြုဝွံ မလေပ်ကၞုက်ကၞာဲဗွဲမလောန်ရ။ ၇လ္အိတ်သၞာံဟွံသ္ဂုတ်ကာလမအာပ္ဍဲသ္ၚိကျာ်ထာဝရ၊ ဟိုတ်နူသတ်တြုကၞုက်ကၞာဲဂှ်၊ ဟန္နဝွံ စ၊ စဏဟွံမာန်၊ လေပ်လရိုအ်ဒၟံၚ်ရ။ ၈သမ္ဘာညးဨလကာနဝွံ၊ ဟန္နဝွံ မူဟိုတ်မလရိုအ်ရော။ မူဟိုတ်ဟွံစဒၟံၚ်တဴရော။ မူဟိုတ်စိုတ်ဇြသ္ကဟ်ရော။ လောန်နူကောန်စှ်ဂှ် အဲဝွံ ခိုဟ်ပ္ဍဲမၞးဟွံသေၚ်ဟာ သာ်ဝွံ ဟီုရ။ ၉စသုၚ်ပ္ဍဲဍုၚ်သှိလောဝ်အိုတ်တုဲ၊ ကာလယတ်ပရောဟိတ် ဨလိဂဇံဒၟံၚ်ပ္ဍဲဇရေၚ်ဒယိုၚ်သ္ၚိကျာ်ထာဝရ။ ၁၀ဟန္နဝွံ နကဵုစိုတ်ဇြသ္ကဟ်က္တဵုတုဲ၊ ဍာ်ရမတ်ဒတုံစှ်ေဗွဲမဂၠိုၚ်မ္ဂး၊ ဒုၚ်ဂုန်ပ္ဍဲကျာ်ထာဝရမ္ဂးဂှ်၊ ၁၁အဵုနာဲညး၊ ကျာ်ထာဝရတလဗဵုလဗးအကာသ အဲဍိက်ဗြဴဂှ် တဳလဂုန်ဟွံဝိုတ်တုဲ၊ ဒဒိုက်ဒုက္ခအဲဍိက်ဗြဴဂှ် တဳလဂုန်ရံၚ်မွဲဗှ်သၞာတုဲ၊ ကောန်တြုံဂှ် ဆာန်ဍူကဵုကုအဲဍိက်ဗြဴမ္ဂး၊ ဒဒှ်မကးသော်က္ဍိုပ်ညးဂှ် ဟွံပလးလး။ လ္အိတ်အယုက်ညံၚ်ဂွံဒှ်ဍိက်ကျာ်ထာဝရဂှ် အဲဍိက်ဗြဴပအပ်ကဵုရောၚ် သာ်ဝွံ ပဂတိသစ္စတဴရ။ ၁၂ဟန္နဝွံ ကာလဗွဲမလံဒုၚ်ဂုန်ပ္ဍဲဂတကျာ်ထာဝရတုဲမ္ဂး၊ ဨလိဝွံ ရံၚ်သမ္တီပါၚ်ညးဂှ်ရ။ ၁၃ဒုၚ်ဂုန်သီုကဵုကောန်စိုတ်တုဲ၊ ၜိုန်ပါၚ်မချဳဂှ်လေ၊ ဟိုတ်ရ၊ ရမျှာၚ်ဂလာန်ဟွံတိတ်ဂှ် ဗ္ၜူအရက်ရောၚ် သာ်ဝွံ ဨလိသၠေဟ်တုဲ၊ ၁၄မၞးဝွံ မွဲစိလလံကာလဗ္ၜူတုဲ မံၚ်ရော။ ဍာ်ဇဗျေတ်မၞးဂှ် ပါဲဝေၚ်ရ သာ်ဝွံ မဟီုရ။ ၁၅ဟန္နဂှ်လေ၊ ဟွံသေၚ်၊ တလဂုန်။ အဲဍိက်ဗြဴဒှ်စိုတ်မဇြသ္ကဟ်ရ။ ဍာ်ဇဗျေတ်ဂှ် ဟွံသုၚ်။ ဍာ်သိအရက်ဂှ် ဟွံသုၚ်၊ စဝ်စရိုဟ်ကောန်စိုတ်ပ္ဍဲဂတကျာ်ထာဝရတုဲ မံၚ်ရ။ ၁၆အဲဍိက်ဗြဴတဳလဂုန်ဂှ်၊ မၞိဟ်ဗြဴအဓမ္မရောၚ် သာ်ဂှ် လ္ပသမ္တီညိ။ အရာမကရောတ်ကသဝ်၊ အရာမအောန်စိုတ်ဗွဲမဂၠိုၚ်ဂှ်ဒှ်တုဲ၊ ဒဵုကဵုလၟုဟ်ပတီဒၟံၚ်ရ သာ်ဝွံ ကလေၚ်ဟီုမ္ဂး၊ ၁၇ဨလိဂှ်လေ၊ သီုမသ္ၚိတ်ဇြဂှ် အာရ။ အတိုၚ်မဒုၚ်ဂုန်လၟုဟ်ဂှ်၊ ကျာ်ဂမျိုၚ်ဂကူဣသရေလကဵုဂွံဇိုန်ကဵုညိ သာ်ဝွံ ကလေၚ်ဟီုရ၊ ၁၈ဟန္နဂှ်လေ၊ အဲဍိက်ဗြဴတဳလဂုန်ဝွံ ကဵုဂွံမုက်ပ္ဍဲဂတကျာ်ညိ သာ်ဝွံ အာတ်ပတီတုဲမ္ဂး၊ မုက်တၞဟ်အာတုဲ အာစ၊ စဏရ။ ၁၉တေံညးတံဝွံ က္တဵုနူဂယးပြဟ်တုဲ၊ ရေဟ်သေဟ်ပ္ဍဲဂတကျာ်ထာဝရတုဲမ္ဂး၊ ကလေၚ်အာသ္ၚိဇကုမနွံပ္ဍဲဍုၚ်ရာမအိုတ်ဂှ်ရ။ ပ္ဍဲကာလဂှ် ဨလကာနဝွံ ဆက်ဆံကဵုသမ္ဘာဇကုဟန္နတုဲ၊ ကျာ်ထာဝရဗှ်သၞာရ။ ၂၀ဟန္နဝွံ ကေတ်ပတိသန္ဓိတုဲ၊ ကာလမစိုပ်အခိၚ်၊ သၠးညာတ်ကောန်တြုံတုဲမ္ဂး၊ တေံကောန်ဂှ် ဟိုတ်မဒုၚ်ဂုန်ပ္ဍဲထာန်ကျာ်ထာဝရ၊ နကဵုယၟုသှမိုဲလဂှ် သၟုတ်တဴရ။ ၂၁ဨလကာနဝွံ သီုကဵုကောန်သ္ၚိအိုတ်သီုတံမွဲစွံ၊ ယတ်မဒးပရိုဟ်ဒဒှ်သၞာံဂှ်လေကီု၊ ဂတိသစ္စမဆေၚ်ကဵုပူဇဴသကာဂှ်လေကီု၊ ကာလမတိုန်အာညံၚ်ဂွံပူဇဴကျာ်ထာဝရဂှ်၊ ဟန္နဝွံ ဒပိုတ်တှ်တုဲမ္ဂး၊ ကေတ်ဏာကောန်သၟတ်ရောၚ်။ ၂၂ပ္ဍဲကာလဂှ် ညးဝွံ စိုပ်ပ္ဍဲဂတကျာ်ထာဝရတုဲ၊ ဒးမံၚ်လ္အိတ်ရောၚ် သာ်ဝွံ ဟီုမ္ဂး၊ ၂၃သမ္ဘာဨလကာနဝွံ၊ အတိုၚ်စိုတ်မၞးမနွံဂှ် ပရ။ ဒဵုကဵုဟွံဒပိုတ်တှ်ဏီဂှ် မံၚ်ရ။ အတိုၚ်ဂတိကျာ်မနွံဂှ် ကဵုတန်ညိ သာ်ဝွံ ဒုၚ်လယိုၚ်တုဲ၊ သမ္ဘာညးဂမဴတှ်တုဲ၊ ဒဵုကဵုဟွံဒပိုတ်တှ်ဂှ် ဟွံအာတုဲ မံၚ်တဴရ။ ၂၄ဒပိုတ်တှ်တုဲမ္ဂး၊ သီုကဵုဂၠဴမနွံအယုက်ပိသၞာံဂှ် မွဲ၊ ခၞိက်ကွာၚ်မွဲဨဖာ၊ ဍာ်ဇဗျေတ်မွဲဗဳမွဲစွံ၊ ပလံၚ်ဏာကောန်သၟတ်ဂှ်တုဲ၊ စိုပ်ပ္ဍဲသ္ၚိကျာ်ထာဝရပ္ဍဲဍုၚ်သှိလောဝ်ရ။ ပ္ဍဲကာလဂှ် ကောန်သၟတ်ဝွံ အယုက်ၜတ်ဏီရ။ ၂၅ဂၠဴဂှ် ဂစိုတ်တုဲ ကောန်သၟတ်ဂှ် ပၠုပ်ဏာပ္ဍဲထာန်ဨလိမ္ဂး၊ ဟန္နဝွံ၊ နာဲအဲဍိက်ဗြဴ။ ၂၆အတိုၚ်တဳလဂုန်မဂျိုၚ်လမျီု၊ အဲဍိက်ဗြဴဝွံ ကာလကၠာဂှ် ပ္ဍဲဒေသဝွံ ဒတဴပ္ဍဲဇရေၚ်တဳလဂုန်တုဲ ဒှ်ဗြဴမဒုၚ်ဂုန်ရ။ ၂၇ပ္ဍဲကာလဂှ် ညံၚ်ဂွံဂွံကောန်သၟတ်တေံဂှ် ဒုၚ်ဂုန်ရ။ အတိုၚ်မအာတ်၊ ကျာ်ထာဝရဇိုန်ကဵုကုအဲဍိက်ဗြဴတုဲရ။ ၂၈ဟိုတ်ဂှ်ရ၊ တေံညးဂှ် အဲဍိက်ဗြဴဂလေံကဵုပ္ဍဲကျာ်ထာဝရတုဲရ။ ညးဝွံ လုကဴမွဲအယုက်ဒးဒုၚ်ဂလေံပ္ဍဲထာန်ကျာ်ထာဝရတုဲ ဒးမံၚ်ရောၚ် နာဲ၊ သာ်ဝွံ ပ္တီတုဲမ္ဂး၊ ရေဟ်သေဟ်ကျာ်ထာဝရပ္ဍဲဒေသတေံဂှ် အိုတ်ရ။