၁အဲမၞိဟ်အယုက်မဇၞော်ပ္ဍဲကဵုနာဲဗြဴမရုဲကံက်ဂှ်လေကီု။ ပ္ဍဲကဵုကောန်ဗြဴတေံတံဂှ်လေကီု။ ပၟိၚ်ဏာရောၚ်။ ၂မၞးဂှ်လေကီု။ ကောန်မၞးတံဂှ်လေကီု။ အဲဆာန်သ္ဍာံသၟတ်ရောၚ်။ ဆအဲမွဲမဆာန်ဟွံသေၚ်။ ဆညးမတီဓဝ်သမ္မာအိုတ်သီုတံဂှ် နကဵုဓဝ်သမ္မာမတန်ပ္ဍဲပိုဲညးဂှ် ဆာန်မၞးတံအိုတ်ရ။ တေံဓဝ်သမ္မာဂှ် တန်ပ္ဍဲ ပိုဲညးလ္အိတ်တွဵုရောၚ်။ ၃ဂုန်ကရုတ်ဏာကဵုဒဒှ်မၜိုဟ်သြိုဟ်နူထာန်မအံက်ကျာ်ဂမျိုၚ်ဂှ်လေကီု။ နူထာန်ကောန်မအံက်မသ္ဍာံသၟတ် ယေသှုခရေတ်ဂှ်လေ ကီု။ ကဵုတန်ပ္ဍဲမၞးတံအိုတ်ညိ။ ၄အတိုၚ်ပိုဲညးဂွံဒုၚ်ကေတ်ဓဝ်ပညပ်ပ္ဍဲထာန်မအံက်ဂှ် ကောန်မၞးလ္ၚဵုတံဝွံ ဒဒှ်မလန်ဂၚေၚ်ဒၟံၚ်ပ္ဍဲဓဝ်သမ္မာဂှ် ဟိုတ်မဆဵုတုဲ အဲမိပ်စိုတ်အိုဟ်တၟိုဟ်ဗွဲမလောန်ရ။ ၅ပ္ဍဲလမုဟ်ဝွံ နာဲဗြဴ။ ညံၚ်နဲအဲမချူဏာပညပ်တမိပ္ဍဲမၞးဂှ် ဟွံသေၚ်။ အတိုၚ်ပညပ်ပိုဲ ညးမဒုၚ်ကေတ်နူတံ ပထမဂှ် ဇကုကဵုဇကုတံဂှ် ဒးဆာန်ရၚ်သ္ကံအိုတ်ရောၚ်။ ၆အရာမလန်ဂၚေၚ်အတိုၚ်ပညပ်တဳလပိုန်ဂှ် ဒှ်ဇြဟာန်မေတ္တာရောၚ်။ မၞးတံဝွံ ညံၚ်ဂွံလန်ဂၚေၚ်ပ္ဍဲပညပ်တဳလပိုန်။ အတိုၚ်မဂွံမိၚ်နူတံပထမဂှ် ပညပ်တဳလပိုန်ဝွံ သာ်ဂှ် မဂွံဒှ်ရ။
၇ယေသှုဝွံ က္ညကၠုၚ်နကဵု ဇကုကာယျတုဲရ သာ်ဝွံ ဟွံဒုၚ်လယိုၚ်။ မၞိဟ်မလှေံစဗွဲမဂၠိုၚ်တံဝွံ တိတ်အာပ္ဍဲလောကတုဲရ။ မၞိဟ်ညံၚ်နဲသာ်ဂှ် ဒှ်မၞိဟ်မလှေံစရ။ အာန္တိခရေတ်ဂှ်လေ မဂွံဒှ်ရောၚ်။ ၈ပိုဲညးတံဝွံ အရာဇကုမကၠောန်ဂှ် ဟွံဟံုမှာဟွံလီုလာ်တုဲ ညံၚ်ဂွံဒုၚ်စဒတုဲကၟဝ်မစိစုံ။ မၞးတံဝွံ ဇကုကဵုဇကုဂှ် ပသတိတုဲ မၚ်မွဲအိုတ်။ ၉ပ္ဍဲဒေသၞာခရေတ်ဂှ် ဟွံတန်ညးမလောန်အာတံဂှ် ဟွံတီကျာ်။ ညးမတန်ပ္ဍဲဒေသၞာခရေတ်တံဂှ် မအံက်ဂှ်လေကီု။ ကောန်ဂှ်လေကီု။ တီတုဲရ။ ၁၀တေံဒေသၞာသာ်ဂှ် ဟွံကေတ်နၚ်တုဲ ယြဴညးမွဲကၠုၚ် ပ္ဍဲထာန်မၞးတံမ္ဂး ပ္ဍဲသ္ၚိမၞးတံဂှ် လ္ပဒုၚ်တဲ။ ကဵုဒှ်မ္ၚဵုညိ သာ်ဝွံ ပ္ဍဲညးဂှ် လ္ပဆက်ပါၚ်အိုတ်။ ၁၁ဟိုတ်မ္ဂးဂှ်။ ပ္ဍဲမၞးဂှ် ကဵုဒှ်မ္ၚဵုညိ သာ်ဝွံ ဟီုမ္ဂး ကဵုပွမကၠိပပ်ယုက်မာမၞိဟ်ဂှ် စိုပ်ဒဒှ်မဆက်ဆံရောၚ်။ ၁၂ဒမံၚ်သွက်အဲဂွံချူဏာကဵုမၞးနွံဗွဲမဂၠိုၚ်ၜိုန်ဒှ်ကီု။ ပ္ဍဲလတူစက္ခောတၞဟ်နသၟိက်ချူကဵုမှၚ်ဂှ် ပၟိက်ဟွံမွဲ။ အဲကၠုၚ်ဇရေၚ်မၞးတံတုဲ ညံၚ် မိပ်စိုတ်အိုဟ်တၟိုဟ်ဂွံစိစုံဂှ် ဆက်ပါၚ်ကဵုမၞးတံတုဲ ဟီုအရေဝ်ရောၚ် သာ်ဂှ် လၟဳဒၟံၚ်ရ။ ၁၃ကောန်ဒေံဗြဴမၞးမပြဲတံဂှ် ဆက်ပါၚ်ကဵုမၞးအိုတ်ရ။ အာမေန်။