၁နကဵုပၟိက်ကျာ်ဂမျိုၚ်မဂွံဒှ်ကလုတ်နာဲပိုဲယေသှုခရေတ်အဲပဝ်လုကဵုဒေံအဲတိမဝ်သေ။ ၂ပ္ဍဲကဵုမၞိဟ်မသ္အးဇ္ၚးကောဒေံမပ္တေဟ်ခရေတ်ဆမနွံပ္ဍဲဍုၚ်ကဝ်လဝ်သေတံဝွံ ပၟိၚ်ဏာမ္ဂးဂှ်။ ဂုန်ကဵုဒဒှ်မၜိုဟ်သြိုဟ်နူကျာ်ဂမျိုၚ်မအံက်ပိုဲညးကဵုနာဲပိုဲယေသှုခရေတ်ဂှ် ကဵုတန်ဒၟံၚ်ပ္ဍဲမၞးတံအိုတ်ညိ။ ၃-၅ရန်ကဵုဒဒှ်မရံၚ်လၟဳမဒေပ်လဝ်စဏးမၞးတံပ္ဍဲဘုံအကာသတုဲ ဒဒှ်မၞးတံမပ္တေဟ်ယေသှုခရေတ်ဂှ်လေကီု။ ဒဒှ်မဆာန်ညးမသ္အးဇ္ၚးအိုတ်သီုတံဂှ်လေကီု။ ပိုဲညးမိၚ်တုဲ ပ္ဍဲမပပတ္တဏာရာဒၞာစဏးမၞးတံလ္အိတ်တွဵုဟွံသ္ဂုတ်ဂုန်ကျာ်ဂမျိုၚ်မအံက်နာဲပိုဲယေသှုခရေတ်ဝွံဂှ် ထိုၚ်သးအိုတ်ရ။ ဒတိတ်ဒဒှ်ရံၚ်လၟဳဂှ် ပ္ဍဲကိုပ်ကၠာဂှ် နကဵုဂလာန်သ္ဍာံ သၟတ်မတွံဂးဓဝ်ဨဝံၚ်ဂေလိဂှ် မၞးတံဂွံမိၚ်အိုတ်တုဲရ။ ၆ဓဝ်ဝွံ ညံၚ် နဲမတန်ဒၟံၚ် ပ္ဍဲမၞးတံပ္ဍဲလောကဳဇၟာပ် ဒေသအိုတ်သီုတံဂှ် တန်ဒၟံၚ်ရ။ ညံၚ်နဲမသတ်။ ညံၚ်နဲမတောတက်ပ္ဍဲမၞးတံနူတ္ၚဲမၞးတံမဒုၚ်ကေတ်ဂုန်ကျာ်ဂမျိုၚ်သ္ဍာံသၟတ်ဂှ် ပ္ဍဲဇၟာပ်ဇၟာပ်ဒၞာဲအိုတ်သီုတံဂှ်လေ မလေပ်သတ် မလေပ် တော တက်ရောၚ်။ ၇ညံၚ်နဲသာ်ဂှ် မၞိဟ်မဒှ်ဍိက်ဇြဟာန်မွဲစွံကောံကုပိုဲညးအစာမၞးတံမနွံကဵုသစ္စဂတခရေတ်ဨဖပြဝွံ ဗ္တောန်ဖျောန်မၞးတံတုဲရ။ ၈မေတ္တာဇြဟာန်မဆေၚ်ကဵုဝိညာန်ဒဒှ်မနွံပ္ဍဲမၞးတံဂှ် ဨဖပြဝွံ ဟီုထၜးကဵုပိုဲညးတုဲရ။ ၉ဟိုတ်ဂှ်ရ နူတ္ၚဲပိုဲညးမမိၚ်ဒတိတ်ဒဒှ်ဂှ်တုဲ ဟွံပိုတ်ဟွံသ္ဂုတ်မလေပ်ရာဒၞာမိက်စဏးမၞးတံအိုတ်ရ။ တွဟ်မရာဒၞာမိက်မ္ဂးဂှ်။ နကဵုညာန်မတီပၟိက်တဳလပိုန်ဂှ်လေကီု။ နကဵုညာန်မဆေၚ်ကဵု ဝိညာန် ဇၟာပ်ဇၟာပ်ဂကူဂှ်လေကီု။ ဍိုက်ပေၚ်တုဲ ၁၀အတိုၚ်မကြိုက်ကဵုတဳလပိုန်ပ္ဍဲအရာမသ္ဍိုက်မလိုက်ဂှ် လန်ဂၚေၚ်မ္ဂး နကဵုသတ်ဒ္ဂေတ်မခိုဟ်ဇၟာပ်ဇၟာပ်ဂကူညံၚ်ဂွံသတ် ဂှ် ပ္ဍဲညာန်မတီကျာ်ဂမျိုၚ် ဂှ် တောတက်တုဲ။ ၁၁အတိုၚ်ဣဓိတြဳဇှ်ဇကုနကဵု အစောံ သတ္တိ ဇၟာပ်ဇၟာပ်ဂကူ ပ္ဍဲဒဒှ်မအေၚ်ဒုၚ်ကဵုစိုတ်မဂၠိၚ်သီုကဵုဒဒှ်စိုတ်မအိုဟ်တၟိုဟ်ညံၚ်ကျာ်ဂွံကဵုဒြဟတ်ပ္ဍဲမၞးတံဂှ် ပိုဲညးတံဝွံ ရာဒၞာအိုတ်ရ။ ၁၂ဂုန်မအံက်မကဵုပိုဲညးဒှ်မၞိဟ် မကြိုက်ကဵုဆက်ဆံလုပ်စအာဲကၟာဲညးမသ္အးဇ္ၚးမမံၚ်ပ္ဍဲလယးတံဂှ် ပိုဲညးထိုၚ်သးအိုတ်ရ။ ၁၃မအံက်ဝွံ နူကဵုဣဓိဒမၠုဂှ် ပိုက်ကေတ်ပိုဲညးတုဲ ပၠုပ် ပ္ဍဲသန်ထာန်ကောန်ဇြဟာန်ဇကုရ။ ၁၄နကဵုဆီကောန်ဂှ် ဒဒှ်မကၠးပ္တိတ်မတွံဂးဒဒှ်မဗၠးနူဒုဟ်ဂှ် ပိုဲညးဂွံအိုတ်တုဲရ။ ၁၅ကောန်ဝွံ အယောၚ်အလာကျာ်ဂမျိုၚ်ညာတ်နကဵုမတ်ဟွံမာန်ဂှ် မဂွံဒှ်ရ။ ပ္ဍဲဇၟာပ်သတ္တံအိုတ်သီုတံဂှ် မဂွံဒှ်ကောန်ဂၠုရ။ ၁၆ဟိုတ်မ္ဂးဂှ်။ ပ္ဍဲအကာသဂှ်လေကီု။ ပ္ဍဲလတူတိဇၞော်ဂှ်လေကီု။ ဒမံၚ်ရုပ္ပ။ ဒမံၚ်အရုပ္ပ။ ရာဇာပၞၚ်ကဵုဒှ်။ ဣဓိမဂွံအဝဵုကဵုဒှ်ကၞောတ်ညးကဵုဒှ်။ လတာ်စက်ကဵုဒှ်။ ဇၟာပ်အရာအိုတ်သီုတံဝွံ က္တဵုပဒှ်လဝ်ရ။ နကဵုကောန်ဂှ်လေကီု။ သွက်ပၟိက်ကောန်ဂှ်လေကီု။ ဇၟာပ်အရာအိုတ်သီုတံဂှ် က္တဵုပဒှ်တုဲ မဂွံဒှ်အိုတ်ရောၚ်။ ၁၇အရာအိုတ်သီုတံဝွံ ကၠာဟွံက္တဵုဒှ်ဏီဂှ် ကောန်ဝွံ က္တဵုဒှ် တုဲ နကဵုဣဓိတဳလပိုန်ဇၟာပ်အရာအိုတ်သီုတံဂှ် ဂွံတန်အိုတ်ရောၚ်။ ၁၈ခရေတ်ဝွံ ဒှ် က္ဍိုပ်ဇကုသၚ်တွးကျာ်ရောၚ်။ ပ္ဍဲဇၟာပ်ဇၟာပ်အရာသၟိက်ဂွံဒှ်ပြဲအိုတ်မ္ဂး ဒှ်တံမူလတုဲ ပ္ဍဲညးမချိုတ်တံဂှ် ဒှ်ကောန်ဂၠုရ။ ၁၉ဟိုတ်မ္ဂးဂှ်။ ဇၟာပ်အရာမဍိုက်ပေၚ်ဂှ် သၟိက်ဂွံကဵုတန်ပ္ဍဲကောန်ဂှ်လေကီု။ ၂၀နကဵုဆီတဳလပိုန်စရိုဟ်စဝ်ပ္ဍဲလတူတိုၚ်ညးမဒၚ်ဂှ် ပဟဲကၠေံသတ်တြုတုဲ အရာပ္ဍဲအကာသကဵုဒှ်။ အရာပ္ဍဲလတူတိဇၞော်ကဵုဒှ်။ နကဵုကောန်ဝွံ ဇၟာပ်အရာအိုတ်သီုတံဂှ် သၟိက်ဂွံကဵုဒက်မိဿဟာဲကဵုကျာ်ဂမျိုၚ်ဂှ်လေကီုမနွံပၟိက်ရ။
၂၁-၂၂မၞးတံဝွံ ကၠာတေံနကဵုဒ္ဂေတ်ဟွံခိုဟ်ဂှ် သ္ဍးသြာဲနူကျာ်ဂမျိုၚ်တုဲ ပ္ဍဲကောန်စိုတ်ဂှ် ဒှ်သတ်တြုအိုတ်ရ။ လမုဟ်ဝွံ ပ္ဍဲဇကု ကာယျခရေတ်နကဵုမဒုၚ်ဂစိုတ်ဂှ် ပ္ဍဲဂတကျာ်ဂမျိုၚ်ဝွံ ကဵုသ္အးဇ္ၚး ဗၠးသၠးနူဒုဟ်ဒုစရိုတ်အခေါၚ်နၚ်ဒုဟ်မ္ဂး ကဵု သြပ်ဖဍပ် ပ္ဍဲထာန်ကျာ်ဂမျိုၚ်တုဲ ကဵု ဒှ်မိဿဟာဲတုဲရ။ ၂၃ဟိုတ်ဂှ်ရ။ ပ္ဍဲဒဒှ်မပ္တေဟ်ဂှ် တန်ကြန်ဗိုန်ဂၠိတုဲ နူကဵုဒဒှ်မရံၚ်လၟဳမဆေၚ်ကဵုဓဝ်ဨဝံၚ်ဂေလိမၞးတံမမိၚ်ဂှ် လ္ပယောၚ်ပါဲအိုတ်။ ဓဝ် ဨဝံၚ်ဂေလိဝွံဂှ် ပ္ဍဲကဵုဇၟာပ်သတ္တံဆမနွံအသၟဝ်အကာသတံဂှ် တွံတုဲရ။ ပ္ဍဲဓဝ်ဂှ် အဲပဝ်လုဝွံ ဒှ်မၞိဟ်ဒုၚ်စကာရောၚ်။ ၂၄လမုဟ်ဝွံ ပ္ဍဲမဒုၚ်ဒဒိုက်စဏးမၞးတံဂှ် အဲအိုဟ်တၟိုဟ်တုဲ ဒဒိုက်ခရေတ်မသိဟ်တဴနွံမံၚ်ဏီဂှ် စဏးဇကုကာယျခရေတ်မတွံဂးသၚ်တွးကျာ်ဝွံ ပ္ဍဲဇကုကာယျအဲဂှ် ကဵုဍိုက်ပေၚ်တဴရ။ ၂၅-၂၇အရာမသ္ဇိုဟ်နက်မပၞုက်ဗ္ဒန်လဝ်ပ္ဍဲကာလကိုပ်ကၠာဂှ်။ လမုဟ်ဝွံ ပ္ဍဲမၞိဟ်မသ္အးဇ္ၚးတံဂှ် ပြာကတ်တုဲရ။ ပ္ဍဲအဲဝွံ သွက်မၞးတံအတိုၚ်ဣဓိအခေါၚ်ကျာ်မကဵုတၞဟ်နသၟိက် ဟီုတွံတွဟ်ပါၚ်ကျာ် ဂမျိုၚ်ဒဵုမအိုတ်ဂှ် ပ္ဍဲသၚ်တွးကျာ်ဂှ် အဲဝွံ မဂွံဒှ်ညး မဒုၚ်စကာရောၚ်။ ပ္ဍဲမၞိဟ် ဂကူတၞဟ်သ္အာၚ်တံဂှ် ပိုန်မဆေၚ်ကဵု အရာမသ္ဇိုဟ်နက်မွဲစိဂလိုၚ် မဇၞော်ဂှ် သၟိက်ဂွံကဵုညးမသ္အးဇ္ၚးတီဂှ် ပၟိက်ကျာ်ဂမျိုၚ်မနွံရ။ ပိုန်ဒိပ်ဝွံဂှ် ဒဒှ်မရံၚ်လၟဳတြဳဇှ်အနုဘဴမတွံဂးဒဒှ်ခရေတ်မတန်ပ္ဍဲမၞးတံဂှ် မဂွံဒှ်ရောၚ်။ ၂၈နကဵုယေသှုခရေတ်ဝွံ ဇၟာပ်မၞိဟ်စိုပ်ဒဒှ်မစိစုံတုဲ။ ညံၚ်ဂွံဆက်ဗဂိန်ပ္ဍဲကျာ်ဂမျိုၚ်ဝွံဂှ် တွံဓဝ်ခရေတ်မ္ဂး။ ပ္ဍဲဇၟာပ်မၞိဟ်အိုတ်သီုတံဂှ် နကဵုဇၟာပ်ညာန်ပညာပိုဲညးတံဝွံ ကဵုသတိတုဲ မလေပ်ကဵုဩဝါဒအိုတ်ရ။ ၂၉နကဵုပၟိက်သာ်ဂှ် အတိုၚ်ဣဓိညးမပြုပြေၚ်ပ္ဍဲအဲဝွံဂှ် အဲလေပ်ကၠေံစိုတ်ပတိတ်ဒြဟတ်ရ။