၁ဂလာန်ကောန်ဍာဝိဒ်သၟီဇၞော်ယေရုသှလေမ်မဒှ်အစာဓမ္မဒေသနာမ္ဂးဂှ်၊ ၂အနတ္တသက်သက်၊ အနတ္တသက်သက်၊ အရာအိုတ်သီုတံဝွံ ဒှ်အနတ္တသက်သက်အိုတ်ရ။ ၃မၞိဟ်ဝွံ ဆမကၠေံစိုတ်ပတိတ်ဇြဟတ် ပ္ဍဲမသၟဝ်တ္ၚဲတံဂှ် မူဒတုဲကၟဝ်မနွံရော။ ၄မၞိဟ်မွဲအဆက်လောန်အာရ။ မွဲအဆက်မံက်ကၠုၚ်ရ။ တိဇၞော်မ္ဂးဂှ် တန်ဒၟံၚ်လ္အိတ်တွဵုရ။ ၅တ္ၚဲလေ တိတ်လုပ်ဒၟံၚ်တုဲ၊ ပ္ဍဲဒၞာဲဒေသမတိတ်ဂှ် ဒြေပ်မွဲဝါပၠန်တုဲ၊ ဗက်ပ္ဍဲဂၠံၚ်သမၠုၚ်ကျာတုဲ၊ လေပ်ဂေတ်ပ္ဍဲဂၠံၚ်သၟဝ်ကျာမွဲဝါပၠန်ရ။ ၆ကျာဝွံလေ ဂေတ်အာလ္အိတ်တွဵုတုဲ၊ ပ္ဍဲဒေသမဂေတ်အာတုဲ ကလေၚ်တုဲ လေပ်ဂေတ်ပၠန်ရ။ ၇ၜဳအိုတ်သီုတံဝွံ စိုပ်ပ္ဍဲမှာသ္မိတ်အိုတ်ရ။ ၜိုန်ဂှ်လေ၊ မှာသၟိက်ဝွံ ဟွံလေပ်ပေၚ်။ ဍာ်ၜဳဝွံ လေပ်ကလေၚ်အာပ္ဍဲဒၞာဲဒေသ မဇွောဝ်တိတ်ပၠန်ရ။ ၈အရာအိုတ်သီုတံဝွံ ဒဵုကဵုမၞိဟ်ဟီုဟွံမာန်ဂှ် ဍိုက်ပေၚ်ကဵုဒဒှ်မဍောၚ်ၜိုတ်အိုတ်ရ။ မတ်ဝွံ ညာတ်တုဲ ဟွံလေပ်အိုတ်။ က္တောဝ်ဝွံလေ မိၚ်တုဲ ဟွံလေပ်ဖဲ။ ၉အရာမကေၚ်ဒှ်ဂှ် တုပ်ကဵုအရာမဒးဒှ်ရ။ ပွမပလၟုဟ်ဂှ် တုပ်ကဵုပွမဒးပရ။ ပ္ဍဲအသၟဝ်တ္ၚဲအရာပွတမိဟွံမွဲ၊ ၁၀ရံၚ်ညိ။ ဒှ်တမိရ သာ်ဝွံ အရာမဒးဟီုနွံ မွဲမွဲဟာ။ ပွအရာတေံဝွံ နူကၠာပိုဲညးမကေၚ်ဒှ်ပ္ဍဲကာလကိုပ်ကၠာတုဲရ။ ၁၁ပွအရာမဒှ်ကိုပ်ကၠာတေံဂှ် လေပ်ဝိုတ်လလုဲရ။ ပွအရာမဒှ်ဗွဲကြဴတံဂှ်လေ၊ ညးမဒှ်ပ္ဍဲလက်ကရဴဂှ် ပွအရာတေံဝွံ ဝိုတ်လလုဲအိုတ်ရ။
၁၂အဲအစာဓမ္မဒေသနာဝွံ၊ ကာလမဒှ်ဨကရာတ်ဣသရေလ ပ္ဍဲဍုၚ်ယေရုသှလေမ်ဂှ်၊ ၁၃နကဵုညာန်ပညာ ဆမပပ္ဍဲသၟဝ်ဂၠးအကာသတံဂှ် ညံၚ်ဂွံဂၠိုက်ဂၠာဲစၟဳစၟတ်ဂှ် စွံစိုတ်ရ။ သွက်ကောန်မၞိဟ်တံဝွံ ဂေတ်ဂ္ၚေၚ်ပွမကဵုဍောတ်ၜိုတ်တေံဂှ် ကျာ်ဂမျိုၚ်ကဵုတုဲရ။ ၁၄ပွအရာဆမပပ္ဍဲအသၟဝ်တ္ၚဲတံဂှ် အဲညာတ်တုဲရ။ သီုဖအိုတ်တံဝွံ ဒှ်ပွအနတ္တ၊ ပွမစကျာအိုတ်ရ။ ၁၅အရာၚံက်ဂှ် ကဵုသ္တပ်ဟွံမာန်။ အရာဟွံဍိုက်ပေၚ်ဂှ် လ္ပရိုဟ်ရ။ ၁၆အဲဝွံ ဟီုဂးပ္ဍဲကောန်စိုတ်ဇကုမ္ဂးဂှ်၊ အဲဝွံ၊ လောန်နူညးကၠာအဲအိုတ်သီုတံ မကေၚ်ဒှ်ပ္ဍဲဍုၚ်ယေရုသှလေမ် ဇၞော်သၠုၚ်တုဲ နွံပညာရ။ ဒှ်ကွေံသ္ဍာံသၟတ်ကောန်စိုတ်အဲဝွံ ကွတ်ပညာဂမၠိုၚ်တံဂှ် ပ္ဍေန်ပ္ဍဟ်ဗွဲမလောန်ရ။ ၁၇ဓဝ်ပညာဂှ်လေကီု၊ ဒဒှ်မသ္အဵုသ္အာ်ကဵုဒဒှ်မသမၠီုတံဂှ်လေကီုပိုၚ်ခြာတုဲ ညံၚ်ဂွံတီအဲဝွံ စွံစိုတ်ရ။ ပွတေံဝွံလေ၊ ဒှ်ပွမစကာဂှ် ရိပ်တီဒးရ။ ၁၈ဟိုတ်မ္ဂးဂှ်၊ ပညာဂၠိုၚ်မ္ဂး၊ အရာမဟုံဇြဂၠိုၚ်ရ။ ကွတ်ပညာညးမတောတက်ဂှ် ဒဒှ်မအောန်စိုတ်လေပ်တောတက်ရ။