၁မပ္တံကဵုရးအိန္ဒြိယတုဲ ဒဵုကဵုရးကုသှ၊ ရးနဳဂီုမွဲကၠံၜါစှ်ောထပှ်ရးတံဂှ်၊ ဨကရာတ်မအုပ်လဒံအာသှိုဲရုဝွံ၊ ၂ဂဇံပ္ဍဲလတူရာဇာပၞၚ်နန်သှုသှာန်တုဲ ပ္ဍဲမဂဇံနန်ပိသၞာံဂှ်၊ ၃ဗဵုပေရသိ၊ ဗဵုမေဍိဂမၠိုၚ်၊ အမာတ်သေဏာပတိဒဴပညာဂမၠိုၚ်ဇၟာပ်ဇၟာပ်ရးနဳဂီုတံဂှ် ကော်တုဲ၊ ဗဒှ်ပေါဲသွက်အမာတ်ဒဴဗညာကဵုဍိက်အိုတ်သီုတံဂှ်ရ။ ၄ကာလဂှ် ထၜးပိုန်ဒြပ် ဣဓိအနုဘဴရးနဳဂီု လုကဴကၠံဒစာံစှ်ောတ္ၚဲရ။ ၅လောန်အာကာလဂှ်တုဲမ္ဂး၊ ဨကရာတ်ဝွံ ပ္ဍဲနန်သှုသှာန် သွက်ညးမကောံဒရီုမၞိဟ်ဇမၞော် မၞိဟ်ဍောတ်အိုတ်ကဵုတံဇရေၚ်နန်၊ ပ္ဍဲဝၚ်ကၠံဥဒျာန်ဗဒှ်ပေါဲလုကဴထပှ်တ္ၚဲရ။ ၆ပ္ဍဲတိုၚ်တၟံဗ္တာၚ်မဗ္ဂပ်လကံက်သြန်တံဂှ်၊ နကဵုဂနိက်ပိက်ခၟိဟ်ဗ္တာၚ်သၚေက်ဍီုမလကဲဖျေံကဵုဇုက်ပိက်ခၟိဟ် ဗ္ကေတ်ယောံတံဂှ်လေကီု၊ မလးလဝ်လတူတၟံခတေဟ်ဍီုဗ္ကေတ်ဗ္တာၚ်လစံက်နကဵုဒေန်ထဝ်သြန်တံဂှ်လေကီု၊ ကၠံဨကရာတ်ဝွံ ဍိုက်ပေၚ်ရ။ ၇တုပ်သၟဟ်ကဵုပိုန်ဒြပ်ဨကရာတ်တုဲ သၠိုၚ်ထဝ်တၟေၚ်တၟဟ်ဗွဲဂၠိုၚ်တံဂှ် သုၚ်ဍာ်ဇဗျေတ်အိုတ်ရ။ ၈ပွမသုၚ်ဍာ်ဇဗျေတ်ဝွံ ဒှ်အတိုၚ်သၞောဝ်ရ။ မူရဴညးမွဲဂှ် ပအနိၚ်အပိုၚ်တုဲ ဟွံကဵုသုၚ်၊ မၞိဟ်အိုတ်သီုတံဝွံ ညံၚ်ဂွံပအတိုၚ်ပၟိက်ဇကု၊ ပ္ဍဲကဵုညးမဒှ်သၟီပ္ဍဲနန်အိုတ်သီုတံဂှ် ဨကရာတ်ဟီုပၟိၚ်ရ။ ၉ဂၞကျာ်ဝါသှတိဂှ်လေ၊ သွက်ဗြဴကမၠောန်နန်ဨကရာတ်အာသှိုဲရုဗဒှ်ပေါဲရ။
၁၀-၁၁ဂၞကျာ်ဝါသှတိဝွံ ဟိုတ်ရုပ်သာ်မဂေါဝ်ဆာဲဂှ်ဒှ်တုဲ ပ္ဍဲမပေၚ်ထပှ်တ္ၚဲဂှ်၊ ဨကရာတ်ဝွံ သုၚ်ဍာ်ဇဗျေတ်တုဲ ကာလမနွံမိပ်စိုတ်ဂှ်၊ ညံၚ်သၟိက်ဂွံထၜးကဵုသၟီဂမၠိုၚ်ကဵုမၞိဟ်ဂမၠိုၚ်တြဳဇှ် ဂၞကျာ်ရုပ်သာ်မဂေါဝ်ဆာဲဂှ်၊ ဂၞကျာ်ဝါသှတိဂှ် ကဵုခလဝ်ၝောံကိုတ်သၟီတုဲ ညံၚ်ဂွံပလံၚ်နၚ်ပ္ဍဲဂတဨကရာတ်ဂှ်၊ ဟီုပၟိၚ်ကဵုဂအုပ်မၞိဟ်ဗြဴညးထပှ်မဟုမာန်၊ ၜိဇထ၊ ဟာၜဝ်န၊ ၜိဂထ၊ အၜါဂထ၊ ဇေထာ၊ မပ္တံကဵုကာကာတ်တုဲ ညးမယဵုဒုၚ်အမှုဨကရာတ်တံဂှ်ရ။ ၁၂ၜိုန်ဂှ်လေ၊ အသံဂအုပ်မၞိဟ်ဗြဴမဟီုဂှ်၊ ဂၞကျာ်ဝွံ ကယျာန်ပါဲတုဲ ဟွံကၠုၚ်ဒၟံၚ်ရ။ ဟိုတ်ဂှ်ရ ဨကရာတ်ဝွံ ပၞေါတ်တိတ်တုဲ၊ ပၟတ်ဒေါသတူဒၟံၚ်ရ။
၁၃-၁၄ကာလဂှ် ကာသှေန၊ သှေထာ၊ အာဍမာထ၊ တာသှိသှ၊ မေရေတ်၊ မာသေန၊ မမုကာန်မတွံဂး၊ သေနာပတိအမာတ်ဒဴဗညာထပှ်တလ မဂဇံဇရေၚ်ဨကရာတ်မညာတ်ဒၟံၚ်မုက္ခဝါဨကရာတ်ရိုဟ်ဒဒှ်တ္ၚဲတုဲ၊ ပ္ဍဲရးနဳဂီုပေရသိ မေဍိမပြဲအိုတ်၊ ညးမဆိုက်ဗ္ဒေက်ပ္ဍဲဂၠံၚ်မစဳရေၚ်သၞောဝ်အိုတ်သီုကဵုညးတလပညာမတီပရူပရာ၊ အတိုၚ်ပဝေနဳ ဨကရာတ်မချပ်ဂနန်တံဂှ်တုဲ၊ ၁၅အသံအဲဨကရာတ်အာသှိုဲရုဂအုပ်ဗြဴမဟီုပ္တီဂှ်၊ ဂၞကျာ်ဝါသှတိ ဟိုတ်ဟွံကလၚ်၊ အတိုၚ်ဓမ္မသာတ်ပသာ်ဂွံစဳရေၚ်ပ္ဍဲညးညိရော သာ်ဝွံ သၟာန်မ္ဂး၊ ၁၆မမုကာန်ဝွံ၊ ဂၞကျာ်ဝါသှတိဝွံ ဆမသှာတ်သၟီဇၞော်မွဲကီု မှာရာအာဟွံသေၚ်။ ပ္ဍဲဇၟာပ်ဇၟာပ်ရးနဳဂီုတဳလဂုန် သၟီဇၞော်အာသှိုဲရုမအုပ်လဒံနွံသၟီဂမၠိုၚ်ကဵုကောန်တလဒဒိုက်ဂမၠိုၚ်အိုတ်သီုတံဂှ် မှာရာအာတုဲရ။ ၁၇ဨကရာတ်အာသှိုဲရုဝွံ ကော်ဂၞကျာ်ဝါသှတိဂှ်တုဲ၊ ဂၞကျာ်ဟွံကၠုၚ် သာ်ဝွံ ဟီုပြးဇးအိုတ်တုဲ၊ အမှုဂၞကျာ်မပအိုတ်သီုဂှ် မၞိဟ်ဗြဴတံဝွံ မိၚ်တုဲ၊ ဟွံပမာနကဵုတြုံဇကုအိုတ်ရောၚ်။ ၁၈အမှုဂၞကျာ်မပတေံဂှ် ဂၞကျာ်သၟီပေရသိ၊ မေဍိတံဝွံ တီညာတ်အိုတ်မ္ဂး၊ ညံၚ်နဲသာ်ဂှ် ကလေၚ်ဟီု ပ္ဍဲအမာတ်ဒဴဗညာအိုတ်သီုတံဂှ်မ္ဂး၊ စိုတ်ဟွံညှာတာ၊ ပၞောတ်ဒေါသတောတက်ဂၠိုၚ်တိုန်ရောၚ်။ ၁၉ဝါသှတိဝွံ ကြဴမွဲဝါညံၚ်ဟွံဂွံလုပ် ပ္ဍဲထာန်တဳလဂုန်သၟီဇၞော်အာသှိုဲရုနွံပၟိက်မ္ဂး၊ လ္ပကဵုလုပ်ညိ သာ်ဝွံ ဟီုပၟိၚ်ညိ။ ညံၚ်ဂွံနွံအသံပြံၚ်လှာဲဟွံမာန်ဂှ် ပၠုပ်ပ္ဍဲဓမ္မသာတ်ပေရသိမေဍိတုဲ ချူတဴညိ။ မၞိဟ်ဗြဴမခိုဟ်လောန်နူဝါသှတိဂှ်လေ၊ ထၜပ္တိုန်ပ္ဍဲဒၞာဲဂၞကျာ်ညိ။ ၂၀ပသာ်ဂှ်မ္ဂး၊ အသံဨကရာတ်မကဵုဂှ် ကာလမတရးဂစာဲအလုံမွဲရးနဳဂီုမလှဲလး၊ မၞိဟ်ဗြဴအိုတ်သီုတံဝွံ တြုံဇကုယုတ်ကီုခိုဟ်ကီုတံဂှ် အဲပရဲအိုတ်ရောၚ် သာ်ဝွံ၊ ပ္ဍဲဂတဨကရာတ် ကဵုအမာတ်ဒဴဗညာတံဂှ် လ္ၚောဝ်ပ္တီလဝ်ရ။ ၂၁ဂလာန်တေံဂှ် ဨကရာတ်ကဵုအမာတ်ဒဴဗညာတံဝွံ သ္ဍိုက်မလိုက်တုဲ၊ အတိုၚ်မမုကာန်လ္ၚောဝ်ပ္တီဂှ် ဨကရာတ်ပတုဲ၊ ၂၂ဇၟာပ်မၞိဟ်ညံၚ်ဂွံအုပ်လဒံသ္ၚိဇကုဂှ် ညံၚ်ဂွံဟီုဂလာန်ဂကူဇကုဂှ်၊ ဂလာန်ဘာသာတၞဟ်တၞဟ်ဇၟာပ်ရးဇၟာပ်ဒေသဂှ် ကလေၚ်ဂတးအဓိပါဲတုဲ၊ အသံလိက်ဂှ် ကဵုဏာဇၟာပ်ဇၟာပ်ဒေသရးနဳဂီုရ။