သၠ​ပတ်​သ​မ္တီ​သၞောဝ်​ဨ​ဇ​ရ ၆

၁ကာ​လ​ဂှ် န​ကဵု​အ​သံ​သၟီ​ဍာ​ရိ ဂၠိုက်​ဂၠာဲ​ပ္ဍဲ​တိုက်​လိက် ဒၞာဲ​မ​စွံ​ဗါ​န္ဓာ​ဍုၚ်​ၜါ​ၜု​လောန်​အိုတ်​ရ။ ၂ဆဵု​သၠ​ပတ်​သ​မူ​ပ္ဍဲ​နန်​ရး​မေ​ဍိ၊ ဍုၚ်​အာ​ခ​မေ​ထ​ဂှ်​တုဲ၊ ဂ​လာန်​မ​ပါ​ပ္ဍဲ​သၠ​ပတ်​သ​မူ​မ္ဂး​ဂှ်၊ ၃သ္ၚိ​ကျာ်​သွက်​ဂွံ​ပူ​ဇဴ​ယတ်​ဂှ် ကဵု​သြိုၚ်​ပ္တန်​ရ၊ သီု​မ​ဗိုန်​ဗတ်​ရိုဟ်​တိုက်​ဂှ် ကဵု​ဖျေံ​လဝ်​ရ။ သၠုၚ်​တ​ရဴ​စှ်ော​ဟတ်၊ အ​နာံ​တ​ရဴ​စှ်ော​ဟတ်​နွံ​တုဲ၊ ၄န​ကဵု​တၟံ​ရေၚ်​မ​ဇၞော်​ပိ​လ​ဇံက်၊ လ​ဇံက်​ဆု​ရေၚ်​တ​မိ ကဵု​သြိုၚ်​ပ္တန်​ထပ်​ထပ်​ရ။ ဇွိုအ်​မ​အ​ဟာ​ရ​ဂ​မၠိုၚ်​ဂှ်​လေ၊ ပ္တိတ်​နူ​အ​ပ္ဍဲ​ဗါ​န္ဓာ​သၟီ​တုဲ ကဵု​ရ။ ၅နေ​ၜု​ခါတ်​နေ​ဇာ​ပ္တိတ်​နူ အ​ပ္ဍဲ​လွဳ​မာန်​ကျာ်​ဍုၚ်​ယေ​ရု​ယေ​သှ​လေမ်​တုဲ၊ ၜိုန်​မ​ဆေၚ်​ကဵု​သ္ၚိ​ကျာ်​ဂ​မျိုၚ်​ဂှ်​လေ၊ ကြိ​ယျာ​ထဝ်၊ ၊ ကြိ​ယျာ​သြန်​မ​ပ​လံၚ်​နၚ်​ပ္ဍဲ​ဍုၚ်​ၜါ​ၜု​လောန်​တံ​ဂှ် ကဵု​က​လေၚ်​ကဵု​ရ။ ပ​လံၚ်​ဏာ​ပ္ဍဲ​လွဳ​မာန်​ကျာ်​ဍုၚ်​ယေ​ရု​သှ​လေမ်​တုဲ၊ အ​ရာ​အိုတ်​သီု​တံ​ဂှ် ပ္ဍဲ​ဒၞာဲ​ဇ​ကု​ကဵု​စွံ​အ​ပ္ဍဲ​သ္ၚိ​ကျာ်​ရ သာ်​ဝွံ၊ ပ္ဍဲ​သၞာံ​ပ​ထ​မ​သၟီ​ဇၞော်​ကု​ရု​မ​ဂ​ဇံ​နန်၊ ပ္ဍဲ​အ​မှု​သ္ၚိ​ကျာ်​ဍုၚ်​ယေ​ရု​သှ​လေမ်​ဂှ် အ​သံ​မ​နွံ​ရ။ ၆ဒှ်​သာ်​ဂှ်​တုဲ ပ​ဒေ​သ​ရး​လ္ပာ်​ပ​လိုတ်​ၜဳ​တာ​တ​နာဲ၊ သေဝ်​သာ​ၜဝ်​ဇ​နာဲ​ကဵု​ဆော​ဖွက်​မၞး​တံ​မ​တွံ​ဂး၊ မၞိဟ်​အ​ဖာ​သ​သက်​မ​မံၚ် ပ္ဍဲ​လ္ပာ်​ပ​လိုတ်​ၜဳ​တံ​ဝွံ၊ တိတ်​အာ​အိုတ်​ရ။ ၇အ​မှု​မ​သြိုၚ်​ပ္တန်​သ္ၚိ​ကျာ်​တေံ​ဂှ် လ​ပ​ဆဳ​ဒ​နာ​အိုတ်​ညိ။ တ​ကိုပ်​ဍုၚ်​ယု​ဍ​ကဵု​ဇ​မၞော်​ဇ​မၠိၚ်​ညး​ဂ​ကူ​ယု​ဍ​တံ​ဝွံ၊ တေံ​သ္ၚိ​ကျာ်​ဂှ် ကဵု​သြိုၚ်​ပ္တန်​ပ္ဍဲ​ဒၞာဲ​ဇ​ကု​ညိ။ ၈ဝေၚ်​နူ​ဂှ်၊ မၞး​တံ​ဝွံ အ​မှု​မ​သြိုၚ်​ပ္တန်​သ္ၚိ​ကျာ်​ဂှ် ညံၚ်​ဂွံ​ဗိုၚ်​ရီု​ဇ​မၞော်​ဇ​မၠိၚ်​ဂ​ကူ​ယု​ဍ​တံ​ဂှ် ညး​တံ​ဝွံ ညံၚ်​ဟွံ​ဂွံ​မွဲ​ကဵု​ဆဳ​ဒ​နာ၊ ခ​ရိတ်​သွက်​ဂွံ​သြိုၚ်​ပ္တန်​သ္ၚိ​ကျာ် နူ​အ​ပ္ဍဲ​ဗါ​န္ဓာ​သၟီ​မ​တွံ​ဂး​အ​ခေါန်​ဖ​လာ​မ​ဒုၚ်​ပ္ဍဲ​လ္ပာ်​ပ​လိုတ်​ၜဳ​ဂှ် ညံၚ်​ဂွံ​ပ္တိတ်​ကဵု​ဗွဲ​ပ​ရဟ်​အ​သံ​အဲ​မ​နွံ​ရ။ ၉-၁၀ဝေၚ်​နူ​ဂှ်၊ ယတ်​မြ​မောဝ်​တံ​ဂှ် ညး​တံ​ဝွံ ပူ​ဇဴ​ကဵု​ကျာ်​ဂ​မျိုၚ်​နာဲ​ဘုံ​အ​ကာ​သ​တုဲ၊ ညံၚ်​ဂွံ​ဒုၚ်​ဂုန်​သွက်​လ​မျီု​ဨ​က​ရာတ်၊ လ​မျီု​က​လော​ဝေါၚ်​သ​နန်၊ အ​တိုၚ်​ယတ်​ပ​ရော​ဟိတ်​ဍုၚ်​ယေ​ရု​သှ​လေမ်​တံ​မ​စဳ​ရေၚ်​ဆ​ပၟိက်​ညး​တံ​မ​နွံ၊ ယတ်​ပူ​ဇဴ​သွက်​ဂွံ​စံၚ်​ပၟတ်​ကဵု​ကျာ်​ဂ​မျိုၚ်​နာဲ​ဘုံ​အ​ကာ​သ၊ ဂၠဴ၊ သဵု​ကၟက်၊ သဵု​သၟတ်၊ သြောံ၊ ၜဵု၊ ဍာ်​ဇ​ဗျေတ်၊ ကၠေၚ်​တံ​ဂှ် ရိုဟ်​ဒ​ဒှ်​တ္ၚဲ​ကဵု​ကဵု​ရ။ ၁၁မွဲ​ဝါ​ပၠန်၊ ယြဴ​ညး​မွဲ​စး​အ​သံ​ဝွံ​ဂှ်​မ္ဂး၊ ဒ​ယိုၚ်​ဆု​ဂှ် ပိုက်​ကေတ်​နူ​သ္ၚိ​ညး​တေံ​ဂှ်​တုဲ တဵု​တုဲ​မ္ဂး၊ ကဵု​ညး​ကွက်​လဝ်​ကအ်​ရ။ သ္ၚိ​ညး​ဂှ်​လေ ကဵု​ဒှ်​ဗွဝ်​အိက်​ဂၠဴ​ရ သာ်​ဝွံ အ​သံ​အဲ​မ​နွံ​ရ။ ၁၂ညံၚ်​ဂွံ​ပ​လီု​ပ​လ္ပာ်​ဝး​ပ​ကဝ်​သ္ၚိ​ကျာ်​ဍုၚ်​ယေ​ရု​သှ​လေမ်​ဂှ်၊ ဨ​က​ရာတ်​ကဵု​ကောန်​တ​လ​ဒ​ဒိုက်​အိုတ်​သီု​မ​ပ​တံ​ဂှ်၊ ကျာ်​ဂ​မျိုၚ်​မ​ကဵု​နာဲ​မ​တန်​ပ္ဍဲ​ဒေ​သ​တေံ​ဝွံ ကဵု​ပ​လီု​ပ​လာ်​ညိ။ အဲ​ဍာ​ရိ​ဝွံ မ​ကဵု​အ​သံ​ရ။ အ​တိုၚ်​မ​ပၟိၚ်​လဝ်​ဂှ်၊ ကဵု​ပ​ဗွဲ​ပ​ရဟ်​ညိ သာ်​ဝွံ ကဵု​ဏာ​ရောၚ်။

၁၃ကာ​လ​ဂှ် အ​တိုၚ်​အ​သံ​သၟီ​ဇၞော်​ဍာ​ရိ​မ​ကဵု​ဏာ​ဂှ်၊ ပ​ဒေ​သ​ရး​လ္ပာ်​ပ​လိုတ်​ၜဳ​တာ​တ​နာဲ၊ သှေ​သှာ​ၜဝ်​ဇ​နာဲ​ကဵု​ဆော​ဖွက်​ညး​တံ​ဝွံ ပ​ဗွဲ​ပ​ရဟ်​အိုတ်​ရ။ ၁၄ဂ​ကူ​ယု​ဍ​ညး​အ​ယုက်​မ​ဇၞော်​တံ​ဝွံ သြိုၚ်​ပ္တန်​တုဲ၊ ပ​ရော​ဗက်​ဟ​ဂ္ဂာဲ​ကဵု​ကောန်​ဣ​ဍော​ဇာ​ခ​ရိ​ဟိုတ်​မ​ဟီု​တွံ၊ က​သပ်​စိုပ်​ဒ​တုဲ အိုတ်​ရ။ အ​တိုၚ်​အ​သံ​ကျာ်​ဂ​မျိုၚ်​ဂ​ကူ​ဣ​သ​ရေ​လ​အ​တိုၚ်​ပၟိၚ်​ဨ​က​ရာတ်​ပေ​ရ​သိ​သၟီ​ကု​ရု၊ သၟီ​ဍာ​ရိ၊ သၟီ​အာ​တ​ဇေ​ရေတ်​မ​ဟီု​ပၟိၚ်​ဂှ်၊ သြိုၚ်​ပ္တန်​တုဲ​ဒှ်​ရ။ ၁၅ပ္ဍဲ​သၟီ​ဇၞော်​ဍာ​ရိ​မ​ဂ​ဇံ​နန်၊ တ​ရဴ​သၞာံ၊ ဂိ​တု​အာ​ဍာ၊ ပ္ဍဲ​ပိ​တ္ၚဲ​သ္ၚိ​ကျာ်​ဝွံ တုဲ​ဒှ်​တုဲ​ရ။

၁၆ကောန်​ဂ​ကူ​ဣ​သ​ရေ​လ၊ မ​ပ္တံ​ကဵု​ယတ်​ပ​ရော​ဟိတ်၊ ကောန်​လေ​ဝိ၊ ကောန်​ဂ​ကူ​မ​ကေၚ်​ဒုၚ်​သီ​ဏာ​မွဲ​စွံ​ဆ​မ​နွံ​တံ​ဝွံ၊ န​ကဵု​စိုတ်​အိုဟ်​တၟိုဟ်​သ္ၚိ ကျာ်​ဂ​မျိုၚ်​ဂှ် ပ​ဒှ်​ပေါဲ​အ​နု​မော​ဒ​နာ​အိုတ်​ရ။ ၁၇ပ္ဍဲ​ပေါဲ​အ​နု​မော​ဒ​နာ သ္ၚိ​ကျာ်​တေံ​ဂှ် ဂၠဴ​မွဲ​ကၠံ၊ သဵု​ကၟက်​ၜါ​ကၠံ၊ သဵု​သၟတ်​ပန်​ကၠံ​ဂှ်​လေ​ကီု၊ အ​တိုၚ်​ဂ​ကူ​ဣ​သ​ရေ​လ​စှ်​ၜါ​ဂ​ကူ၊ ယတ်​သွက်​ဂွံ​ပ​ရေ​ဒုဟ် ကောန်​ဂ​ကူ​အိုတ်​သီု​တံ​မ​တွံ​ဂး ဗ​ၜေံ​ကၟက်​စှ်​ၜါ​ဂှ်​လေ​ကီု၊ ပူ​ဇဴ​အိုတ်​ရ။ ၁၈အ​တိုၚ်​မ​ပါ​သၠ​ပတ်​မဝ်​သှေ​ဂှ်၊ ညံၚ်​ဂွံ​ပ​ဝတ်​ကျာ်​ပ္ဍဲ​ဍုၚ်​ယေ​ရု​သှ​လေမ်၊ ယတ်​ပ​ရော​ဟိတ်​တၞဟ်​တၞဟ်​တံ​ဂှ်​လေ​ကီု၊ ကောန်​လေ​ဝိ​မ​ဒက်​ကောံ​တံ​ဂှ်​လေ​ကီု​ခါန်​ကၞက်​လဝ်​အိုတ်​ရ။ ၁၉ကောန်​ဂ​ကူ​မ​ဒး​ဒုၚ်​သီ​ဏာ​တံ​ဝွံ ပ္ဍဲ​ဂိ​တု​ပ​ထ​မ၊ စှ်​ပန်​တ္ၚဲ၊ ပေါဲ​ပ​သ​ခါ​ဂှ်​လေ ပ​ဒှ်​အိုတ်​ရ။ ၂၀ယတ်​ပ​ရော​ဟိတ်​ကဵု​ကောန်​လေ​ဝိ​တံ​ဝွံ ကဵု​ဇ​ကု​သ္အး​ဇ္ၚး​မွဲ​ဂ​ကောံ​မွဲ​က​ရောံ​တုဲ၊ အ​ရာ​အိုတ်​သီု​တံ​ဝွံ သ္အး​ဇ္ၚး​တုဲ၊ မ​ပ္တံ​ကဵု​သွက်​ဇ​ကု​တုဲ၊ သွက်​ယတ်​ပ​ရော​ဟိတ်​က​လော​ဝေါၚ်​သ​မွဲ​စွံ​ကဵု​သွက်​ကောန်​ဂ​ကူ​မ​ဒး​ဒုၚ်​သီ​ဏာ​အိုတ်​သီု​တံ၊ ဂ​စိုတ်​သဵု​သၟတ်​ပ​သ​ခါ​အိုတ်​ရ။ ၂၁တၞံ​န​သၟိက်​ဂွံ​ဂၠာဲ​ကျာ်​ထာ​ဝ​ရ​ကျာ်​ဂ​မျိုၚ်​ဂ​ကူ​ဣ​သ​ရေ​လ၊ ကောန်​ဂ​ကူ​ဣ​သ​ရေ​လ​ဂ​မၠိုၚ်​မ​တိတ်​ကၠုၚ် အ​ပ္ဍဲ​ဂ​ကောံ​မၞိဟ်​မ​ဒး​သီ​ဏာ၊ ညး​ဂ​မၠိုၚ်​အိုတ်​သီု​ပါဲ​သ္အး​အ​ရာ​မ​ကၠိ​ခ​ဍက်​ပ္ဍဲ​ဒေ​သ​ဒၞာဲ​ကောန်​ဂ​ကူ​တၞဟ်​သ္အာၚ်​တံ​ဝွံ စ​ပေါဲ​ပ​သ​ခါ​ဂှ်​တုဲ၊ ၂၂န​ကဵု​စိုတ်​မ​အိုဟ်​တၟိုဟ် လု​ကဴ​ထ​ပှ်​တ္ၚဲ​ပေါဲ​အ​ဇု​မ​ဂှ်​လေ ပ​ဒှ်​အိုတ်​ရ။ ဟိုတ်​မ္ဂး​ဂှ် အ​ခေါၚ်​မ​အိုဟ်​တၟိုဟ်​ဂှ် ကျာ်​ထာ​ဝ​ရ​ကဵု​ရ။ ကျာ်​ဂ​ကူ​ဣ​သ​ရေ​လ ပ္ဍဲ​အ​မှု​မ​သြိုၚ်​ပ္တန်​လွဳ​မာန်​ဂှ်၊ ညံၚ်​ဨ​က​ရာတ်​အာ​သှု​ရိ​ဂွံ​ထ​ၜ​သ္ဘာ်​ကောန်​စိုတ်​ဂှ် ကဵု​ကၠောံ​အာ​ပ္ဍဲ​လ္ပာ်​ညး​တံ​ဂှ်​ရ။