သၠ​ပတ်​ပ​ထ​မ​ကဝ် ၁၈

၁ကျာ်​ထာ​ဝ​ရ​ဝွံ ဇ​ရေၚ်​ဂြိုပ်​ကြောတ်​မာမ်​ရေ၊ ဒ​တိတ်​ဒ​ဒှ်​မ​ထ​ၜး​ဇ​ကု​ကဵု​အာ​ဗြ​ဟာမ်​မ္ဂး​ဂှ်၊ ပ္ဍဲ​အ​ခိၚ်​တ္ၚဲ​က္တဴ အာ​ဗြ​ဟာမ်​ဝွံ ဂ​ဇံ​ဒၟံၚ်​ပ္ဍဲ​ပါၚ်​တ​ရၚ်​တာဲ​မ္ဂး ၂ရံၚ်​လၟဳ​တုဲ ပ္ဍဲ​ဂ​တ​ဇ​ကု၊ မၞိဟ်​ပိ​တ​လ​ဒ​တဴ​ဒၟံၚ်​အိုတ်​ဂှ် ကာ​လ​မ​ညာတ်၊ ညံၚ်​ဂွံ​ဝါၚ်​ဒုၚ်​တ​လုၚ်​ဂှ် ဒြေပ်​အာ​နူ​ပါၚ်​တ​ရၚ်​တာဲ​အောပ်​မာ​ဇံ​သဝ်​မ္ဂး၊ ၃နာဲ​အဲ​ဍိက်​၊ ယဝ်​ရ​အဲ​ဍိက်​မ​ဂွံ​မုက်​ဂ​တ​တဳ​လ​အဲ​မ္ဂး၊ လ္ပ​လောန်​အာ​နူ​ဍိက်​တဳ​လ​ပိုန်​ညိ။ ၄ကဵု​ဂွံ​ကေတ်​နၚ်​ဍာ်​အောန်​အောန်​ညိ။ ကြာတ်​ဇိုၚ်​တုဲ ပ္ဍဲ​အ​သၟဝ်​တၞံ​ဆု​ဂှ် ဒ​လာဲ​ဒၟံၚ်​အိုတ်​ညိ။ ၅ကွာၚ်​အောန်​အောန်​လေ အဲ​ကေတ်​နၚ်​ရောၚ်။ ကာ​လ​ဍောၚ်​ပြေ​ဂှ် အာ​အိုတ်​ညိ​ရ။ တၞဟ်​န​သၟိက်​ကဵု ဒုၚ်​ဂုန်​သာ်​ဂှ် တဳ​လ​ပိုန်​တံ​စိုပ်​ကၠုၚ် ပ္ဍဲ​ဒ​မံၚ်​ဍိက်​တ​လ​အဲ​မ​နွံ​ဂှ်​ရ သာ်​ဝွံ မ​ဟီု​ရ။ တေံ​ညး​တံ​ဂှ်​လေ အ​တိုၚ်​မ​ဟီု​ဂှ် ပ​ညိ​ရ သာ်​ဝွံ ဟီု​အိုတ်​ရ။ ၆အာ​ဗြ​ဟာမ်​ဝွံ လုပ်​အာ​ဗွဲ​ပ​ရဟ်​ပ္ဍဲ​ဇ​ရေၚ်​သာ​ရာ​မ​နွံ​အ​ပ္ဍဲ​တာဲ​တုဲ၊ ပြု​ပြေၚ်​ခၞိက်​ကွာၚ်​ပိ​က​ရိဟ်​တုဲ ဆိုန်​ညိ။ ကၠောန်​ကွာၚ်​က​ဝေက်​ညိ သာ်​ဝွံ ဟီု​တဴ​ရ။ ၇မွဲ​ဝါ​ပၠန်၊ ဒြေပ်​အာပ်​ပ္ဍဲ​ဂၠဴ​ဒ​ကံ​တုဲ၊ ဂၠဴ​သၟတ်​မ​ၜတ်​ခိုဟ်​ဂှ် ကေတ်​နၚ်​တုဲ၊ ပ္အပ်​ကဵု​မၚ်​ဗၠာဲ​မ္ဂး ကဵု​ပြု​ပြေၚ်​ဗွဲ​ပ​ရဟ်​ရ။ ၈ကြဴ​ဂှ် ဍာ်​တှ်​ကဵု​ဍာ်​တှ်​ဗ္စး​ဂှ်​လေ​ကီု၊ ဂၠဴ​သၟတ်​မ​ပြု​ပြေၚ်​ဂှ်​လေ​ကီု​ကေတ်​တုဲ၊ စုတ်​ပ္ဍဲ​ဂ​တ​ညး​တံ​ဂှ်​မ္ဂး၊ အ​သၟဝ်​တံ​ဆု​ပ္ဍဲ​ဇ​ရေၚ်​ညး​တံ​ဝွံ စ​အိုတ်​ရ။ ၉ကာ​လ​မ​တုဲ​ဂှ်၊ သ​မ္ဘာ​မၞး​သာ​ရာ​ဝွံ မူ​ဒၞာဲ​မ​နွံ​ရော သာ်​ဝွံ သၟာန်​မ္ဂး နွံ​အ​ပ္ဍဲ​တာဲ​ရ သာ်​ဝွံ က​လေၚ်​ဟီု​ရ။ ၁၀ပ္ဍဲ​ညး​တံ​ဂှ် ညး​မွဲ​ဂှ်​လေ၊ ကာ​လ​အ​ခိၚ်​မ​သၠး​ဂ​ဗ္ဘ​မ​ပေၚ်​ဂှ် အဲ​ဝွံ က​လေၚ်​ကၠုၚ် ပ္ဍဲ​ဇ​ရေၚ်​မၞး​သ္ဍာံ​ရောၚ်။ ကာ​လ​ဂှ် သ​မ္ဘာ​မၞး​သာ​ရာ​ဝွံ ဂွံ​ကောန်​တြုံ​ရောၚ် သာ်​ဝွံ ဟီု​ဂး​ရ။

၁၁လက်​က​ရဴ​ညး​မ​ဟီု​သာ်​ဂှ်၊ ပ္ဍဲ​ဇ​ရေၚ်​ပါၚ်​တ​ရၚ်​ဂှ်၊ ဟိုတ်​သာ​ရာ​မ​နွံ​ဂှ် တေံ​အ​ရေဝ်​ဂှ် မိၚ်​ရ။ ပ္ဍဲ​ကာ​လ​ဂှ် အ​ယုက်​အာ​ဗြ​ဟာမ်​ကဵု​သာ​ရာ​ဇၞော်​ဗွဲ​မ​လောန်​ရ။ သာ​ရာ​ဝွံ အ​တိုၚ်​မ​ဒှ်​ပ္ဍဲ​မၞိဟ်​ဗြဴ​တံ​ဂှ် ဟွံ​ဒှ်​ရ။ ၁၂ဟိုတ်​ဂှ်​ရ သာ​ရာ​ဝွံ၊ အဲ​လေ ဗျု၊ နာဲ​အဲ​လေ ဗျု​ရ။ ဒှ်​သာ်​ဂှ်​တုဲ အဲ​ဝွံ ဂွံ​နွံ​သ္ဍိုက်​စိုတ်​ရောၚ်​ဟာ သာ်​ဝွံ ဟီု​မ္ဂး၊ ဂြိုၚ်​ဗွဲ​မ​သ္ၚိတ်​ဇြ​ရ။ ၁၃သ​မ္ဘာ​မၞး​သာ​ရာ​ဝွံ ကွေံ​ရ​အဲ​ဗျု​ရ။ သၠး​ဂ​ဗ္ဘ​ကောန်​တြုံ​ရောၚ်​ဟာ သာ်​ဝွံ ဟီု​တုဲ မူ​ဟိုတ်​ဂြိုၚ်​ရော။ ၁၄အ​ရာ​ကျာ်​ထာ​ဝ​ရ​ပ​ဟွံ​မာန်​ဂှ် ဆ​ဗၞတ်​မွဲ​မွဲ​နွံ​ဟာ။ အ​ခိၚ်​သၠး​ဂ​ဗ္ဘ​မ​သ​မောဲ​လဝ်​ကာ​လ​မ​ပေၚ်​ဂှ် အဲ​က​လေၚ်​ကၠုၚ်​ပ္ဍဲ​ဇ​ရေၚ်​မၞး​တုဲ၊ သာ​ရာ​ဝွံ ဂွံ​ကောန်​တြုံ​ရောၚ် သာ်​ဝွံ ကျာ်​ထာ​ဝ​ရ​ဟီု​ပၟိၚ်​ကဵု အာ​ဗြ​ဟာမ်​ရ။ ၁၅သာ​ရာ​ဂှ်​လေ အဲ​ဍိက်​ဗြဴ​ဟွံ​ဂြိုၚ် သာ်​ဝွံ ဖေက်​တုဲ၊ စး​ဂ​လာန်​ရ။ ဟွံ​သေၚ်။ မၞး​ဂြိုၚ်​ရ သာ်​ဝွံ ဟီု​ပၟိၚ်​ရ။

၁၆တေံ​ညး​တံ​ဝွံ က္တဵု​နူ​ကဵု​ဒေ​သ​ဂှ်​တုဲ၊ ဂ​တ​အာ​မတ်​ကဵု​ဍုၚ်​သောဝ်​ဍောမ်​မ္ဂး အာ​အိုတ်​ရ။ အာ​ဗြ​ဟာမ်​ဂှ်​လေ တၞဟ်​န​သၟိက်​ပ​လံၚ်​ဏာ​ညး​တံ​ဂှ် ဗက်​ရ။ ၁၇ကျာ်​ထာ​ဝ​ရ​ဂှ်​လေ၊ ပွ​အဲ​မ​ပ​ဂှ် ဟွံ​တ​မော်​ထ​ၜး​ကဵု​အာ​ဗြ​ဟာမ်​မ္ဂး၊ ဒး​ပၞုက်​လဝ်​ဟာ။ ၁၈အာ​ဗြ​ဟာမ်​ဝွံ ဇၞော်​ပြဲ​တုဲ ဒှ်​ဂ​ကူ​မၞိဟ်​ဍိုက်​ပေၚ်​ကဵု​ဣ​ဓိ​ရောၚ်။ ဂ​ကူ​မၞိဟ်​အိုတ်​သီု​တံ​ဝွံ န​ကဵု​ညး​ဂွံ​ဒုၚ်​မ္ၚဵု​မၚ်္ဂ​လ​အိုတ်​ရောၚ်။ ၁၉ဒ​တိတ်​ဒ​ဒှ်​မ္ဂး​ဂှ်၊ မ​ဒှ်​ကၠုၚ်​လက်​က​ရဴ​ညး​ပ္ဍဲ​ကောန်​ဂ​မၠိုၚ်၊ ကောန်​သ္ၚိ​ညး​ဂ​မၠိုၚ်​တံ​ဂှ် ဒ​ဒှ်​ညး​မ​ပ​ညပ်​လဝ်​ရောၚ်​ဂှ် အဲ​တီ​ရ။ ညး​တံ​ဂှ်​လေ ဗက်​ပ္ဍဲ​ဂၠံၚ်​ဓဝ်​ကျာ်​ထာ​ဝ​ရ​တုဲ၊ ဒ္ဂေတ်​ဗွဲ​သ္ဍာံ​သၟတ်​သ္တပ်​လ​ဂူ​အိုတ်​ရောၚ်။ ဒှ်​သာ်​ဂှ်​တုဲ၊ အ​တိုၚ်​ဂ​တိ​ကျာ်​မ​နွံ​ဂှ် အ​ခေါၚ်​ကျာ်​ဂ​မျိုၚ်​မ​ဂွံ​ပ​ပ္ဍဲ​အာ​ဗြ​ဟာမ်​နွံ​ရောၚ် သာ်​ဝွံ က​သပ်​တဳ​လ​ပိုန်​မ​နွံ​ရ။ ၂၀မွဲ​ဝါ​ပၠန်​ကျာ်​ထာ​ဝ​ရ​ဝွံ ရ​မျှာၚ်​မ​လ​ရိုအ်​ဂ​တေဝ်​ပ္ဍဲ​ဍုၚ်​ဂေါဝ်​မောဝ်​ရ​ဝွံ ဇၞော်​တုဲ၊ ဟိုတ်​ဒုဟ်​မ​ဇြိုၚ်​ဗွဲ​မ​လောန်​ဂှ်၊ ၂၁လၟုဟ်​အဲ​အာ​တုဲ၊ အ​တိုၚ်​ဒ​ဒှ်​မ​လ​ရိုအ်​ဂ​တေဝ်​မ​စိုပ်​ကၠုၚ်​ဂ​တ​အဲ​ဂှ်၊ ညး​တံ​ဝွံ ပ​ကွေံ​ကီု၊ ဟွံ​ပ​ကီု​ဂှ် အဲ​ရံၚ်​မွဲ​ရောၚ်။ ဟွံ​ပ​မ္ဂး ဒ​ဒှ်​ဟွံ​ဟွံ​ပ​ဂှ် အဲ​တီ​ရောၚ် သာ်​ဝွံ ဟီု​ပၟိၚ်​ရ။ ၂၂တေံ​ညး​ဝွံ ဂ​တး​မုက်​နူ​ဒေ​သ​တေံ​ဂှ်​တုဲ၊ အာ​ပ္ဍဲ​ဍုၚ်​သောဝ်​ဍောမ်​အိုတ်​ရ။ အာ​ဗြ​ဟာမ်​မ္ဂး​ဂှ် ပ္ဍဲ​ဂ​တ​ကျာ်​ထာ​ဝ​ရ​ဂှ် ဒ​တဴ​ဒၟံၚ်​ဏီ​ရ။

၂၃ပ္ဍဲ​ကာ​လ​ဂှ် အာ​ဗြ​ဟာမ်​သြပ်​ဖ​ဍပ်​တုဲ၊ တဳ​လ​ပိုန်​ဝွံ သၟဟ်​ကဵု​ညး​ဟွံ​ဓဝ်​သၟတ်​တံ​မွဲ​စွံ​ပ​လီု​ပ​လာ်​ညး​မ​သ္တပ်​လ္ဂူ​တံ​ဂှ်​ရောၚ်​ဟာ။ ၂၄ပ္ဍဲ​ဍုၚ်​တေံ​ဂှ် ညး​မ​သ္တပ်​လ္ဂူ​နွံ​မ​သုန်​စှ်ော​မ္ဂး၊ ပ​လီု​ပ​လာ်​ရောၚ်​ဟာ။ ဍုၚ်​မ​နွံ​ကဵု​ညး​မ​သ္တပ်​လ္ဂူ​နွံ​မ​သုန်​စှ်ော​မ္ဂး ပ​လီု​ပ​လာ်​ရောၚ်​ဟာ။ ၂၅ပ​သာ်​ဂှ်​တုဲ အ​မှု​မ​ကော်​မှေတ်​ညး​မ​သ္တပ်​လ္ဂူ​တံ​တုပ်​သၟတ်​ကဵု​ညး​ဓဝ်​သၟတ်​တံ​မွဲ​စွံ​ဂှ် ကဵု​သ္ၚဲ​နူ​တဳ​လ​ပိုန်​ရောၚ်။ နာဲ​မ​စဳ​ရေၚ်​မွဲ​ဂၠး​တိ​ဇၞော်​ဝွံ ဗ​ဗွဲ​ဓဝ် ဟွံ​သေၚ်​ဟာ သာ်​ဝွံ ဟီု​ပ္တီ​ရ။ ၂၆ကျာ်​ထာ​ဝ​ရ​ဂှ်​လေ ပ္ဍဲ​ဍုၚ်​သောဝ်​ဍောမ်​ညး​မ​သ္တပ်​လ္ဂူ​မ​သုန်​စှ်ော​ဂှ် အဲ​ဆဵု​မ္ဂး၊ အ​ကွက်​ညး​တံ​ဂှ် အ​လုံ​မွဲ​ဒေ​သ​ဂှ် အဲ​ဂိုဟ်​ရောၚ် သာ်​ဝွံ ဟီု​ပၟိၚ်​ရ။ ၂၇မွဲ​ဝါ​ပၠန်​အာ​ဗြ​ဟာမ်​ဝွံ အဲ​ဍိက်​ဝွံ​ခ​နိက်​တိ​ကဵု​ပ္တေၚ်​သက်​သက်​ၜိုန်​ဒှ်​ကီု၊ လၟုဟ်​ဝွံ ဟီု​ပ္တီ​ကဵု​ကျာ်​နာဲ​အဲ​ရောၚ် သာ်​ဝွံ ပ္တိတ်​ဒြ​ဟတ်​ရ။ ၂၈ပ္ဍဲ​မၞိဟ်​မ​သ္တပ်​လ္ဂူ​မ​သုန်​စှ်ော​ဂှ် မ​သုန်​ဟွံ​ပေၚ်​ယဝ်​ရ​သ​ဒှ်၊ ဟိုတ်​ညး​မ​သုန်​ဂှ် ဟွံ​ပေၚ် တဳ​လ​ပိုန်​ပ​လီု​ပ​လာ်​အ​လုံ​မွဲ​ဍုၚ်​ဂှ်​ဟာ သာ်​ဝွံ က​လေၚ်​သၟာန်​ပ္တီ​မ္ဂး၊ ပ္ဍဲ​ဍုၚ်​ဂှ် အဲ​ဆဵု​ပန်​ဣ​သုန်​ယဝ်​ရ​သ​ဒှ်​အဲ​ဟွံ​ပ​လီု​ပ​လာ်​ရ သာ်​ဝွံ ဟီု​ပၟိၚ်​ရ။ ၂၉ပ္ဍဲ​မွဲ​ဝါ​ပၠန်၊ ပ္ဍဲ​ဍုၚ်​ဂှ် ဆဵု​ပန်​စှ်ော​ဟွံ​တီ သာ်​ဝွံ က​လေၚ်​ဟီု​ပ္တီ​တုဲ၊ အ​ကွက်​ပန်​စှ်ော​ဂှ် အဲ​ဟွံ​ပ​တုဲ မံၚ်​ရောၚ် သာ်​ဝွံ ဟီု​ပၟိၚ်​ရ။ ၃၀ပ္ဍဲ​မွဲ​ဝါ​ပၠန်၊ အဵု​နာဲ​ကျာ်​အဲ​တဳ​လ​ပိုန်​လ္ပ​နွံ​စိုတ်​ညိ။ ကဵု​အဲ​ဍိက်​ဂွံ​ပ္တီ​ညိ။ ပ္ဍဲ​ဍုၚ်​ဂှ် ဆဵု​ပိ​စှ်ော​ဟွံ​တီ သာ်​ဝွံ က​လေၚ်​ဟီု​ပ္တီ​တုဲ၊ ပ္ဍဲ​ဍုၚ်​ဂှ် အဲ​ဆဵု​ပိ​စှ်ော​မ္ဂး၊ အဲ​ဟွံ​ပ သာ်​ဝွံ ဟီု​ပၟိၚ်​ရ။ ၃၁ပ္ဍဲ​မွဲ​ဝါ​ပၠန် အဲ​ဍိက်​ဝွံ လၟုဟ်​ပ္တီ​ကျာ်​ထာ​ဝ​ရ ရောၚ် သာ်​ဝွံ ပ္တိတ်​ဒြ​ဟတ်​ရ။ ပ္ဍဲ​ဍုၚ်​ဂှ် ဆဵု​ညး​ၜါ​စှ်ော​ရောၚ် ဟွံ​တီ သာ်​ဝွံ ဟီု​ပ္တီ​ပၠန်​မ္ဂး၊ အ​ကွက်​ၜါ​စှ်ော​အဲ​ဟွံ ပ​လီု​ပ​လာ် မံၚ်​ရောၚ် သာ်​ဝွံ ဟီု​ပၟိၚ်​ရ။ ၃၂အဵု​နာဲ​ကျာ်​အဲ၊ တဳ​လ​ဂုန်​လ္ပ​နွံ​စိုတ်​ညိ။ လၟုဟ်​မွဲ​ဝါ​ကဵု​အဲ​ဍိက်​ဂွံ​ပ္တီ​ညိ။ ပ္ဍဲ​ဍုၚ်​ဂှ် ဆဵု​ညး​စှ်​ဟွံ​တီ သာ်​ဝွံ ဟီု​ပ္တီ​တုဲ အ​ကွက်​မၞိဟ်​စှ်​အဲ​ဟွံ​ပ​လီု​ပ​လာ်​မံၚ်​ရ သာ်​ဝွံ ဟီု​ပၟိၚ်​ရ။ ၃၃ကျာ်​ထာ​ဝ​ရ​ဝွံ အ​မှု​ဆက်​ပါၚ်​ကဵု​အာ​ဗြ​ဟာမ်​ဂှ် ပ​တုဲ၊ က္ည​အာ​တဴ​ရ။ အာ​ဗြ​ဟာမ်​ဝွံ​လေ က​လေၚ်​အာ​ပ္ဍဲ​ဒေ​သ​ဇ​ကု​မ​မံၚ်​ရ။