သၠ​ပတ်​ပ​ထ​မ​ကဝ် ၃၀

၁ရာ​ခေ​လ​ဝွံ ဒ​ဒှ်​ဟွံ​သၠး​ကောန်​ကဵု​ယျာ​ကောပ်​ကာ​လ​မ​တီ​ညာတ်​ဂှ်၊ စောန်​စိုတ်​ကဵု​ၝဲ​ညး​တုဲ ကဵု​ကောန်​ကဵု​အဲ​ညိ။ ဟွံ​ဒှ်​သာ်​ဂှ်​မ္ဂး၊ အဲ​ချိုတ်​ရောၚ် သာ်​ဝွံ ဟီု​ကဵု​ယျာ​ကောပ်​ရ။ ၂ယျာ​ကောပ်​ဂှ်​လေ အဲ​ဝွံ ဒှ်​အ​ဇာ​ကျာ်​ဂ​မျိုၚ်​ဟွံ​ကဵု​အ​ခေါၚ်​သၠး​ဂ​ဗ္ဘ​ကဵု​မၞး​ဟာ သာ်​ဝွံ ဒေါ​သ​တိတ် တုဲ က​လေၚ်​ဟီု​ကဵု​ရာ​ခေ​လ​ရ။ ၃ရာ​ခေ​လ​ဂှ်​လေ ပ္ဍဲ​အဲ​ဍိက်​ဗြဴ​ဂှ် ဍိက်​ဗြဴ​မ​နွံ​ယၟု​ၜိ​လ​ဟာ​မ​နွံ​ရ။ လုပ်​ပ္ဍဲ​ဇ​ရေၚ်​ညး​ညိ။ ညး​ဝွံ သၠး​ဂ​ဗ္ဘ​လ​တူ​က္ၜံၚ်​အဲ​ဍိက်​ဗြဴ​တုဲ၊ န​ကဵု​ညး​ဒ​ဒှ်​မ​ဒက်​ပ္တန်​အဲ​ဍိက်​ဗြဴ​ဂှ် နွံ​ရောၚ် သာ်​ဝွံ ဟီု​မ္ဂး၊ ၄ဍိက်​ဗြဴ​ၜိ​လ​ဟာ​ဂှ် တၞံ​န​သၟိက်​ကဵု​ဒှ်​သ​မ္ဘာ​ယျာ​ကောပ်​ဂှ် ပ္အပ်​တုဲ၊ ယျာ​ကောပ်​လုပ်​အာ​ပ္ဍဲ​ဇ​ရေၚ်​ညး​ရ။ ၅ၜိ​လ​ဟာ​ဝွံ ကေတ်​ပ​တိ​သ​န္ဓိ​တုဲ သၠး​ဂ​ဗ္ဘ​ကောန်​တြုံ​ကဵု​ယျာ​ကောပ်​ရ။ ၆ကာ​လ​ဂှ် ရာ​ခေ​လ​ဂှ်​လေ ကျာ်​ဂ​မျိုၚ်ဝွံ စဳ​ရေၚ်​သၞောဝ်​လ္ပာ်​အဲ​တုဲ​ရ။ က​လၚ်ဂ​လာန်​အဲ​တုဲ ကောန်​တြုံ​ဂှ် ဇိုန်​ကဵု​အဲ​တုဲ​ရ သာ်​ဝွံ အ​တိုၚ်​မ​ဟီု​ဂှ်၊ တေံ​ကောန်​ဂှ် န​ကဵု​ယၟု​ဍာန်​ကော်​ခဴ​ရ။ ၇ဍိက်​ဗြဴ​ရာ​ခေ​လ​ဝွံ ကေတ်​ပ​တိ​သ​န္ဓိ မွဲ​ဝါ​ပၠန်​တုဲ ကာ​လ​မ​သၠး​ဂ​ဗ္ဘ​ကောန်​ဒု​တိ​ယ​ပ္ဍဲ​ယျာ​ကောပ်​ဂှ်၊ ၈ရာ​ခေ​လ​ဝွံ အဲ​တ္ၜန်​တ္ၜောဲ​ကဵု​ၝဲ​အဲ​ဗွဲ​မ​လောန်​ဂှ်​ဒှ်​တုဲ အဲ​မာန်​ကၠုၚ်​တုဲ​ရ သာ်​ဝွံ ဟီု​တုဲ၊ တေံ​ကောန်​ဂှ် န​ကဵု​ယၟု​နာ​ပ္တ​လိ​ဂှ် ကော်​ခဴ​ရ။ ၉လေ​အာ​ဝွံ ကောန်​ပိုတ်​တုဲ ဒ​ဒှ်​ဟွံ​သၠး​ဂ​ဗ္ဘ​ဂှ် ကာ​လ​ဇ​ကု​မ​တီ​ညာတ်​ဂှ်၊ ကေတ်​ဍိက်​ဗြဴ​ညး​ဇိ​လ​ပ​ဂှ်​တုဲ တၞံ​န​သၟိက်​ကဵု​ဒှ်​သ​မ္ဘာ​ယျာ​ကောပ်​ဂှ် ပ္အပ်​ကဵု​ရ။ ၁၀ဍိက်​ဗြဴ​လေ​အာ​ဇိ​လ​ပ​ဝွံ​လေ ကာ​လ​မ​သၠး​ဂ​ဗ္ဘ​ကောန်​တြုံ​ကဵု​ယျာ​ကောပ်​ဂှ်၊ ၁၁လေ​အာ​ဂှ်​လေ ဖဵု​မၚ်္ဂ​လ​ဒှ်​ကၠုၚ်​ရ သာ်​ဝွံ ဟီု​တုဲ တေံ​ကောန်​ဂှ် န​ကဵု​ယၟု​ဂါတ်​ကော်​ခဴ​ရ။ ၁၂ဍိက်​ဗြဴ​လေ​အာ​ဇိ​လ​ပ​ဝွံ ကာ​လ​မ​သၠး​ဂ​ဗ္ဘ​ကောန်​တြုံ​ဒု​တိ​ယ​ကဵု​ယျာ​ကောပ်​မွဲ​ဝါ​ပၠန်​ဂှ်၊ ၁၃လေ​အာ​ဝွံ ပ္ဍဲ​အဲ​မၚ်္ဂ​လ​နွံ​ရ။ ကောန်​ဗြဴ​မၞိဟ်​တံ​ဝွံ ညး​မ​နွံ​ကဵု​မၚ်္ဂ​လ​ကော်​အဲ​အိုတ်​ရောၚ် သာ်​ဝွံ ဟီု​မ္ဂး၊ တေံ​ကောန်​ဂှ် န​ကဵု​ယၟု​အာ​သှာ​ကော်​ခဴ​ရ။

၁၄ကြဴ​ဂှ် ပ္ဍဲ​အ​ခိၚ်​မ​သီ​ပ​ကောံ​သြောံ​ဂျုၚ်​ဂှ်၊ ရု​ၜေန်​ဝွံ တိတ်​အာ​ပ္ဍဲ​ဝါ​ဗ္ၚ​တုဲ​မ္ဂး ဆဵု​သတ်​ဂ​အုဲ​ရာဲ​သဳ​ကေတ်​နၚ် ပ္ဍဲ​ဇ​ရေၚ်​မိ​ဇ​ကု​လေ​အာ​ရ။ ရာ​ခေ​လ​ဂှ်​လေ သတ်​ဂ​အုဲ​ရာဲ​သဳ​ကောန်​မၞး​မ​ဂွံ​နၚ်​လ္ၚဵု​ဂှ် ကဵု​အဲ​ညိ သာ်​ဝွံ အာတ်​ပ္ဍဲ​လေ​အာ​မ္ဂး၊ ၁၅လေ​အာ​ဂှ်​လေ မၞး​ဝွံ ကေတ်​တြုံ​အဲ​တုဲ အ​ကွက်​ဟွံ​မွဲ​သၠေဟ်​ဟာ။ သတ်​ဂ​အုဲ​ရာဲ​သဳ​ကောန်​အဲ​ဂှ် သၟိက်​ဂွံ​ကေတ်​ဏီ​သွံ သာ်​ဝွံ ဟီု​တုဲ၊ ရာ​ခေ​လ​ဂှ်​လေ ဒှ်​သာ်​ဂှ်​မ္ဂး အ​ကွက်​သတ်​ဂ​အုဲ​ရာဲ​သဳ​ကောန်​မၞး​ပ္ဍဲ​ဗ္တံ​ဝွံ တြုံ​ဒး​တိက်​မွဲ​စွံ​ကဵု​မၞး​ရောၚ် သာ်​ဝွံ ဟီု​ရ။ ၁၆ပ္ဍဲ​ပ​ယာံ​သၟဝ်​တ္ၚဲ​ဂှ် ကာ​လ​ယျာ​ကောပ်​မ​ကၠုၚ်​နူ​ဝါ​ဂှ်၊ လေ​အာ​ဝွံ တိတ်​ဝါၚ်​ဒုၚ်​တၠုၚ်​ညး​တုဲ၊ မၞး​ဝွံ ဒး​လုပ်​ပ္ဍဲ​ဇ​ရေၚ်​အဲ​ဍိက်​ဗြဴ​ရောၚ်။ န​ကဵု​သတ်​ဂ​အုဲ​ရာဲ​သဳ​ကောန်​အဲ​ဍိက်​ဗြဴ​မ​ဂွံ​နၚ်​ဂှ် အဲ​ဍိက်​ဗြဴ​လိၚ်​မၞး​သ္ဍာံ​ရ သာ်​ဝွံ ဟီု​မ္ဂး၊ ပ္ဍဲ​ဗ္တံ​ဂှ် ဂွံ​တိက်​ကဵု​ညး​မွဲ​စွံ​ရ။ ၁၇ကျာ်​ဂ​မျိုၚ်​က​လၚ်​ဂ​လာန်​လေ​အာ​မ္ဂး၊ ညး​ဝွံ ကေတ်​ပ​တိ​သ​န္ဓိ​တုဲ ပ္ဍဲ​ယျာ​ကောပ်​ဂှ် ကောန်​ပ​ဉ္စ​မ​ဂှ် သၠး​ဂ​ဗ္ဘ​ရ။ ၁၈ဟိုတ်​အဲ​မ​ကဵု​ဍိက်​ဗြဴ​အဲ​ကဵု​တြုံ​အဲ​ဂှ် ကျာ်​ဂ​မျိုၚ်​ဂှ် ကဵု​လိၚ်​ကဵု​အဲ​တုဲ​ရ သာ်​ဝွံ ဟီု​တုဲ၊ တေံ​ကောန်​ဝွံ န​ကဵု​ယၟု​ဣ​သ​ခါ​ဂှ် ကော်​ခဴ​ရ။ ၁၉လေ​အာ​ဝွံ ကေတ်​ပ​တိ​သ​န္ဓိ​မွဲ​ဝါ​ပၠန်​တုဲ သၠး​ဂ​ဗ္ဘ​ကောန်​ဆ​ဌ​မ​ကဵု​ယျာ​ကောပ်​ရ။ ၂၀ကျာ်​ဂ​မျိုၚ်​ဝွံ လာပ်​ခိုဟ်​ဂှ် ကဵု​ပ္ဍဲ​အဲ​တုဲ​ရ။ ဟိုတ်​အဲ​မ​သၠး​ဂ​ဗ္ဘ​ကောန်​တ​ရဴ ဇ​ကု​ကဵု​တြုံ​အဲ​ဂှ်၊ လၟုဟ်​မွဲ​စွံ​ကဵု​အဲ​မၚ်​ဗိုန်​ရောၚ် သာ်​ဝွံ ဟီု​တုဲ၊ တေံ​ကောန်​ဝွံ န​ကဵု​ယၟု​ဇာ​ၜု​လုန်​ဂှ် ကော်​ခဴ​ရ။ ၂၁ကြဴ​ဂှ် သၠး​ဂ​ဗ္ဘ​ကောန်​ဗြဴ​တုဲ န​ကဵု​ယၟု​ဍိ​ဏ​ဂှ် ကော်​ခဴ​ရ။

၂၂တေံ​ကာ​လ​ဂှ် ကျာ်​ဂ​မျိုၚ်​ဝွံ ဗှ်​သၞာ​ရာ​ခေ​လ​တဴ​ရ။ က​လၚ်​ဂ​လာန်​ညး​တုဲ အ​ခေါၚ်​သၠး​ကောန်​ဂှ် ကဵု​တဴ​ရ။ ၂၃ညး​ဝွံ ကေတ်​ပ​တိ​သ​န္ဓိ​တုဲ သၠး​ကောန်​တြုံ​မ္ဂး ဒ​ဒှ်​အဲ​မ​ဒး​ဒုၚ်​စော​ဒ​နာ​ဂှ် ကျာ်​ဂ​မျိုၚ်​ပါဲ​ထောံ​တုဲ​ရ သာ်​ဝွံ​ဂှ်​လေ​ကီု၊ ၂၄ကျာ်​ထာ​ဝ​ရ​ဝွံ ကဵု​ဂွံ​ထပ်​ကဵု​ကောန်​တြုံ​တၞဟ်​ဟ်​ဂှ်​ညိ သာ်​ဝွံ​ဂှ်​လေ​ကီု​ဟီု​မ္ဂး တေံ​ကောန်​ဝွံ​ဂှ် ယဝ်​သေပ်​မ​ခုတ်​ယၟု​ရ။

၂၅ရာ​ခေ​လ​မ​သၠး​ဂ​ဗ္ဘ​ယဝ်​သေပ်​ဂှ်​တုဲ ယျာ​ကောပ်​ဝွံ၊ ညံၚ်​အဲ​ဍိက်​ဂွံ​အာ​ပ္ဍဲ​ဒ​မံၚ်​ဒေ​သ​ရး​ဇ​ကု​ဂှ် ဗ​လး​ဏာ​အဲ​ဍိက်​ညိ။ ၂၆အဲ​ဍိက်​ဝွံ ဒုၚ်​စ​ကာ​တုဲ သ​မ္ဘာ​ကဵု​ကောန်​အဲ​မ​ဂွံ​တံ​ဂှ် ကေတ်​တုဲ ကဵု​အ​ခေါၚ်​အာ​ညိ။ ဒ​ဒှ်​အဲ​ဍိက်​မ​ဒုၚ်​စ​ကာ​ဂှ် မ​တီ​ရ သာ်​ဝွံ ဟီု​ကဵု​လာ​ၜါန်​မ္ဂး၊ ၂၇လာ​ၜါန်​ဝွံ ကဵု​ဒး​ကဵု​စိုတ်​မၞး​ရ။ ကျာ်​ထာ​ဝ​ရ​ဟိုတ်​နူ​မၞး​ဂှ် မ​ကဵု​ပ​သေက်​ပ​သဝ်​ကဵု​အဲ​ဂှ် အဲ​ရိပ်​တီ​ရ။ ၂၈လိၚ်​အဲ​ဒး​ကဵု​ဂှ် ဟီု​ညိ၊ အဲ​ကဵု​ရောၚ် သာ်​ဝွံ ကာ​လ​မ​ဟီု​ဂှ် ၂၉အဲ​ဍိက်​ဝွံ ပ​သာ်​မ​ဒုၚ်​စ​ကာ​ပ္ဍဲ​မ​ဂှ်​လေ​ကီု၊ တိ​ရ​စ္ဆာန်​မ​တံ​ဝွံ ပ​သာ်​မ​နွံ​ဒၟံၚ်​ပ္ဍဲ​အဲ​ဍိက်​ဂှ်​လေ မ​တီ​ရ။ ၃၀ကၠာ​ဂှ် ဒြပ်​မ​အောန်​ကွေံ​ရ။ လၟုဟ်​ဝွံ တော​တက်​တုဲ ဂၠိုၚ်​တိုန်​ရ။ န​ကဵု​အဲ​ဍိက်​မ​အာ​ကၠုၚ်​ကၠောန်​ကဵု​ဂှ်၊ ကျာ်​ထာ​ဝ​ရ​ဝွံ ကဵု​ပ​သေက်​ပ​သဝ်​ပ္ဍဲ​မ​ရ။ လၟုဟ်​ဝွံ မူ​ပ​ယာံ​ကာ​လ​အဲ​ဍိက်​ဂွံ​ပြေၚ်​ဖျဳ​သ္ၚိ​ကၟိန်​ဇ​ကု​ရော သာ်​ဝွံ ဟီု​ရ။ ၃၁လာ​ၜါန်​ဂှ်​လေ မူ​လိၚ်​မ​ဒး​ကဵု​ရော သာ်​ဝွံ က​လေၚ်​သၟာန်​မ္ဂး၊ ယျာ​ကောပ်​ဝွံ လ္ပ​ကဵု​မွဲ​သာ်။ ယဝ်​ရ​သၟိက်​ဂွံ​ပ​ဂုန်​မွဲ​ပ္ဍဲ​အဲ​ဍိက်​ဂှ် ဒ​ကံ​သဵု၊ ဒ​ကံ​ဗ​ၜေံ​မ​ဂှ် အဲ​ဍိက်​မၚ်​ဗ္စ​မွဲ​ဝါ​ပၠန်​ရောၚ်။ ၃၂တ္ၚဲ​ဝွံ အ​လုံ​မွဲ​ဒ​ကံ​သဵု၊ ဒ​ကံ​ဗ​ၜေံ​ဂှ် အဲ​ဍိက်​အာ​တုဲ၊ ဗ​ၜေံ​စောန်​ပြံက်​ဂ​မၠိုၚ်၊ သဵု​လ္စံက်​ခ​ရီ​ဂ​မၠိုၚ်​ဆ​မ​နွံ​တံ​ဂှ် နုက်​ပ္တိတ်​ပါ်​စွံ​လဝ်​ရောၚ်။ ကြဴ​ဂှ် ဗ​ၜေံ​စောန်​ပြံက် သဵု​လ္စံက်​ခ​ရီ​တံ​ဝွံ ကဵု​ဒှ်​လိၚ်​အဲ​ဍိက်​ညိ။ ၃၃ဒှ်​သာ်​ဂှ်​တုဲ ပ္ဍဲ​ကာ​လ​ကြဴ​ဂှ်၊ ကာ​လ​လိၚ်​အဲ​ဍိက်​မ​စိုပ်​ပ္ဍဲ​ဂ​တ​မ​ဂှ်၊ ဒ​ဒှ်​အဲ​ဍိက်​မ​သ္တပ်​လ္ဂူ​ဝွံ မၚ်​မွဲ​အဲ​ဍိက်​ရောၚ်။ ဗ​ၜေံ​ဟွံ​စောန်​ပြံက်​သဵု​ဟွံ​လ္စံက်​ခ​ရီ​ဆ​မ​နွံ​တံ​ဂှ် အဲ​ဍိက်​မ​ကၠတ်​ဂှ် ကဵု​သ​မ္တီ​လဝ်​ညိ သာ်​ဝွံ ဟီု​ရ။ ၃၄လာ​ၜါန်​ဂှ်​လေ ဒှ်​အ​တိုၚ်​မၞး​ဟီု သာ်​ဝွံ ဒုၚ်​ပါၚ်​တုဲ။ ပ္ဍဲ​တ္ၚဲ​ဂှ်​ရ​ဗ​ၜေံ​စောန်​ပြံက်​ကၟက်​ဗ​ၜေံ​စောန်​ပြံက်​ၝောံ။ ၃၅ဗ​ၜေံ​မ​နွံ​သာ်​ဗု​ဆ​မ​နွံ​ကဵု​သဵု​မ​လ္စံက်​ခ​ရီ​ဆ​မ​နွံ​တံ​ဂှ် ရုဲ​တုဲ ပ္အပ်​ကဵု​ပ္ဍဲ​တ္ၚဲ​တဲ​ကောန်​ဇ​ကု​တံ​ဂှ်​ရ။ ၃၆ဒ​မံၚ်​ဒေ​သ​ယျာ​ကောပ်​မ​မံၚ်​ဂှ် တၞဟ်​န​သၟိက်​ကဵု​သ္ဍး​အာ​တ​ရဴ​ပိ​တ္ၚဲ​ဂှ် စဳ​ရေၚ်​ဏီ​ရ။ ယျာ​ကောပ်​ဝွံ သဵု​ဗ​ၜေံ​လာ​ၜါန်​မ​သိဟ်​ဂ​မၠိုၚ်​ဂှ် မၚ်​ဒၟံၚ်​ရ။

၃၇ကာ​လ​ဂှ် ယျာ​ကောပ်​ဝွံ​လေ ကၞာၚ်​တၞံ​လိ​ၜ​ဏာ၊ တၞံ​လု​ဇ၊ တၞံ​အာ​ရ​မောန်​ဂ​မၠိုၚ်​ဍေက်​ဍေက်​ဂှ် ကေတ်​တုဲ၊ သာ်​ဗု၊ သာ်​သ္ၚေက်​ညံၚ်​ဂွံ​မံက်​ဂှ် ရေက်​သံက်​ထောံ​ကၞၚ်​ကၞၚ်​တုဲ၊ ၃၈သဵု​ဗ​ၜေံ​ၝောံ​ကၟက်​မ​ကၠုၚ်​သုၚ်​ဍာ်​ညံၚ်​ဂွံ​ကဵု​ဖ္ဍိုက်​ဂ​ဝ​ဂှ် က္သပ်​နွံ​တုဲ၊ ကာ​လ​မ​ကၠုၚ်​သုၚ်​ဍာ်​ဂှ် လေံ​ဇဵု​မ​သံက်​ကၞောတ်​တံ​ဂှ် ပ္ဍဲ​မြံၚ်​သုၚ်​ဍာ်​ပ္ဍဲ​ဂၠုၚ်​သုၚ်​ဍာ်​ပ္ဍဲ​ဂ​တ​သဵု​ဗ​ၜေံ​တံ​ဂှ် တဵု​လဝ်​ရ။ ၃၉သဵု​ဗ​ၜေံ​တံ​ဝွံ ပ္ဍဲ​ဂ​တ​လေံ​ဇဵု​ဂ​မၠိုၚ်​ဂှ် ဖ္ဍိုက်​ဂ​ဝ​တုဲ စှ်ေ​ကောန်​အ​စောန်​အ​ပြံက်​အိုတ်​ရ။ ၄၀ယျာ​ကောပ်​ဝွံ သဵု​ဗ​ၜေံ​သၟတ်​တံ​ဂှ်​လေ ပါ်​လဝ်​တုဲ၊ ပ္ဍဲ​ဂ​တ​သတ်​ရုပ်​သာ်​မ​စောန်​ပြံက်၊ ရုပ်​သာ်​မ​လ​စံက်​နက်​ပ္ဍဲ​ဒ​ကံ​သဵု​ဒ​ကံ​ဗ​ၜေံ​ကဵု​ဂ​တ​မုက်​သတ်​ရ။ ဇ​ကု​ညး​ဂ​မၠိုၚ်​ကဵု​သတ်​လာ​ၜါန်​ဂ​မၠိုၚ်​ဂှ်​လေ ဟွံ​ကဵု​နှဴ​ရဴ၊ ညး​မွဲ​မွဲ​ဒ​ကံ​ပါ်​လဝ်​ရ။ ၄၁သတ်​မ​ဇၞော်​ကဵု​ဒြ​ဟတ်​တံ​ဝွံ ကာ​လ​မ​ဖ္ဍိုက်​ဂ​ဝ​ဂှ် တၞဟ်​န​သၟိက်​ကဵု​ဖ္ဍိုက်​ဂ​ဝ ပ္ဍဲ​လေံ​ဇဵု​တံ​ဂှ်၊ ယျာ​ကောပ်​ဝွံ ပ္ဍဲ​ဂ​တ​မုက်​ညး​တံ​ဂှ် ပ္ဍဲ​မြံၚ်​သုၚ်​ဍာ်​မ​လေပ်​စွံ​လဝ်​လေံ​ဇဵု​ဂ​မၠိုၚ်​ရ။ ၄၂ပ္ဍဲ​ဂ​တ​မုက်​သတ်​မ​အောန်​ကဵု​ဇြ​ဟတ်​တံ​ဂှ် လေံ​ဇဵု​ဂ​မၠိုၚ်​ဟွံ​ထ​ၜး​ဟွံ​စွံ​ရ။ ဟိုတ်​ဂှ်​ရ သတ်​မ​အောန်​ကဵု​ဒြ​ဟတ်​တံ​ဂှ် ဒှ်​ဒြပ်​လာ​ၜါန်​ရ။ သတ်​မ​ဇၞော်​ကဵု​ဇြ​ဟတ်​တံ​မ္ဂး​ဂှ် ဒှ်​အာ​ဒြပ်​ယျာ​ကောပ်​ရ။ ၄၃သာ်​ဂှ် ပ္ဍဲ​ယျာ​ကောပ်​ဒြပ်​က​သပ်​ဂၠိုၚ်​တိုန်​ဗွဲ​မ​လောန်​တုဲ၊ သဵု​ဗ​ၜေံ၊ ဍိက်​တြုံ​ဍိက်​ဗြဴ၊ အုတ်၊ မာဲ​နွံ​ဗွဲ​မ​ဂၠိုၚ်​အိုတ်​ရ။