သၠ​ပတ်​ပ​ထ​မ​ကဝ် ၄၄

၁ယဝ်​သေပ်​ဂှ်​လေ ကော်​ဇ​မၞော်​သ္ၚိ​ညး​တုဲ၊ ပ္ဍဲ​ရိုက်​ညး​တံ​ဂ​မၠိုၚ်​ဂှ် သ္ၚု​ဇွိုအ်​ဆ​ဗၞတ်​မ​ယိုက်​မာန်​ဂှ် စုတ်​ပေၚ်​ပေၚ်​ရ။ သြန်​မ​ဆေၚ်​ကဵု​ဇၟာပ်​ညး ပ္ဍဲ​ပါၚ်​ရိုက်​ဇ​ကု​တံ​ဂှ်​လေ​ကီု၊ ၂သီု​ကဵု​သြန်​ၚုဟ်​သြောံ သၠိုၚ်​သြန်​အဲ​ဂှ် ပ္ဍဲ​ပါၚ်​ရိုက်​ညး​ဍောတ်​အိုတ်​ဂှ်​လေ​ကီု​စုတ်​လဝ်​ရ သာ်​ဝွံ အ​တိုၚ်​မ​ဗ္ကန်​လဝ်​ဂှ် ဇ​မၞော်​သ္ၚိ​ပ​တဴ​ရ။ ၃နူ​ဂ​ယး​ကာ​လ​တ္ၚဲ​တ​မး​ဂှ် တေံ​ညး​တံ​ကဵု​မာဲ​ဂ​မၠိုၚ်​ဂှ် ဗ​လး​ဏာ​တဴ​ရ။ ၄စိုပ်​မ္ၚး​ဍုၚ်​တုဲ ကာ​လ​ဟွံ​သ္ၚဲ​ဏီ​ဂှ် ယဝ်​သေပ်​ဝွံ ကော်​ဇ​မၞော်​သ္ၚိ​ညး​တုဲ၊ ဗက်​အာ​ညး​တံ​ဗွဲ​ပ​ရဟ်​ရ။ ဂ​တာပ်​ညး​တံ​တုဲ မၞး​တံ​ဝွံ န​ကဵု ပွ​ဟွံ​ခိုဟ်​ဂှ် မူ​ဟိုတ်​ခၠေဝ်​ဂုန်​ညး​ရော။ ၅သၠိုၚ်​နာဲ​အဲ​မ​သုၚ်​ဟွံ​သေၚ်​ဟာ။ သၠိုၚ်​မ​လေပ်​ကဵု​ဒှ်​ညာန်​တၟေၚ်​တၟဟ်​ဟွံ​သေၚ်​ဟာ။ ပွ​မၞး​တံ​မ​ပ​ဂှ် ဟွံ​ခိုဟ်​ရ​သွံ သာ်​ဝွံ ဟီု​ရ သာ်​ဝွံ အ​တိုၚ်​မ​ဗ္ကန်​လဝ်​ဂှ်၊ ၆ဇ​မၞော်​သ္ၚိ​ဗက်​တုဲ ကာ​လ​မ​ဂ​တာပ်​ဂှ် ဟီု​တဴ​ရ။ ၇ညး​တံ​ဂှ်​လေ ဂ​လာန်​ဝွံ​ဂှ် မူ​ဟိုတ်​တ​လ​အဲ​ဟီု​ရော။ ပွ​သာ်​ဂှ် ကဵု​သ္ၚောဲ​နူ​ကဵု​ဍိက်​တ​လ​အဲ​တံ​ရောၚ်။ ၈သြန်​မ​ဆဵု​ဒး​ပ္ဍဲ​ပါၚ်​ရိုက်​ကၠာ​ဂှ် နူ​ကဵု​ရး​ခါ​နာန်​ကေတ်​နၚ် ပ္ဍဲ​ထာန်​တ​လ​အဲ​မွဲ​ဝါ​ပၠန်​ရ။ ဒှ်​သာ်​ဂှ်​တုဲ မူ​ဟိုတ်​ဒး​ကၠတ်​သြန်​ထဝ်​နူ​အ​ပ္ဍဲ​သ္ၚိ​နာဲ​တ​လ​အဲ​ရောၚ်​ရော။ ၉ပ္ဍဲ​ပိုဲ​ဍိက်​တ​လ​အဲ​တံ​ဂှ် ယြဴ​ပ္ဍဲ​ညး​မွဲ​ဆဵု​မ္ဂး။ တေံ​မၞိဟ်​ဂှ် ကဵု​ချိုတ်​ရ။ ပိုဲ​ဍိက်​တံ​ဂှ်​လေ ကဵု​ဒုၚ်​ဍိက်​တ​လ​အဲ​အိုတ် သာ်​ဝွံ ဟီု​အိုတ်​ရ။ ၁၀ဇ​မၞော်​သ္ၚိ​ဂှ်​လေ အ​တိုၚ်​ဂ​လာန်​မၞး​တံ​ဂှ် ကဵု​ဒှ်​ရ။ ၜိုန်​ဂှ်​လေ ယြဴ​ပ္ဍဲ​ညး​မွဲ​ဆဵု​မ္ဂး ကဵု​ဒှ်​ဍိက်​အဲ​ရ။ မၞး​တံ​မ္ဂး​ဂှ် ကဵု​ဗၠး​ဒုဟ်​အိုတ် သာ်​ဝွံ ဟီု​တုဲ။ ၁၁တေံ​ညး​အိုတ်​သီု​တံ​ဝွံ ရိုက်​ဇ​ကု​တံ​ဂ​မၠိုၚ် တၞဟ်​တၞဟ်​ဂှ် ဖျေံ​ပ္ဍဲ​တိ​တုဲ ပံက်​အိုတ်​ရ။ ၁၂ဇ​မၞော်​သ္ၚိ​ဂှ်​လေ မ​ပ္တံ​ကဵု​ညး​မ​ဇၞော်​ဒဵု​ကဵု​ညး​မ​ဍောတ်​ဂှ် ဂၠာဲ​တုဲ၊ ဆဵု​သၠိုၚ်​ပ္ဍဲ​ရိုက်​ၜေန်​ယာ​မိန်​ရ။ ၁၃ကာ​လ​ဂှ် ညး​တံ​ဝွံ ဂ​စာ်​ယာတ်​ဇ​ကု​တုဲ၊ ဇၟာပ်​ညး​ဖ​ဍိက်​မာဲ​ဇ​ကု​ပၠန်​မ္ဂး က​လေၚ်​အာ​ပ္ဍဲ​ဍုၚ်​အိုတ်​ရ။

၁၄ယု​ဍ​ကဵု​ကော​ဒေံ​ညး​တံ​ဝွံ စိုပ်​သ္ၚိ​ယဝ်​သေပ်​တုဲ၊ ညး​ဝွံ မ​နွံ​ပ္ဍဲ​သ္ၚိ​ဏီ​မ္ဂး၊ ပ္ဍဲ​ဂ​တ​ညး​အောပ်​မာ​ဇံ​သဝ်​ဒၟံၚ်​ရ။ ၁၅ယဝ်​သေပ်​ဂှ်​လေ မၞး​တံ​ဝွံ ပ​သာ်​မ​ပ​ရ​ရော။ မၞိဟ်​ညံၚ်​ကဵု​အဲ​ဂှ် ဒ​ဒှ်​ညာန်​တၟေၚ်​တၟဟ်​နွံ​ဂှ်၊ မၞး​တံ​ဟွံ​တီ​အိုတ်​ဟာ သာ်​ဝွံ ဟီု​ရ။ ၁၆ယု​ဍ​ဂှ်​လေ၊ ပိုဲ​ဍိက်​တံ​ဝွံ န​ကဵု​ဂ​လာန်​သာ်​လဵု​ဂွံ​ပ္တီ​တ​လ​အဲ​ရော။ ပ​သာ်​ဂွံ​ဟီု​ရော။ ဒုဟ်​အဲ​ဍိက်​တ​လ​အဲ​တံ​ဂှ် ကျာ်​ဂ​မျိုၚ်​စၟတ်​တုဲ ဆဵု​တုဲ​ရ။ ယြဴ​ပ္ဍဲ​ညး​မွဲ​ဂှ် ဆဵု​သၠိုၚ်​တ​လ​အဲ​ရ။ မ​ပ္တံ​ကဵု​ညး​တုဲ ပိုဲ​ဍိက်​တံ​ဆ​မ​နွံ​ကဵု ဒှ်​ဍိက်​တ​လ​အဲ​အိုတ်​ညိ သာ်​ဝွံ ဟီု​ပ္တီ​တုဲ။ ၁၇ယဝ်​သေပ်​ဝွံ သာ်​ဂှ် အဲ​ဟွံ​ပ။ ယြဴ​ပ္ဍဲ​ညး​မွဲ​ဂှ် ဆဵု​သၠိုၚ်​ရ၊ တေံ​ညး​ဝွံ ကဵု​ဒှ်​ဍိက်​အဲ​ရ။ မၞး​တံ​မ္ဂး​ဂှ်၊ ပ္ဍဲ​ဇ​ရေၚ်​မ​မၞး​တံ​အာ​သီု​မ​ၜိုဟ်​သြိုဟ်​အိုတ်​ရ။

၁၈ကာ​လ​ဂှ် ယု​ဍ​ဝွံ ပြာပ်​လုပ်​တုဲ၊ နာဲ​အဲ​ဍိက်၊ ဍိက်​တ​လ​အဲ​ဝွံ ဂ​လာန်​ဆ​ဗၞတ်​မွဲ​ပါၚ်​ဂှ် ကဵု​ဂွံ​ပ္တီ​ပ္ဍဲ​က္တောဝ်​တ​လ​အဲ​ညိ။ ပ္ဍဲ​ဍိက်​တ​လ​အဲ​ဂှ် ပၞောတ်​လ္ပ​ကဵု​တိတ်​ညိ။ တ​လ​အဲ​ဝွံ မ​ဒှ်​ညံၚ်​ကဵု​ဨ​က​ရာတ်​ဖာ​ရောဝ်​ရ။ ၁၉တ​လ​အဲ​ဝွံ ပ္ဍဲ​မၞး​တံ​မ​နွံ​ဟာ။ ဒေံ​နွံ​ဟာ သာ်​ဝွံ သၟာန်​ပိုဲ​ဍိက်​တံ​မ္ဂး၊ ၂၀ပိုဲ​ဍိက်​တံ​ဝွံ မ​ပိုဲ​ဍိက်​တံ​မၞိဟ်​အ​ယုက်​ဇၞော်​နွံ​ရ။ ကောန်​မ​ဂွံ​ဝါ​ရ​မ​ပိုဲ​အ​ယုက်​ဇၞော်​ဂှ် နွံ​မွဲ​ရ။ ကော​ညး​ချိုတ်​ရ။ ပ္ဍဲ​ကောန်​မိ​ညး​မ​သၠး​တံ​ဂှ် ဆ​ညး​မွဲ​တ​လ​မ​သိဟ်​ဒၟံၚ်​ရ။ ဟိုတ်​ဂှ်​ရ မ​ညး​မ​ဆာန်​ညး​ရ သာ်​ဝွံ ဟီု​ကဵု​တ​လ​အဲ​တုဲ၊ ၂၁တ​လ​အဲ​ဝွံ တေံ​ညး​ဂှ် ညံၚ်​အဲ ဂွံ​ရံၚ်​ကေတ်​နၚ်​ပ္ဍဲ​ထာန်​အဲ​အိုတ်​ညိ သာ်​ဝွံ ဟီု​ပၟိၚ်​ကဵု​ဍိက်​တ​လ​အဲ​ရ။ ၂၂ပိုဲ​ဍိက်​တံ​ဝွံ တေံ​မၞိဟ်​သၟတ်​ဝွံ ထောံ​မ​ညး​ဟွံ​မာန်။ ထောံ​မ​ညး​မ္ဂး မ​ညး​ချိုတ်​ရောၚ် သာ်​ဝွံ ပ္တီ​တ​လ​အဲ​ၜိုန်​ဒှ်​ကီု၊ ၂၃တ​လ​အဲ​ဝွံ၊ ဒေံ​မၞး​တံ​ဟွံ​ပါ​မ္ဂး၊ မၞး​တံ​ဝွံ ကြဴ​မွဲ​ဝါ​ဟွံ​ဂွံ​ညာတ်​မုက်​အဲ သာ်​ဝွံ ဟီု​ပၟိၚ်​ကဵု​ဍိက်​တ​လ​အဲ​ရ။ ၂၄ကြဴ​ဂှ် ကာ​လ​ပိုဲ​ဍိက်​တံ​မ​စိုပ်​အာ​ပ္ဍဲ​ဇ​ရေၚ်​ဍိက်​တ​လ​အဲ​မ​တွံ​ဂး​မ​ပိုဲ​ဍိက်​ပၠန်​ဂှ် ဂ​လာန်​တ​လ​အဲ​ဂှ် က​လေၚ်​ဟီု​ကဵု​မ​ပိုဲ​ဍိက်​တံ​အိုတ်​ရ။ ၂၅မ​ပိုဲ​ဍိက်​တံ​ဂှ်​လေ၊ အာ​မွဲ​ဝါ​ပၠန်​တုဲ စ​ဏ​သွက်​ပိုဲ​ညး​ရာန်​နၚ်​အောန်​အောန်​အိုတ်​ညိ သာ်​ဝွံ ကာ​လ​မ​ဟီု​ဂှ်၊ ၂၆ပိုဲ​ဍိက်​တံ​ဝွံ ပိုဲ​ဍိက်​တံ​အာ​ဟွံ​မာန်​ရ။ ဒေံ​ပါ​မ္ဂး အာ​မာန်​ရ။ ဒေံ​ဟွံ​ပါ​မ္ဂး၊ မုက်​မၞိဟ်​တေံ​ဟွံ​ဂွံ​ညာတ်​ရ သာ်​ဝွံ က​လေၚ်​ဟီု​အိုတ်​ရ။ ၂၇ဍိက်​တ​လ​အဲ၊ မ​အဲ​ဍိက်​ဂှ်​လေ အ​တိုၚ်​မၞး​တံ​တီ​ဂှ် သ​မ္ဘာ​အဲ​သၠး​ဂ​ဗ္ဘ​ကောန်​ၜါ​ရ။ ၂၈ညး​မွဲ​မ္ဂး​ဂှ်၊ တိတ်​အာ​နူ​ဇ​ရေၚ်​အဲ​ရ။ ဒှ်​ကွေံ​သ္ဍာံ​သၟတ်​ညး​ဒ​ဒုၚ်​ကိတ်​ဒ​ပိုတ်​ဒ​ကုတ်​ရ သွံ သာ်​ဝွံ အဲ​မ​ဟီု​ရ။ မ​ပ္တံ​နူ​ကာ​လ​ဂှ်​တုဲ အဲ​ဟွံ​ဂွံ​ညာတ်​ညး။ ၂၉ညး​ဝွံ​ဂှ်​လေ ကေတ်​ဏာ​နူ​ဇ​ရေၚ်​အဲ​တုဲ ဘဲ​စိုပ်​ပ္ဍဲ​ညး​မ္ဂး မၞး​တံ​ဝွံ သော်​သ္ကံ​အဲ​ကောံ​ကု​အောန်​စိုတ်​မွဲ​စွံ ကဵု​စှ်ေ​ဒ​ဒတ်​တဴ ပ္ဍဲ​ဍုၚ်​မာ​ရ​ဏ​အိုတ်​ရောၚ် သာ်​ဝွံ ဟီု​ကဵု​ပိုဲ​ဍိက်​တံ​ရ။ ၃၀ဒှ်​သာ်​ဂှ်​တုဲ အဲ​ဍိက်​ဝွံ ကာ​လ​မ​စိုပ်​အာ​ပ္ဍဲ​ထာန်​ဍိက်​တ​လ​အဲ၊ မ​ပိုဲ​ဍိက်​တံ​ဂှ်၊ မၞိဟ်​သၟတ်​ဟွံ​ပါ​မ္ဂး၊ ဟိုတ်​လ​မျီု​မ၊ ပိုဲ​ဍိက်​မ​သၞေန်​စပ်​ပ္ဍဲ​လ​မျီု​မၞိဟ်​သၟတ်​ဂှ်၊ ၃၁မၞိဟ်​သၟတ်​ဟွံ​မွဲ ကာ​လ​မ​ညာတ်​ဂှ်၊ မ​ပိုဲ​ဍိက်​တံ​ချိုတ်​ရောၚ်။ ဍိက်​တ​လ​အဲ​တံ​ဝွံ သော်​သ္ကံ​ဍိက်​တ​လ​အဲ​မ​တွံ​ဂး​မ​ပိုဲ​ဍိက်​တံ​ဂှ် ကောံ​ကု​ဒ​ဒှ်​မ​အောန်​စိုတ် ကဵု​စှ်ေ​ဒ​ဒက်​တဴ ပ္ဍဲ​ဍုၚ်​မာ​ရ​ဏ​အိုတ်​ရောၚ်။ ၃၂ဍိက်​တ​လ​အဲ​ဝွံ၊ အဲ​ဍိက်​ဝွံ မၞိဟ်​သၟတ်​ဟွံ​ကေတ်​နၚ်​ပ္ဍဲ​ဇ​ရေၚ်​မ​မွဲ​ဝါ​ပၠန်​မ္ဂး ကဵု​ဒုၚ်​ဒုဟ်​ပ္ဍဲ​ဂ​တ​မ​လ္အိတ်​တွဵု​ရ သာ်​ဝွံ ဟီု​တုဲ ပ္ဍဲ​ဇ​ရေၚ်​မ၊ ဒုၚ်​လ​ယိုၚ်​အ​ကွက်​မၞိဟ်​သၟတ်​ရ။ ၃၃ဒှ်​သာ်​ဂှ်​မ္ဂး ဍိက်​တ​လ​အဲ​ဝွံ စ​ဏး မၞိဟ်​သၟတ်​မံၚ်​ထောံ​တုဲ အ​ခေါၚ်​ဂွံ​ဒုၚ်​ဍိက် ပ္ဍဲ​ထာန်​တ​လ​အဲ​ဂှ်​လေ​ကီု၊ မၞိဟ်​သၟတ်​မ္ဂး​ဂှ် အ​ခေါၚ်​ဂွံ​အာ​ကောံ​ကု​ကော​တံ​မွဲ​စွံ​ဂှ်​လေ​ကီု ကဵု​ညိ။ ၃၄မၞိဟ်​သၟတ်​ဝွံ ဟွံ​ပါ​ပ္ဍဲ​အဲ​ဍိက်​မ္ဂး၊ ပ္ဍဲ​ထာန်​မ​အဲ​ဍိက်​ဂှ် ပ​သာ်​အဲ​ဍိက်​အာ​မာန်​ရော။ သာ်​ဂှ် ပ​တုဲ ဘဲ​ဥ​ပါတ်​မ​ဒး​စိုပ်​ပ္ဍဲ​မ​အဲ​ဍိက်​ဂှ် အဲ​ဍိက်​ဒး​ညာတ်​ရောၚ်​သွံ သာ်​ဝွံ ပ္တီ​ရ။