၁မွဲနဲတုန်။ ဓဝ်ကတ္တိက ပထမဝွံ အရာမစဳရေၚ်ဒမံၚ်မပဝတ်ဂှ်လေကီု။ ဒေသမသ္အးဇ္ၚးပ္ဍဲလောကဳဂှ်လေကီုနွံတဴရ။ ၂ပသာ်ရောမ္ဂးဂှ်။ သ္အးဇ္ၚးရောၚ် သာ်ဝွံ ကော်ခဴ ပ္ဍဲတာဲပထမဝွံဂှ်။ ဇိုၚ်ပၟတ်သ္ဍဴ။ လ္ဗံက်။ သီုကွာၚ်မစွံဂတကျာ်ဂှ် ပြုပြေၚ်လဝ်တုဲ နွံတဴရ။ ၃အပ္ဍဲဂနိက်ဒုတိယျဂှ် သ္အးဇ္ၚးဗွဲမလောန်ရောၚ် သာ်ဝွံ တာဲမကော်ခဴဂှ် နွံတဴရ။ ၄ပ္ဍဲတာဲတေံဂှ် ထးထဝ်ကဵုကလာကတ္တိက မလံက်လဝ်နကဵုထဝ်သက်သက်ဂှ် မနွံရ။ ပ္ဍဲကလာတေံဂှ် နုၚ်ထဝ်မစွံမာန်ဏဂှ်လေကီု။ လေံဒန်အာရုၚ်ခမံတဴဂှ်လေကီုတၟံလးမချူလဝ်ဓဝ်ကတ္တိကဂှ်လေကီုနွံအိုတ်ရ။ ၅ပ္ဍဲလတူကလာဂှ် ခေရုၜီမဇၞော်ကဵုတြဳဇှ်တံဝွံ ပၞၚ်ဒမံၚ် မပၠေၚ်ကၠေံဒုဟ်ဂှ် ဂြောပ်ဒလီုလဝ်ရ။ တေံအရာဗွဲမဂၠိုၚ်လမေၚ်လမေၚ်ဂှ် လမုဟ်ဝွံ ဟီုအိုတ်ဟွံမာန်။ ၆တေံအရာသာ်ဂှ် သီုဖအိုတ်တံဝွံ ပြုပြေၚ်ဂှ်ဒှ်တုဲ ယတ်ပရောဟိတ်တံဝွံ ဇၟာပ်ဇၟာပ်ကာလလုပ်အပ္ဍဲ တာဲပထမတုဲ မလေပ်ပဝတ်အိုတ်ရ။ ၇အပ္ဍဲတာဲဒုတိယျဝွံ ဆသၟီယတ်ပရောဟိတ် မွဲဇကုဟိုတ် နူဒုဟ်ဇကုဂှ်လေကီုဟိုတ်နူဒုဟ်မၞိဟ်ဂမၠိုၚ်ဂှ်လေကီု။ ဆီမပူဇဴဂှ် ဒုၚ်ကေတ်တုဲ မွဲသၞာံဆမွဲဝါဂှ် ဂွံလုပ်ရ။ ၈ဒဵုကဵုတာဲပထမဟွံလီုဒဒှ် ဟွံပံက်ဂၠံၚ်မအာပ္ဍဲထာန်ဒမံၚ်မသ္အးဇ္ၚးဏီဂှ် နကဵုဒ္ဂေတ်ပွတေံတံဝွံ ဝိညာန်မသ္အးဇ္ၚးဂှ် ထၜးတဴရ။ ၉တာဲတေံမ္ဂးဂှ် ပူဇဴသကာကဵုယတ်ဂမၠိုၚ်လုကဴမွဲကာလဒဵုကဵုလမုဟ်ဂှ် ဒှ်ပုံပၟာရ။ တေံပူဇဴသကာကဵုယတ်ဂမၠိုၚ်တံဝွံ ဗ္စာရဏာနကဵုစိုတ်မတီ ဒုဟ်ဖဵုဇကုမ္ဂး ပ္ဍဲညးမပဝတ်ဖဵုဒဒှ်မစိစုံဂှ် ကဵုဟွံမာန်အိုတ်။ ၁၀မပဝတ်သာ် တေံမ္ဂးဂှ် ဒမံၚ်မစ။ ဒမံၚ်မသုၚ်။ မပ္တံကဵုဒမံၚ်ဗလိုက်ဇၟာပ်ဇၟာပ်ဂကူ သာ်ဝွံ နဲ ဥပ္ပဒေမဆေၚ်ကဵုခန္ဓဇကုဆဒဵုကဵုကာလဒဒှ်မပြုပြေၚ်တမိဂှ် ဂွံတန်အိုတ်ရောၚ်။ ၁၁လမုဟ်ဂှ် ဟွံကၠောန်နကဵုတဲဟွံဆေၚ်စပ်ကဵုလောကဝွံ ပ္ဍဲတာဲကျာ်ဇၞော်ပြဲစိစုံလောန်မဒှ်သၟီယတ်ပရောဟိတ်အရာမခိုဟ်ပြဲကြဴ။ ၁၂ခရေတ်ဝွံ နကဵုဆီဂၠဴသၟတ်။ ဆီဗၜေံတံဂှ် ဟွံသေၚ်။ နကဵုဆီဇကုပ္ဍဲထာန်ဒမံၚ်မသ္အးဇ္ၚးဂှ် လုပ်ဆမွဲဝါတုဲ သွက်အဲညးဂုန်ဒဒှ်မကၠးပ္တိတ်ထာဝရဂှ် မဂွံဒုၚ်တုဲရ။ ၁၃ဟိုတ်မ္ဂးဂှ်။ ပ္ဍဲလတူမၞိဟ်မနွံကဵုကၠိပပ်ကၠေက်လ္ၚေၚ်တံဝွံ နကဵု ဆီဂၠဴ။ ဆီဗၜေံကဵုပ္တေၚ်ဂၠဴၝောံသၟတ်ဂှ် ဗရဲတုဲ ဒဒှ်မသ္အးဇ္ၚး မဆေၚ်ကဵုဇကုကာယျညးမဂမၠိုၚ်တံဂှ် ကဵုမာန်မ္ဂး။ ၁၄လောန်နူဂှ်။ ဟွံမွဲကဵုဒုဟ်တုဲ နကဵုဝိညာန်ထာဝရဇကုဇကုဂှ် ဆက်ဗ္ဂိန်ပူဇဴကဵုကျာ်ဂမျိုၚ်ဂှ်ဒှ်တုဲ နကဵုဆီခရေတ်ဝွံ စိုတ်မၞးတံမတီဒုဟ်ဖဵုဇကုဂှ် ကဵုသ္အးဇ္ၚးနူဒ္ဂေတ် မဆေၚ် ကဵုဂစိုတ်တုဲ ဒဒှ်မပြုပြေၚ်မၞးတံ သွက်ဂွံပဝတ်ကဵုကျာ်မဂျိုၚ်လမျီုဂှ် ပမာန်ဗွဲမလောန်ဟွံသေၚ်ဟာ။ ၁၅ဟိုတ်ဂှ်ရ။ ပ္ဍဲဓဝ်ကတ္တိကတမိဂှ် တဳလပိုန်ဝွံ ဂွံဒှ်ညးအကြာဂှ်ဒှ်တုဲ နကဵုမဒုၚ်ဂစိုတ်အခေါၚ်ဂွံဗလးဒုဟ်မနွံပ္ဍဲလက်ထက်ဓဝ်ကတ္တိကပထမဂှ် ကဵုတန်မ္ဂး ညးမဒုၚ်ကော်တံဝွံ ဂွံဒုၚ်ဂတိအာဲကၟာဲထာဝရရောၚ်။ ၁၆လိက်ကတ္တိကနွံမ္ဂး ဒတိတ်ဒဒှ်ညးမဒက်လိက်ကတ္တိကမချိုတ်ဂှ် ဒးနွံရောၚ်။ ၁၇ဟိုတ်မ္ဂးဂှ်။ လိက်ကတ္တိကဝွံ ကာလညးမဒက်လိက်ဂှ် ချိုတ်တုဲ ဂွံတန်ရောၚ်။ ကာလမဂျိုၚ်ဒၟံၚ်ဂှ် လိက်ကတ္တိကဝွံ တန်ဟွံမာန်ရ။ ၁၈ဟိုတ်ဂှ်ရ ဓဝ်ကတ္တိကပထမဂှ် ဆီဟွံမွဲတုဲ ဟွံစဳရေၚ်။ ၁၉မဝ်သေဝ်ဝွံ ဓဝ်မနွံပ္ဍဲပညပ်သီုဖအိုတ်တံဂှ် တွံပ္ဍဲမၞိဟ်ဂမၠိုၚ်တုဲ ဆီဂၠဴဗၜေံမနှဴရဴကဵုဍာ်ဂှ် ကေတ်မ္ဂး နကဵုတၞုၚ်တၞံဟုက်သုတ်ကရပ်တသော်သဵုမဖျောန်ဗ္ကေတ်ဂှ် သၠပတ်ဂှ်လေကီု။ မၞိဟ်ဂမၠိုၚ်တံဂှ်လေကီုပ္ဍဲမဗရဲဂှ်။ ၂၀ဆီဝွံ မ္ဂးဂှ် မဒှ်ဆီကတ္တိကကျာ်မဒုၚ်လယိုၚ်ပ္ဍဲမၞးတံရောၚ် သာ်ဝွံ မဟီုရ။ ၂၁တာဲကဵုအပေါတ်မပဝတ်အိုတ်သီုတံဝွံ ညံၚ်နဲသာ်ဂှ် ဗရဲကဵုဆီရ။ ၂၂အတိုၚ်ဓဝ်ပညပ်ဇၟာပ်အရာအိုတ်သီုတံဂှ် ညံၚ်နဲမအိုတ်နကဵုဆီဂှ် မကဵုသ္အးဇ္ၚးရ။ ဟွံစဝ်စရိုဟ်ဆီမ္ဂး ဒဒှ်မဗလးဒုဟ်ဟွံမွဲ။ ၂၃ဟိုတ်ဂှ်ရ။ ဗီုအရာမနွံပ္ဍဲအကာသတံဂှ် နကဵုမပူဇဴယတ် သာ်ဝွံ ဒးကဵုသ္အးဇ္ၚးဂှ်ဒှ်တုဲ ဇကုအရာအကာသတံဝွံ နကဵုဒဒှ်မပူဇဴယတ်မပြဲဗွဲမလောန်ဂှ် ဒးကဵုသ္အးဇ္ၚးရ။ ၂၄ဟိုတ်မ္ဂးဂှ်။ ခရေတ်ဝွံ ပ္ဍဲထာန်ဒမံၚ်မသ္အးဇ္ၚးမကၠောန်နကဵုတဲမတွံဂးပ္ဍဲဗီုဒေသမသ္အးဇ္ၚးသ္ဍာံသၟတ်ဂှ် လုပ်ဟွံသေၚ်။ ဇကုဇကုဂှ် ညံၚ်ဂွံထၜးပ္ဍဲဂတကျာ်ဂမျိုၚ်သွက်ပိုဲညးဂမၠိုၚ်ပ္ဍဲဇကုအကာသဂှ် လုပ်တုဲရ။ ၂၅ၜိုန်ဂှ်လေ သၟီယတ်ပရောဟိတ်ဝွံ ပ္ဍဲဒေသမသ္အးဇ္ၚးဂှ် နကဵုဆီညးတၞဟ်သ္အာၚ်ညံၚ်နဲမလုပ်ရိုဟ်ဒဒှ်သၞာံဂှ် ခရေတ်ဝွံ ဂၠိုၚ်ကဵုဝါဒးပူဇဴဇကုဟွံသေၚ်။ ၂၆ဒးပူဇဴသာ်ဂှ် မ္ဂး မပ္တံနူကဵုပထမကဝ်ဂှ်တုဲ ဒးဒုၚ်ဂစိုတ်ဂၠိုၚ်ကဵုဝါရ။ လမုဟ်မ္ဂးဂှ်။ ပ္ဍဲကၞောတ်ကာလနကဵုမပူဇဴဇကုဆမွဲဝါဂှ် တၞဟ်နသၟိက် ပါဲကၠေံဒုဟ်အိုတ်သီုတုဲ ပြာကတ်တုဲရ။ ၂၇မၞိဟ်တံဝွံ ချိုတ်ဆမွဲဝါတုဲ ကြဴဂှ် ညံၚ်နဲမဒးဒုၚ်ဒဒှ်မစဳရေၚ်ဂှ် ၂၈ညံၚ်နဲသာ်ဂှ်။ ခရေတ်ဝွံ တၞဟ်နသၟိက်ဒုၚ်ကေတ်ဒုဟ်မၞိဟ်ဂမၠိုၚ်တုဲ ဇကုဇကုဂှ် ပူဇဴဆမွဲဝါမ္ဂး ကြဴဝွံ ဟွံမွဲကဵုဒုဟ်တုဲ တၞဟ်နသၟိက်ဟံၚ်ပြာ်မၞိဟ်မရံၚ်လၟဳဒဒှ်တဳလပိုန် မက္ညကၠုၚ်ဂှ် ကၠုၚ်မွဲဝါပၠန်ရောၚ်။