၁ပ္ဍဲလက်ထက်ဨကရာတ်ယုဍသၟီဥဇ္ဇိ၊ သၟီယောဝ်ထာမ်၊ သၟီအာခါတ်၊ သၟီဟေဇတိ၊ ဨကရာတ်ဣသရေလသၟီယေရဝ်ၜေါမ်ကောန်ယောဝ်သှတံဂှ်၊ ဂလာန်ကျာ်ထာဝရမကၠုၚ်စိုပ်ပ္ဍဲဟဝ်သှေကောန်ၜေရိအဒိကိုပ်ကၠာမ္ဂးဂှ်၊ ၂မၞးအာတုဲ သီကေတ်ဗြဴသရာဲဍုၚ်သီုကဵုကောန်ညးမသၠးတံဂှ်ရ။ ဟိုတ်မ္ဂးဂှ်၊ ကောန်ရးတံဝွံ ထောံကၠေံကျာ်ထာဝရတုဲ ထပ်ကဵုထပ်မှာရာအာတုဲရ သာ်ဝွံ အတိုၚ်မဗ္ကန်လဝ်ကဵုဟဝ်သှေဂှ်၊ ၃ဟဝ်သှေဝွံ အာတုဲ ဂေါမာကောန်ဗြဴဍိၜလိမ်ဂှ် သီကေတ်မ္ဂး၊ ညးဝွံ ကေတ်ပတိသန္ဓိတုဲ၊ သၠးကောန်တြုံပ္ဍဲကဵုဟဝ်သှေရ။ ၄ကျာ်ထာဝရဂှ်လေ တေံကောန်ဝွံဂှ် ခုတ်ယၟုယေဇရေလရ။ ဟိုတ်မ္ဂးဂှ်၊ ကြဴဟွံလံဟိုတ်ဒုဟ်မဂစိုတ်လမျီုယေဇရေလဂှ် အဲကဵုဒန်ပ္ဍဲဂကူယေဟုတုဲ၊ ရးနဳဂီုဣသရေလဂှ် ကဵုဟောံရောၚ်။ ၅ပ္ဍဲတ္ၚဲအဲမဝးပကဝ်တ္ၚဣသရေလပ္ဍဲခလံက်ယေဇရေလဂှ် ရ၊ တေံအမှုဝွံ မဍိုက်ပေၚ်ရောၚ် သာ်ဝွံ ဟီုပၟိၚ်ရ။
၆မွဲဝါပၠန်၊ ကေတ်ပတိသန္ဓိတုဲ သၠးကောန်ဗြဴရ။ တေံကောန်ဗြဴဂှ်လောရုဟာမာကော်ယၟုညိ။ ဟိုတ်မ္ဂးဂှ်၊ အဲဝွံ ဂကူဣသရေလဂှ် ကြဴမွဲဝါဟွံဆာန်ဍူမက်မတ်ပါဲစလးကၠေံဨကန္တရောၚ်။ ၇ဂကူယုဍမ္ဂးဂှ်၊ ဆာန်ဍူမက်မတ်ရောၚ်။ ၜိုန်ဂှ်လေ၊ နကဵုတ္ၚ၊ သ္ဇၚ်လွဟ်တဲဗ္တိုတ်ပၞာန်၊ ချေံ၊ သရာဲမဍိုက်ချေံဂှ် အဲဟွံဟံၚ်ပြာ်၊ နကဵုကျာ်ထာဝရကျာ်ဂမျိုၚ်ညးတံဂှ် အဲဟံၚ်ပြာ်ရောၚ် သာ်ဝွံ ဟီုပၟိၚ်ရ။
၈ကာလလောရုဟာမာမသြာဲနူတှ်ဂှ် မိဝွံ ကေတ်သတိသန္ဓိပၠန်တုဲ၊ သၠးကောန်တြုံရ။ ၉တေံကောန်ဝွံဂှ် ခုတ်ယၟုလေ အမ္မိညိ။ ဟိုတ်မ္ဂးဂှ်၊ မၞးတံဝွံ မၞိဟ်အဲဟွံသေၚ်။ အဲဝွံလေ ကျာ်မၞးတံဟွံသေၚ်။ ၁၀ၜိုန်ဂှ်လေ ကောန်ဂကူဣသရေလတံဝွံ ညံၚ်ရဴမဗ္တဳမှာသ္မိတ်သူဟွံမာန် တော်ရိုဟ်ဟွံမာန် ဂၠိုၚ်အိုတ်ရောၚ်။ မၞးတံဝွံ မၞိဟ်အဲဟွံသေၚ် သာ်ဝွံ ပ္ဍဲဒေသအဲမဟီုဂးကဵုညးတံပ္ဍဲဒေသဂှ် ရညးတံကောန်ကျာ်မဂျိုၚ်တဴလမျီု သာ်ဝွံ ဒဒှ်မကော်ခဴဂှ် မုးဒုၚ်အိုတ်ရောၚ်။ ၁၁ကာလဂှ် ကောန်ဂကူယုဍတံကဵုကောန်ဂကူဣသရေလတံဝွံ ပံၚ်ဖက်ကောံဒရီုတုဲ ပ္တိန်တဴသၟီမွဲဇကုဓဝ်မ္ဂး၊ နူအပ္ဍဲရးဂှ် တိတ်ကၠုၚ်အိုတ်ရောၚ်။ တ္ၚဲယေဇရေလဂွံဒှ်တ္ၚဲဇၞော်ပြဲရောၚ် သာ်ဝွံ ဟီုပၟိၚ်ရ။