သၠ​ပတ်​သ​မ္တီ​တ​လ​သၞောဝ် ၃

၁-၂ပ္ဍဲ​ရး​ခါ​နာန်​အ​မှု​မ​ဗ​တိုက်​ပၞာန်​ဆ​မ​နွံ​တံ​ဂှ် ဟွံ​တီ၊ ညံၚ်​ဂွံ​စံ​ၜတ် ကောန်​ဂ​ကူ​ဣ​သ​ရေ​လ​အိုတ်​သီု​တံ​ဂှ်​လေ​ကီု၊ အ​ဆက်​အ​ဆေန်​ကောန်​ဂ​ကူ​ဣ​သ​ရေ​လ​ဟွံ​တီ​အ​မှု​ပၞာန်​တံ​ဝွံ၊ ဗ္တောန်​ကွတ်​ပၞာန်​တုဲ ညံၚ်​ဂွံ​လေပ်​ဂှ်​လေ​ကီု၊ ဂ​ကူ​မၞိဟ်​ဂ​မၠိုၚ်​ကျာ်​ထာ​ဝ​ရ​မ​စွံ​လဝ်​မ္ဂး​ဂှ်၊ ၃မ​ပ္တံ​ကဵု​သ္ၚိ​ဖိ​လိ​တ္တိ မ​သုန်​တ​လ၊ မၞိဟ်​ခါ​န​နိ​တၞဟ်​တၞဟ်၊ မၞိဟ်​ဇိ​ဍောန် မ​ပ္တံ​ကဵု​ဒဵု​ၜါ​လ​ဟေ​ရ​မောန်​တုဲ၊ ဒဵု​ပါၚ်​ဂၠံၚ်​ဟာ​မာတ်​မၞိဟ်​ဟိ​ဝိ​မ​မံၚ် ပ္ဍဲ​လ​တူ​ဒဵု​လေ​ၜ​နောန်​တံ​ဝွံ သိဟ်​ဇး​ဒၟံၚ်​အိုတ်​ရ။ ၄ကျာ်​ထာ​ဝ​ရ​ဝွံ န​ကဵု​မဝ်​သှေ၊ အ​တိုၚ်​ပ​ညပ်​ဂ​မၠိုၚ်​မ​ဗ္ကန်​လဝ်​ကဵု​ဇု​ဇ​ဗဴ​လ​တံ​ဂှ် မၚ်​မွဲ​ကီု၊ ဟွံ​မၚ်​မွဲ​ကီု​ညံၚ်​ဂွံ​ပြာ​ကတ်​ဂှ်၊ သွက်​ဂွံ​စံ​ၜတ်​ဂ​ကူ​ဣ​သ​ရေ​လ​ဂှ် မ​ဒှ်​ရ။

၅ကောန်​ဂ​ကူ​ဣ​သ​ရေ​လ​တံ​ဝွံ၊ မံၚ်​ပ္ဍဲ​မၞိဟ်​ခါ​န​နိ၊ မၞိဟ်​ဟိ​တ္တိ၊ မၞိဟ်​အာ​မောဝ်​ရိ၊ မၞိဟ်​ဖေ​ရ​ဇိ၊ မၞိဟ်​ဟိ​ဝိ၊ မၞိဟ်​ယေ​ၜု​သိ​တံ​ဂှ်​တုဲ၊ ၆ပံၚ်​ဖက်​ဒၟံၚ်​ကဵု​ကောန်​ဗြဴ​ညး​တံ​ဂှ်​တုဲ၊ ကဵု​စ​ကောန်​ဗြဴ ဇ​ကု​တံ​ဂှ်​မ္ဂး ပ​ဝတ်​ကဵု​ကျာ်​ညး​တံ​အိုတ်​ရ။ ၇ကောန်​ဂ​ကူ​ဣ​သ​ရေ​လ​တံ​ဝွံ၊ ပ​ဒု​စ​ရိုတ်​ပ္ဍဲ​ဂ​တ​ကျာ်​ထာ​ဝ​ရ​တုဲ၊ ဝိုတ်​လ​လုဲ​ကျာ်​ဂ​မျိုၚ်​ဇ​ကု​ကျာ်​ထာ​ဝ​ရ​ဂှ်​မ္ဂး၊ ဟိုတ်​မ​ပ​ဝတ်​ကဵု​ကျာ်​ၜါ​လ​ဂ​မၠိုၚ်၊ တၞံ​အာ​သှ​ရ​ဂ​မၠိုၚ်။ ၈ကျာ်​ထာ​ဝ​ရ​ဝွံ ပၞောတ်​တိတ်​ပ္ဍဲ​ဂ​ကူ​ဣ​သ​ရေ​လ​ဗွဲ​မ​လောန်​တုဲ သွံ​ကဵု​ပ္ဍဲ​ဨ​က​ရာတ်​မေ​သောဝ်​ပေါဝ်​တာ​မိ​ခု​သှာန်​ရိ​သှ​ထိမ်​မ္ဂး၊ အ​လုံ​မွဲ​ဒ​စာံ​သၞာံ​မၞိဟ်​ဂ​ကူ​ဣ​သ​ရေ​လ​တံ​ဝွံ ဒး​ဒုၚ်​ဍိက်​ပ္ဍဲ​ဇ​ရေၚ်​ဨ​က​ရာတ်​တေံ​ရ။ ၉ကြဴ​မွဲ​ဝါ​ကာ​လ​မ​လ​ရိုအ်​ဂ​တေဝ် ကဵု​ကျာ်​ထာ​ဝ​ရ၊ နာဲ​မ​ဟံၚ်​ပြာ်၊ ဒေံ​ကာ​လေပ်၊ ကောန်​ကေ​နာတ်​သြ​ထာန်​ယေ​လ​ဂှ်၊ ကဵု​မံက်​တိုန်​သွက်​ညး​တံ​ဂှ်​ရ။ ၁၀ဝိ​ညာန်​ကျာ်​ထာ​ဝ​ရ​ဝွံ စိုပ်​ပ္ဍဲ​လ​တူ​ညး​တုဲ၊ ညး​ဝွံ အုပ်​လ​ဒံ​ဂ​ကူ​ဣ​သ​ရေ​လ​တုဲ ဇက်​ပၞာန်​ရ။ ဨ​က​ရာတ်​မေဝ်​သောဝ်​ပေါဝ်​တာ​မိ​ခု​သှာန်​ရိ​သှ​ထိမ်​ဂှ် ကျာ်​ထာ​ဝ​ရ​ပ​အပ်​ပ္ဍဲ​တဲ​ညး​တုဲ​မ္ဂး၊ တေံ​ဨ​က​ရာတ်​ဂှ် ညး​မာန်​ရ။ ၁၁အ​လုံ​မွဲ​ရး​ဒဵု​ကဵု​ပန်​စှ်ော​သၞာံ​သ္ၚိတ်​ဇြ​တုဲ​မ္ဂး၊ ကောန်​ကေ​နာတ်​သြ​ထာန်​ယေ​လ​ဝွံ ချိုတ်​အာ​ရ။

၁၂မွဲ​ဝါ​ပၠန်၊ ဂ​ကူ​ဣ​သ​ရေ​လ​တံ​ဝွံ ဟိုတ်​မ​ပ​ဒု​စ​ရိုတ်​ပ္ဍဲ​ဂ​တ​ကျာ်​ထာ​ဝ​ရ၊ ပ္ဍဲ​မွဲ​လ္ပာ်​ဂ​ကူ​ဣ​သ​ရေ​လ ဨ​က​ရာတ်​မဝ်​ၜ​ဨ​ဂ​လောန်​ဂှ် ကဵု​ဍိုက်​ပေၚ်​ကဵု​ဇြ​ဟတ်​ရ။ ၁၃ကောန်​ဂ​ကူ​အာ​မ္မောန်၊ ကောန်​ဂ​ကူ​အာ​မ​လေက်​တံ​ဂှ် သၟီ​တေံ​ဝွံ ကဵု​ကောံ​ဓ​ရီု​တုဲ ဇက်​အာ​မ္ဂး၊ ပ​လီု​ပ​လာ်​မၞိဟ်​ဣ​သ​ရေ​လ​တံ​ဂှ်​တုဲ​မ္ဂး၊ သီ​ကေတ်​ဍုၚ်​စံ​ပ​လံ​တုဲ၊ ၁၄ကောန်​ဂ​ကူ​ဣ​သ​ရေ​လ​တံ​ဝွံ၊ လု​ကဴ​စှ်​ဒ​စာံ​သၞာံ၊ ဒး​ဒုၚ်​ဍိက်​ပ္ဍဲ​ထာန်​ဨ​က​ရာတ်​မဝ်​ၜ​ဨ​ဂ​လောန်​အိုတ်​ရ။ ၁၅ကြဴ​မွဲ​ဝါ​ကာ​လ မ​လ​ရိုအ်​ဂ​တေဝ်​ကဵု​ကျာ်​ထာ​ဝ​ရ၊ နာဲ​မ​ဟံၚ်​ပြာ်၊ ဂ​ကူ​ၜေန်​ယာ​မိန်​ဟွံ​လေပ်​စ​ကာ​တဲ​သ္တုံ​ဨ​ဟုတ်​ကောန်​ဂေ​ရ​ဂှ် ကဵု​မံက်​တိုန်​ရ။ ပ္ဍဲ​တဲ​ညး​မၞိဟ်​ဣ​သ​ရေ​လ​တံ​ဝွံ၊ ကဵု​ဏာ​လာပ်​သ​ကာ​ပ္ဍဲ​ဨ​က​ရာတ်​မဝ်​ၜ​ဨ​ဂ​လောန်​ရ။ ၁၆ဨ​ဟုတ်​ဝွံ သၞာ်​မ​နွံ​ဇ​လိၚ်​မွဲ​ဟတ်​ဂှ် ကၠောန်​တုဲ၊ အ​ပ္ဍဲ​ယာတ်​ဒဳ​သ္တုံ​ဂှ် ဂတ်​စွံ​လဝ်​တုဲ​မ္ဂး၊ ၁၇လာပ်​သ​ကာ​ဂှ် ပ​လံၚ်​နၚ်​ပ္ဍဲ​ဇ​ရၚ်​ဨ​က​ရာတ်​မဝ်​ၜ​ဨ​ဂ​လောန်​ရ။ ဨ​ဂ​လောန်​ဝွံ ဒှ်​ညး​မ​ကြောံ​ဗွဲ​မ​လောန်​ရ။ ၁၈ဨ​ဟုတ်​ဝွံ ဆက်​လာပ်​သ​ကာ​တုဲ​မ္ဂး၊ ဗ​လး​ဏာ​ညး​မ​ယိုက်​လာပ်​သ​ကာ​တံ​ဂှ်​တုဲ၊ ၁၉ဇ​ကု​က​လေၚ်​ကၠုၚ်​နူ​တိုၚ်​တၟံ​မ​နွံ ပ္ဍဲ​ဇ​ရေၚ်​ဍုၚ်​ဂိ​လ​ဂါ​လ​ဂှ်​တုဲ၊ အဲ​ဍိက်​သွက်​ဂွံ​ဟီု​ပ္တီ​သ္ၚိတ်​သ္ၚိတ်​နွံ​ရ​ကျာ် သာ်​ဝွံ ဟီု​မ္ဂး၊ ဨ​က​ရာတ်​ဝွံ၊ မံၚ်​သီု​မ​သ္ၚိတ်​ဇြ​အိုတ် သာ်​ဝွံ အ​တိုၚ်​ပၟိၚ်​မ​နွံ​ဂှ်၊ ညး​မ​ခ​စ​အိုတ်​သီု​တံ​ဝွံ တိတ်​အာ​နူ​ထာန်​သၟီ​ရ။ ၂၀ကာ​လ​ဂှ် ဨ​က​ရာတ်​ဝွံ ပ္ဍဲ​နန်​မ​လေပ်​မံၚ်​က​ညၚ်​ဂှ် ဂ​ဇံ​ဒၟံၚ်​ဇ​ကု​မွဲ​ဒဝ်​ဂှ်၊ ဨ​ဟုတ်​ဝွံ ပြာပ်​လုပ်​တုဲ၊ ပၟိၚ်​ကျာ်​ဂ​မျိုၚ်​မ​ဆေၚ်​ကဵု​တဳ​လ​ဂှ် ပါ​ရ သာ်​ဝွံ ဟီု​ပ္တီ​မ္ဂး၊ ဨ​က​ရာတ်​ဝွံ က​တဵု​ရ။ ၂၁ဨ​ဟုတ်​ဝွံ တဲ​ဇွိ​ဂှ် ပၠး​မ္ဂး သၞာ်​ဂှ် ပ္တိတ်​နူ​ဒဳ​သ္တုံ​တုဲ၊ ထ​ပက်​ဗုၚ်​ဨ​က​ရာတ်​မ္ဂး၊ ၂၂လုပ်​အာ​သီု​တဝ်​သၞော်​မွဲ​စွံ​တုဲ၊ ဒဵု​ကဵု​တံၚ်​ပ္တိတ်​နူ​ဗုၚ်​ဟွံ​မာန်​ဂှ် ခၟာဲ​ကၠေၚ်​ဂွံ​ဂြောပ်​ဒ​လီု​ကဵု​သၞာ်​တုဲ၊ အိက်​ၜတ်​လေ တိတ်​ဒၟံၚ်​ရ။ ၂၃ကာ​လ​ဂှ် ဨ​ဟုတ်​ဝွံ တိတ်​အာ​မ္ၚး​ဂ​ဒံ​တုဲ​မ္ဂး၊ ကၟာတ်​တ​ရၚ်​နန်​တံ​ဂှ်​တုဲ စုတ်​သအ်​ရ။ ၂၄တိတ်​အာ​တုဲ၊ ဍိက်​လ္ၚဵု​တံ​ဝွံ ကၠုၚ်​တုဲ၊ မ​စုတ်​လဝ်​သအ်​ပ္ဍဲ​တ​ရၚ်​နန်​ဂှ် ညာတ်​မ္ဂး၊ ဒှ်​ကွေံ​သ္ဍာံ​သၟတ်​သ္တၚ်​ဒၟံၚ်​ပ္ဍဲ​နန်​တ​ညၚ်​ဂှ်​ရောၚ် သာ်​ဝွံ ဟီု​မ္ဂး၊ ၂၅မၚ်​ဒၟံၚ်​ဒဵု​ကဵု​ဖေက်​ဂွ​တုဲ​မ္ဂး၊ ဟိုတ်​နာဲ​ညး​တံ​ဟွံ​ပံက်​တ​ရၚ်၊ ညး​တံ​ဝွံ ကေတ်​သအ်​ဂှ်​တုဲ ကာ​လ​မ​ပံက်​ရံၚ်​ဂှ်၊ နာဲ​ဇ​ကု​မ​လောတ်​ချိုတ်​ဒၟံၚ် ပ္ဍဲ​လ​တူ​တိ​ဂှ် ညာတ်​ရ။ ၂၆ကာ​လ​ညး​တံ​မ​မၚ်​မံၚ်​သာ်​ဂှ်၊ ဨ​ဟုတ်​ဝွံ ဗၠး​နူ​ဘဲ​တုဲ၊ လောန်​အာ​တိုၚ်​တၟံ​တံ​ဂှ်​တုဲ စိုပ်​ပ္ဍဲ​ကွာန် သိ​ရာတ်​တုဲ​မ္ဂး၊ ၂၇ဗ​ဂိုဟ်​ခ​ပဵု​ပ္ဍဲ​လ​တူ​ဒဵု​ဨ​ဖ​ရိမ်​ဂှ်​တုဲ၊ ကောန်​ဂ​ကူ​ဣ​သ​ရေ​လ​တံ​ဝွံ ဗက်​လက်​က​ရဴ​ညး​တုဲ စှ်ေ​ကၠုၚ်​နူ​လ​တူ​ဒဵု​ရ။ ၂၈ညး​ဝွံ​လေ ဗက်​လက်​က​ရဴ​အဲ​အိုတ်​ရ။ သတ်​တြု​မၞး​တံ၊ မၞိဟ်​မဝ်​ၜ​တံ​ဂှ် ကျာ်​ထာ​ဝ​ရ​ဝွံ ပ​အပ်​ပ္ဍဲ​တဲ​မၞး​တံ​ရောၚ် သာ်​ဝွံ အ​တိုၚ်​မ​ဟီု​ဂှ် စှ်ေ​ကၠုၚ်​လက်​က​ရဴ​ညး​မ္ဂး၊ ဒၞာဲ​မ​ကၠောံ​ၜဳ​ယဝ်​ဍာန်​ဂၠံၚ်​မ​အာ​ပ္ဍဲ​ရး​မဝ်​ၜ​ဂှ် ဆဳ​ဒ​နာ​တုဲ၊ ဆ​မၞိဟ်​မွဲ​မွဲ​ဟွံ​ဂွံ​ကဵု​ကၠောံ။ ၂၉ကာ​လ​ဂှ် သ​ရာဲ​ပၞာန် မဝ်​ၜ​မ​ဇၞော်​ကဵု​ဒြ​ဟတ်​ဆ​ညး​မွဲ​ဟွံ​ဗၠး​တုဲ၊ ဂ​စိုတ်​ကၠေံ​မၞိဟ်​မွဲ​လက်​တုဲ၊ ၃၀ဂ​ကူ​မဝ်​ၜ​ဝွံ ကျ​ပ္ဍဲ​တဲ​ဂ​ကူ​ဣ​သ​ရေ​လ​တုဲ၊ ဒဵု​ကဵု​ဒ​စာံ​စှ်ော​သၞာံ​အ​လုံ​မွဲ​ရး​ဂှ် သ္ၚိတ်​ဇြ​ရ။ ၃၁လက်​က​ရဴ​ဨ​ဟုတ်​ကောန် အာ​နာတ်​သှံ​ဂါ​မံက်​ကၠုၚ်​တုဲ၊ မၞိဟ်​ဖိ​လိ​တ္တိ​တ​ရဴ​ကၠံ​တံ​ဂှ် ဂ​စိုတ်​ကဵု​လေအ်​ထ​ကေက်​တုဲ၊ ပြာ်​ဗ​လး​ကောန်​ဂ​ကူ​ဣ​သ​ရေ​လ​တံ​ဂှ်​ရ။