၁ကျာ်ဂမျိုၚ်ဂကူမၞိဟ်တေံဂမၠိုၚ် ကျာ်ထာဝရဝွံ အသံဆမဗ္ကန်လဝ်နကဵုယေရမိတံဂှ်၊ ယေရမိကလေၚ် ဟီုတွံကဵုမၞိဟ်အိုတ်သီုတံဂှ်အိုတ်သ္အးမ္ဂး၊ ၂မပ္တံကဵုကောန်ဟဝ်သှာဲ အာဇရိကဵုကောန်ကာရာယဝ်ဟနာန်၊ ညးမသၠုၚ်မာနအိုတ်သီုတံဝွံ၊ မၞးဝွံ ဟီုဂလာန်မုသာရ။ အာပ္ဍဲရးအာဲဂုတ္တုတုဲ ဟွံဂွံဇူဒီု သာ်ဝွံ၊ ကျာ်ဂမျိုၚ် ပိုဲညးကျာ်ထာဝရဝွံ ဟွံဗ္ကန်လဝ်ပ္ဍဲမၞး။ ၃မၞိဟ်ခါလဍာဲတံဝွံ ဂစိုတ်ပိုဲညးတံတုဲ ညံၚ်ဂွံကဵုသီဏာပ္ဍဲဍုၚ်ၜါၜုလောန်၊ တၞံနသၟိက်ပအပ်ပိုဲညးတံပ္ဍဲတဲညးတံဂှ်၊ ကောန်နေရိၜါရုက်ဝွံ က္သေံကၟဝ်ပ္အေါဝ်လဴညးရ သာ်ဝွံ ဟီုအိုတ်တုဲမ္ဂး၊ ၄-၅မပ္တံကဵုကောန်ကာရာယဝ်ဟနာန်၊ နာဲဒပ်ဂမၠိုၚ်ကဵုမၞိဟ်အိုတ်သီုတံဝွံ၊ ဒးမံၚ်ပ္ဍဲရးယုဍရောၚ်၊ အသံကျာ်ထာဝရဂှ် ဟွံကလၚ်တုဲ၊ ၆ဒးဒုၚ်ဗက်ပ္တိတ်ဇၟာပ်ဇၟာပ်ရးနဳဂီုတုဲမ္ဂး၊ တၞံနသၟိက်ဂွံမံၚ်ပ္ဍဲရးယုဍကောန်ဂကူယုဍမသိဟ်ဇး၊ မၞိဟ်တြုံ၊ မၞိဟ်ဗြဴ၊ ညးသၟတ်၊ မပ္တံကဵုသၟီဗြဴမၞိဟ်ဂအုပ်ပၟၚ်လမျီုနေၜုဇာရဍာန်မပအပ် ပ္ဍဲဂေဍလိကောန်အဟိကာမ် မဒှ်ကောန်သှာဖာန် အိုတ်သီုတံဂှ်လေကီု၊ ပရဝ်ဖေတ်ယေရမိ၊ ကောန်နေရိၜါရုက်ဂှ်လေကီု၊ ကောန်ကာရာယဝ်ဟနာန်ကဵုနာဲဒပ်အိုတ်သီုတံဂှ် ကေတ်တုဲ၊ ၇အသံကျာ်ထာဝရဂှ် ဟွံကလၚ်တုဲ၊ အာပ္ဍဲရးအာဲဂုတ္တုတုဲ စိုပ်ပ္ဍဲဍုၚ်တာပနေတ်အိုတ်ရ။
၈-၉ပ္ဍဲဍုၚ်တာပနေတ်ဂလာန်ကျာ်ထာဝရစိုပ်ကၠုၚ်ပ္ဍဲယေရမိမ္ဂးဂှ်၊ မၞးဝွံ တၟံဗွဲမဇၞော်တံဂှ် ရပ်ကေတ်တုဲ ပ္ဍဲတိဖဴဍိုတ်မနွံဇရေၚ်ပါၚ်သ္ၚိ ဨကရာတ်ဖာရောဝ်ပ္ဍဲဍုၚ်တာပနေတ်၊ တိုပ်လဝ်ပ္ဍဲဂတမၞိဟ်ယုဍဂမၠိုၚ်ရ။ ၁၀ပ္ဍဲညးတံဂှ်လေ၊ ကျာ်ဂမျိုၚ်ဂကူဣသရေလ၊ နာဲညးကျာ်ထာဝရတလဗဵုလဗးအကာသဟီုပၟိၚ်မ္ဂးဂှ်၊ အဲဝွံ ဗလးဏာမၞိဟ်တုဲ၊ ဍိက်အဲဨကရာတ်ၜါၜုလောန်နေၜုခါဒ်နေဇာဂှ် ပလံၚ်နၚ်တုဲ၊ ပ္ဍဲလတူတၟံအဲမတိုပ်လဝ်ဝွံဂှ်၊ ရာဇာပၞၚ်ညးဂှ် သြိုၚ်ပ္တန်ရောၚ်။ ညးဝွံလေ၊ တာဲဇကုဂှ် ပၠးပ္ဍဲလတူတၟံဝွံရောၚ်။ ၁၁ကာလသၟီတေံမစိုပ်ကၠုၚ်၊ ပလီုပလာ်ရးအာဲဂုတ္တုတုဲ၊ ညးမကြိုက်ကဵုချိုတ်တံဂှ် ပ္ဍဲဒဒှ်မချိုတ်ဂှ်လေကီု၊ ညးမကြိုက်ကဵု သီဏာကြိုၚ်လဝ်တံဂှ် ပ္ဍဲဒဒှ်မသီဏာကြိုၚ်လဝ်တံဂှ်လေကီု၊ ညးမကြိုက်ကဵု ကောပ်မှေတ်တံဂှ် ပ္ဍဲဒဒှ်မကောပ်မှေတ်ဂှ်လေကီု ပအပ်ရောၚ်။ ၁၂သ္ၚိကျာ်အာဲဂုတ္တုတံဂှ် အဲစံၚ်ပၟတ်ရောၚ်၊ ညးဝွံလေ တေံကျာ်တံဂှ် စံၚ်ပၟတ်တုဲ သီဏာကြိုၚ်လဝ်ရောၚ်။ ညံၚ်နဲပၟၚ်သဵုမဗိုက်လတက်ယာတ်ဇကု၊ သၟီတေံဝွံ ယာတ်အာဲဂုတ္တုဂှ် ဗိုက်တုဲ တိတ်အာဗွဲမသ္ၚိတ်ဇြရောၚ်။ ၁၃ပ္ဍဲဍုၚ်ၜေတ်သှေမေတ်ရးအာဲဂုတ္တု၊ ပတ္တိမာရုပ်ဂမၠိုၚ်ဂှ် ပ္ကဝ်ပလီုတုဲ၊ သ္ၚိကျာ်အာဲဂုတ္တုဂမၠိုၚ်ဂှ် စံၚ်ပၟတ်ရောၚ် သာ်ဝွံ၊ ကျာ်ထာဝရဟီုပၟိၚ်ရ။