ခ​ရေတ်​ဝၚ်​ယဝ်​ဟာန် ၂

၁ပ္ဍဲ​တ္ၚဲ​တ​တိ​ယျ​ပ္ဍဲ​ဍုၚ်​ကာ​ဏ ရး​ဂါ​လိ​လဲ​ဂှ် ပေါဲ​ပ​ကာ​ဝါ​မ္ၚဵု​မ​နွံ​တုဲ။ ပ္ဍဲ​ပေါဲ​ဂှ် မိ​ယေ​သှု​မ​နွံ​ရ။ ၂ယေ​သှု​ကဵု​တွး​တံ​ဂှ်​လေ ကော်​ပၠုပ်​ပ္ဍဲ​ပေါဲ​ဂှ် အိုတ်​ရ။ ၃ကာ​လ​ဍာ်​ဇ​ဗျေတ်​မ​အိုတ်​အာ​ဂှ် မိ​ယေ​သှု​ဝွံ ဍာ်​ဇ​ဗျေတ်​ဟွံ​မွဲ သာ်​ဝွံ ဟီု​ပ္တီ​တဳ​လ​ပိုန်​ရ။ ၄ယေ​သှု​ဂှ်​လေ မၞး​မၞိဟ်​ဗြဴ။ မၞး​ဝွံ ပ​သာ်​မ​ဆေၚ်​ကဵု​အဲ​ရော ဟွံ​စိုပ်​ပ​ယာံ​အဲ​ဏီ သာ်​ဝွံ ဟီု​ပၟိၚ်​ရ။ ၅မိ​တဳ​လ​ပိုန်​ဂှ်​လေ ဆ​ညး​မ​ဟီု​ကဵု​မၞး​တံ​ဂှ် ပ​အိုတ်​ရ သာ်​ဝွံ ကဵု​မၞိဟ်​မ​ဒုၚ်​စ​ကာ​တံ​ဂှ် မ​ဟီု​ရ။ ၆အ​တိုၚ်​ဘာ​သာ​ယု​ဍ​ဂှ် သွက်​ပၟိက်​ဒ​ဒှ်​မ​သ္အး​ဇ္ၚး​ပ္ဍဲ​ကဵု​ဒေ​သ​ဝွံ ပ​ရိုက်​မ​လုပ်​ၜါ​န​ပိ​န​စှ်ေ​တၟံ​တ​ရဴ​ဂှ် မ​စွံ​လဝ်​ရ။ ၇ယေ​သှု​ဂှ်​လေ တေံ​စှ်ေ​တံ​ဂှ် ဗ​ပေၚ်​ကဵု​ဍာ်​အိုတ် သာ်​ဝွံ ဟီု​ပၟိၚ်​ကဵု​ညး​မ​ဒုၚ်​စ​ကာ​တုဲ ညး​တံ​ဝွံ ဒဵု​ကဵု​မ​စိုပ်​သ​မောန်​ဂှ် ကဵု​ပေၚ်​အိုတ်​ရ။ ၈တုက်​လ​မုဟ်​တုဲ ကေတ်​ဏာ​ကဵု​ဇ​မၞော်​ပေါဲ​အိုတ် သာ်​ဝွံ အ​တိုၚ်​တဳ​လ​ပိုန်​မ​ဟီု​ဂှ် ကေတ်​ဏာ​အိုတ်​ရ။ ၉ဇ​မၞော်​ပေါဲ​ဝွံ ဍာ်​မ​ကဵု​ဒှ်​ဍာ်​ဇ​ဗျေတ်​ဂှ် စေပ်​စံ​တုဲ မၞိဟ်​မ​ဒုၚ်​စ​ကာ​မ​တုက်​ဍာ်​တံ​ဝွံ မူ​ဒၞာဲ​မ​ဂွံ​ဍာ်​ဇ​ဗျေတ်​ဂှ် တီ​ဒၟံၚ်​ၜိုန်​ဒှ်​ကီု ဇ​မၞော်​ပေါဲ​ဟွံ​တီ​တုဲ ကော်​မၚ်​ဗၠာဲ​ပ​ကာ​ဝါ​မ္ၚဵု​မ္ဂး။ ၁၀ညး​တၞဟ်​သ္အာၚ်​မ္ဂး​ဂှ် ဍာ်​ဇ​ဗျေတ်​ခိုဟ် ဂှ်​စုတ်​ကၠာ​တုဲ သုၚ်​ဒဵု​ဖဲ​အိုတ်​မ္ဂး ဍာ်​ဇ​ဗျေတ်​မ​ဍိုန်​ဂှ် မ​လေပ်​စုတ်​လဝ်​ပၠန်​ရ။ မၞး​မ္ဂး​ဂှ်။ ဍာ်​ဇ​ဗျေတ်​မ​ခိုဟ်​ဂှ် ဒဵု​ကဵု​လ​မုဟ်​ဒေပ်​လဝ်​တုဲ​ရ သာ်​ဝွံ မ​ဟီု​ရ။ ၁၁သာ်​ဝွံ နိ​မိတ်​လက်​သန်​ကၠာ​ဂှ် ပ္ဍဲ​ရး​ဂါ​လိ​လဲ​ဍုၚ်​ကာ​ဏ​ဂှ် ယေ​သှု​ထ​ၜး​တုဲ ကဵု​တြဳ​ဇှ်​ဇ​ကု​ပြာ​ကတ်​ရ။ တွး​တံ​ဂှ်​လေ ပ္တေဟ်​တဳ​လ​ပိုန်​အိုတ်​ရ။

၁၂ကြဴ​ဂှ် ကောံ​ကု​မိ​ဇ​ကု​ဒေံ​ဇ​ကု​ကဵု​တွး​ဇ​ကု​တံ​မွဲ​စွံ​ဂှ် တဳ​လ​ပိုန်​က္ည​အာ​ပ္ဍဲ​ဍုၚ်​က​ပေ​ရ​နောံ​ရ။ ပ္ဍဲ​ဍုၚ်​ဂှ် ဗွဲ​မ​လံ​ဟွံ​မံၚ်​မ္ဂး။ ၁၃ပေါဲ​ပ​သ​ခါ​ယု​ဍ​ညောန်​စိုပ်​ဂှ်​ဒှ်​တုဲ ယေ​သှု​ဝွံ က္ည​အာ​ပ္ဍဲ​ဍုၚ်​ယေ​ရု​သ​လေၚ်​ရ။ ၁၄ပ္ဍဲ​လွဳ​မာန်​ဂှ် ညး​မ​သွံ​ဂၠဴ၊ သဵု၊ ဂ​စေံ​ပူ​တံ​ဂှ်​လေ​ကီု၊ ညး​မ​လှာဲ​သြန်​တံ​ဂှ်​လေ​ကီု ဒ​ဒှ်​မ​ဂ​ဇံ​နွံ ဒၟံၚ်​ဂှ် တဳ​လ​ပိုန်​ဆဵု​တုဲ။ ၁၅သွက်​ဂွံ​တက်။ ဇုက်​သၟတ်​တံ​ဂှ် ပြု​ပြေၚ်​မ္ဂး တေံ​မၞိဟ်​ဂ​မၠိုၚ်​တံ​ဂှ်​လေ​ကီု​ဂၠဴ​၊သဵု​ဂ​မၠိုၚ်​တံ​ဂှ်​လေ​ကီု​တဳ​လ​ပိုန်​ဗက်​ပ္တိတ်​နူ​အ​ပ္ဍဲ​လွဳ​မာန်​တုဲ လ္ဗံက်​ညး​မ​လှာဲ​သြန်​တံ​ဂှ် ဒ​ရိုဟ်​ဗ​ကပ်​ထောံ​ရ။ ၁၆ပ္ဍဲ​ကဵု​ညး​မ​သွံ​ဂ​စေံ​ပူ​တံ​ဂှ်​လေ ဒြပ်​က​သပ်​တံ​ဂှ် ကေတ်​ဏာ​အိုတ်။ သ္ၚိ​မ​အံက်​အဲ​ဝွံ​ဂှ် လ္ပ​ပ​တာဲ​ဖျာ​အိုတ် သာ်​ဝွံ ဟီု​ပၟိၚ်​ရ။ ၁၇ပ္ဍဲ​သ္ၚိ​တဳ​လ​ဂုန်​ဝွံ စိုတ်​က္တဴ​စံၚ်​တူ​ဂှ် စ​ကၠေံ​အဲ​ဍိက်​တုဲ​ရ သာ်​ဝွံ ဒ​ဒှ်​သၠ​ပတ်​မ​ကၠုၚ်​ဂှ် ပ္ဍဲ​ကာ​လ​ဂှ် တွး​တံ​ဝွံ ဗှ်​သၞာ​အိုတ်​ရ။

၁၈မၞိဟ်​ယု​ဍ​တံ​ဂှ်​လေ မၞး​ဝွံ ပ​သာ်​ဂှ် မ္ဂး မူ​နိ​မိတ်​လက်​သန်​ဂှ် ထ​ၜး​ကဵု​ပိုဲ​ညး​ရော သာ်​ဝွံ ဟီု​အိုတ်​ရ။ ၁၉ယေ​သှု​ဂှ်​လေ လွဳ​မာန်​ဝွံ ပ​လီု​ပ​လာ်​အိုတ်​ရ။ အ​ပ္ဍဲ​ပိ​တ္ၚဲ​ဂှ် အဲ​ဒက်​ပ္တန်​ပၠန်​ရောၚ် သာ်​ဝွံ ဟီု​ပၟိၚ်​ရ။ ၂၀မၞိဟ်​ယု​ဍ​တံ​ဂှ်​လေ လွဳ​မာန်​ဝွံ လု​ကဴ​ပန်​စှ်ော​တ​ရဴ​သၞာံ​ဂှ် ဒး​ဒက်​ပ္တန်​အိုတ်​ဂှ်​ဒှ်​တုဲ မၞး​ဝွံ အ​ပ္ဍဲ​ပိ​တ္ၚဲ​ဂှ် ဒက်​ပ္တန်​ရောၚ်​ဟာ သာ်​ဝွံ ဟီု​အိုတ်​ရ။ ၂၁ပ္ဍဲ​မ​ဟီု​ပၟိၚ်​သာ်​ဂှ် ရန်​ကဵု​လွဳ​မာန်​ကာ​ယျ​ဇ​ကု​တုဲ တဳ​လ​ပိုန်​မ​ဟီု​ပၟိၚ်​ရောၚ် ၂၂ဟိုတ်​ဂှ်​ရ ဂျိုၚ်​တိုန်​နူ​ဂ​စိုတ်​တုဲ တေံ​ဂ​လာန်​ဂှ် တွး​တံ​ဝွံ ဗှ်​သၞာ​အိုတ်​တုဲ သၠ​ပတ်​ဂှ်​လေ​ကီု တွဟ်​ပါၚ်​ယေ​သှု​ဂှ်​လေ​ကီု​ပ္တေဟ်​အိုတ်​ရ။

၂၃အ​ပ္ဍဲ​ပေါဲ​ပ​သ​ခါ​ဂှ် ယေ​သှု​ဝွံ နွံ​ဒၟံၚ်​ပ္ဍဲ​ဍုၚ်​ယေ​ရု​သ​လေၚ်​တုဲ နိ​မိတ်​လက်​သန်​မ​ထ​ၜး​တံ​ဂှ် ညး​ဗွဲ​မ​ဂၠိုၚ်​တံ​ဝွံ ဂွံ​ညာတ်​မ္ဂး စိုပ်​ဒ​ဒှ်​မ​ပ္တေဟ်​တဳ​လ​ပိုန်​အိုတ်​ရ။ ၂၄ၜိုန်​ဂှ်​လေ ယေ​သှု​ဝွံ ပ္ဍဲ​ကဵု​ညး​တံ​ဂှ် ဇ​ကု​ဇ​ကု​ဂှ် ဟွံ​ပ္အပ်။ ဟိုတ်​မ္ဂး​ဂှ်။ မၞိဟ်​အိုတ်​သီု​တံ​ဂှ် တီ​တုဲ​ရ။ ၂၅အ​ပ္ဍဲ​မၞိဟ်​ဝွံ ဆ​မ​နွံ​အိုတ်​သီု​တံ​ဂှ် ဟိုတ်​မ​တီ​တုဲ ယြဴ​ညး​မွဲ​ဒ​တိတ်​ဒ​ဒှ်​မၞိဟ်​ဂှ် သၟိက်​ဂွံ​ကဵု​ဒုၚ်​သက်​သဳ​မ္ဂး ပၟိက်​တဳ​လ​ပိုန်​ဟွံ​မွဲ။