ခ​ရေတ်​ဝၚ်​ယဝ်​ဟာန် ၅

၁ကြဴ​ဂှ် ပ္ဍဲ​မ​ဒှ်​ပေါဲ​ယု​ဍ​ဂှ် ယေ​သှု​ဝွံ က္ည​အာ​ပ္ဍဲ​ဍုၚ်​ယေ​ရု​သ​လေၚ်​ပၠန်​ရ။ ၂ပ္ဍဲ​ဍုၚ်​ယေ​ရု​သ​လေၚ်​ပ္ဍဲ​ဇ​ရေၚ်​တ​ရၚ်​သဵု​န​ကဵု​ဂ​လာန်​ဘာ​သာ​ဟေ​ဗြေဝ်​ဂှ် ၝေ​သေ​သ​ဍ​မ​နွံ​ယၟု​ဍာ်​က​မာ​မွဲ​မ​နွံ​ရ။ ဇ​ရေၚ်​ဍာ်​က​မာ​ဂှ် က​ဏာ​ထး​မ​သုန်​မ​နွံ​ရ။ ၃ပ္ဍဲ​က​ဏာ​ထး​တေံ​ဂှ် မၞိဟ်​မတ်​မ​ကၠက်။ ဇိုၚ်​မ​ချံၚ်။ ဇ​ကု​မ​ဇြာဲ​သ္ကဟ်​တုဲ ညး​မ​က္တဵု​ဒှ်​ယဲ​ရော​ဂါ​အိုတ်​သီု​တံ​ဝွံ ဒ​ဒှ်​ဍာ်​မ​ချဳ​စ​လိုက်​ဂှ် ရံၚ်​လၟဳ​မ္ဂး ဒၟံၚ်​တဴ​အိုတ်​ရ။ ၄ဟိုတ်​မ္ဂး​ဂှ်။ ဒး​ပ​ယာံ​တုဲ က​လုတ်​ဝွံ စှ်ေ​ဒ​ဒက်​တဴ​ပ္ဍဲ​ဍာ်​က​မာ​ဂှ် မ္ဂး မ​လေပ်​က​သဳ​စ​လိုက်​ဍာ်​ရ။ ဍာ်​မ​ချဳ​စ​လိုက် သာ်​ဝွံ​တုဲ​ညး​မ​လုပ်​ကၠာ​ဂှ် နူ​ကဵု​ယဲ​ရော​ဂါ​ဇ​ကု​ဆ​မ​က္တဵု​ဒှ်​ဂှ် စိုပ်​ဒ​ဒှ်​မ​ဗၠး​သၠး​ရ။ ၅ပ္ဍဲ​ကာ​လ​ဂှ် လု​ကဴ​ပိ​စှ်ော​ဒ​စာံ​သၞာံ​ယဲ​ရော​ဂါ​မ​က္တဵု​ဒှ်​ညး​မွဲ​ဂှ် မ​နွံ​ပ္ဍဲ​ဒေ​သ​ဂှ်​ရ။ ၆မၞိဟ်​ဝွံ ဒ​ဒှ်​မ​သ္တိက်​ဒၟံၚ်​ဂှ် ယေ​သှု​ညာတ်​တုဲ ဒှ်​ဒၟံၚ်​သာ်​ဂှ် ဗွဲ​မ​လံ​ရ သာ်​ဝွံ တီ​ကေတ်​မ္ဂး မၞး​ဝွံ သၟိက်​ဂွံ​စိုပ်​ဒ​ဒှ်​မ​ထတ်​ယုက်​ဟာ သာ်​ဝွံ တဳ​လ​ပိုန်​သၟာန်​ရ။ ၇ညး​မ​ယဲ​ဂှ်​လေ တ​လ​အဲ။ ကာ​လ​ဍာ်​မ​ချဳ​စ​လိုက်​ဂှ် အ​ပ္ဍဲ​ဍာ်​က​မာ​ဝွံ ညး​ပၠုပ်​လဝ်​အဲ​ဍိက်​ဂှ်ဟွံမွဲ။ ပ္ဍဲအဲဍိက်မအာဂှ် ညး​တၞဟ်​သ္အာၚ်​မ​လေပ်​လုပ်​ကၠာ​အဲ​ဍိက်​ရောၚ် သာ်​ဝွံ ပ္တီ​ရ။ ၈ယေ​သှု​ဂှ်​လေ က္တဵု​ရ။ ယိုက်​ကေတ်​ဇံၚ်​သ္တိက်​ဇ​ကု​တုဲ ဂါံ​ကွာ်​အာ​ရ။ သာ်​ဝွံ ဟီု​ပၟိၚ်​မ္ဂး။ ၉ပ္ဍဲ​ချိုန်​ခ​နှ​ဂှ် ညး​ဝွံ စိုပ်​ဒ​ဒှ်​မ​ထတ်​ယုက်​တုဲ ယိုက်​ကေတ်​ဇံၚ်​သ္တိက်​ဇ​ကု​မ္ဂး ဂါံ​ကွာ်​အာ​ရ။ တေံ​တ္ၚဲ​ဝွံ​ဂှ် ဒှ်​တ္ၚဲ​သဳ​ရ။

၁၀ဟိုတ်​ဂှ်​ရ မၞိဟ်​ယု​ဍ​တံ​ဂှ်​လေ ဒှ်​တ္ၚဲ​သဳ​ရောၚ်။ ဇံၚ်​သ္တိက်​ဂှ် ဟွံ​ဂပ်​ဂေါဝ်​ယိုက်​ဏာ သာ်​ဝွံ ကဵု​ညး​မ​ဗၠး​နူ​ယဲ​ရော​ဂါ​ဂှ် ဟီု​အိုတ်​ရ။ ၁၁ညး​ဂှ်​လေ ညး​မ​ကဵု​အဲ​ဍိက်​ထတ်​ယုက်​ဂှ် ယိုက်​ကေတ်​ဇံၚ်​သ္တိက်​ဇ​ကု​တုဲ ဂါံ​ကွာ်​အာ​ရ သာ်​ဝွံ မ​ဟီုကဵု​အဲ​ရောၚ် သာ်​ဝွံ က​လေၚ်​ဟီု​ရ။ ၁၂မၞိဟ်​ယု​ဍ​တံ​ဂှ်​လေ ယိုက်​ကေတ်​ဇံၚ်​သ္တိက်​ဇ​ကု​တုဲ ဂါံ​တွာ်​အာ​ရ သာ်​ဝွံ ညး​မ​ဟီု​ကဵု​မၞး​ဂှ် ညး​ဂှ် ရော သာ်​ဝွံ သၟာန်​အိုတ်​ရ။ ၁၃မၞိဟ်​ဝွံ​ဂှ် ဒှ်​ညး​ဂှ် ရော​ညး​မ​ဗၠး​နူ​ယဲ​ရော​ဂါ​ဂှ် ဟွံ​တီ။ ဟိုတ်​မ္ဂး​ဂှ်။ ပ္ဍဲ​ဒေ​သ​ဝွံ ညး​မ​ကောံ​ဒ​ရီု​ရၚ်​သ္ကံ​ဗွဲ​မ​ဂၠိုၚ်​နွံ​ဒၟံၚ်​ဂှ်​ဒှ်​တုဲ ယေ​သှု​ဝွံ က္ည​တိတ်​အာ​ကၞပ်​ကၞပ်​ရ။

၁၄ကြဴ​ဂှ် ယေ​သှု​ဝွံ ဆဵု​ဒး​မၞိဟ်​ဂှ် ပ္ဍဲ​လွဳ​မာန်​တုဲ မၞး​ဝွံ ထတ်​ယုက်​တုဲ​ရ။ ညံၚ်​ဟွံ​ဒး​ဆဵု​ဘဲ​လ္ၚ​မ​သ္ကာတ်​မြဟ်​ဗွဲ​မ​လောန်​ပၠန်​ဂှ် ကြဴ​ဝွံ ဒုဟ် ဒု​စ​ရိုတ်​ဂှ် လ္ပ​ပ သာ်​ဝွံ တဳ​လ​ပိုန်​ဟီု​ပၟိၚ်​ကဵု​ညး​ဂှ်​ရ။ ၁၅မၞိဟ်​ဝွံ အာ​တုဲ ညး​မ​ကဵု​ဇ​ကု​ထတ်​ယုက်​ဒ​ဒှ်​မ​ဒှ်​ယေ​သှု​ဂှ် ဟီု​ကဵု​မၞိဟ်​ယု​ဍ​တံ​ဂှ်​ရ။ ၁၆တေံ​ပွ​ဂှ် ဟိုတ်​မ​ပ​ပ္ဍဲ​တ္ၚဲ​သဳ​တုဲ မၞိဟ်​ယု​ဍ​တံ​ဝွံ ပ​ယဲ​ခ​ရ​ယေ​သှု​အိုတ်​ရ။ ၁၇ယေ​သှု​ဂှ်​လေ မ​အံက်​အဲ​ဝွံ ဒဵု​ကဵု​လ​မုဟ်​ကၠောန်​ဒၟံၚ်​က​လောန်​ဂှ်​ဒှ်​တုဲ။ အဲ​ဂှ်​လေ ကၠောန်​ကီု​ရ သာ်​ဝွံ က​လေၚ်​ဟီု​ရ။ ၁၈ဒှ်​သာ်​ဂှ်​တုဲ ဆ​မ​ပ​လီု​တ္ၚဲ​သဳ​ဟွံ​သေၚ်။ ကျာ်​ဂ​မျိုၚ်​ဂှ် မ​ဇ​ကု​ရောၚ် သာ်​ဝွံ ကော်​တုဲ ဇ​ကု​ဇ​ကု​ဂှ် ဟိုတ်​ပ​တုပ်​ကျာ်​ဂ​မျိုၚ်​မ္ဂး မၞိဟ်​ယု​ဍ​တံ​ဝွံ ညံၚ်​ဂွံ​ဂ​စိုတ်​တဳ​လ​ပိုန်​ဂှ် ဂၠာဲ​ချပ်​အိုတ်​ရ။

၁၉ယေ​သှု​ဂှ်​လေ ပ္ဍဲ​ကဵု​မၞး​တံ​အဲ​ဟီု​သ္ဍာံ​သၟတ်​မ္ဂး​ဂှ်။ ပွ​မ​အံက်​မ​ပ​ဂှ် ကောန်​ညာတ်​တုဲ မ​လေပ်​ပ​ရ။ န​ကဵု​ဇ​ကု​မူ​ပွ​မွဲ​မွဲ​ဂှ် ပ​ဟွံ​မာန်။ ဆ​အ​တိုၚ်​မ​အံက်​မ​ပ​ဂှ် ကောန်​မ​လေပ်​ပ​ရ။ ၂၀မ​အံက်​ဝွံ ဆာန်​ကောန်​တုဲ ဆ​ဇ​ကု​မ​ပ​အိုတ်​သီု​တံ​ဂှ် ထ​ၜး​ပ္ဍဲ​ကောန်​ရ။ ညံၚ်​မၞး​တံ​ဂွံ​ဒှ်​အံ​သဝ်​ဂှ် ပွ​မ​ဇၞော်​လောန်​နူ​ပွ​ဝွံ တံ​ဂှ် ထ​ၜး​ပ္ဍဲ​ကောန်​ရောၚ်။ ၂၁မ​အံက်​ဝွံ ညး​မ​ချိုတ်​လောန်​အာ​တံ​ဂှ် ညံၚ်​နဲ​မ​ကဵု​ဂျိုၚ်​တိုန်​ဂှ်​ဒှ်​တုဲ ညံၚ်​နဲ သာ်​ဝွံ ကောန်​ဂှ်​လေ ဆ​ညး​မ​နွံ​ပၟိက်​တံ​ဂှ် ကဵု​ဂျိုၚ်​တိုန်​ရောၚ်။ ၂၂ညး​ဂ​မၠိုၚ်​တံ​ဝွံ ညံၚ်​နဲ​မ​ရေဟ်​သေဟ်​မ​အံက်​တၞဟ်​န​သၟိက်​ကဵု​ရေဟ်​သေဟ်​ကောန်​ဂှ်။ ၂၃မ​အံက်​ဝွံ ဆ​ဗၞတ်​ညး​မွဲ​ဂှ် ဟွံ​စဳ​ရေၚ်​သၞောဝ်​ခေါၚ်​မ​စဳ​ရေၚ်​ဆ​မ​နွံ​ဂှ် ပ္အပ်​ကဵု​ပ္ဍဲ​ကောန်​တုဲ​ရ။ ညး​ဟွံ​ရေဟ်​သေဟ်​ကောန်​မ္ဂး​ဂှ် ဒှ်​ညး​ဟွံ​ရေဟ်​သေဟ်​မ​အံက်​မ​စ​ကာ​ဗ​လး​နၚ်​ကောန်​ရောၚ်။ ၂၄အဲ​ဟီု​သ္ဍာံ​သၟတ်​မ္ဂး​ဂှ်။ ဂ​လာန်​အဲ​ဂှ် က​လၚ်​တုဲ မၞိဟ်​ပ္တေဟ်​ညး​မ​စ​ကာ​ဗ​လး​နၚ်​အဲ​ဂှ် ဂွံ​လ​မျီု​ထာ​ဝ​ရ​ဂှ်​ဒှ်​တုဲ ဒ​ဒှ်​မ​စဳ​ရေၚ်​ဒုဟ်​ဂှ် ဟွံ​ဒး​ဒုၚ်။ နူ​ကဵု​ဂ​စိုတ်​ညး​မ​ကၠောံ​ပ္ဍဲ​လ​မျီု​မ​ဂျိုၚ်​ဂှ် မ​ဂွံ​ဒှ်​ရ။

၂၅အဲ​ဟီု​သ္ဍာံ​သၟတ်​မ္ဂး​ဂှ်။ ညး​မ​ချိုတ်​ဒၟံၚ်​တံ​ဝွံ မိၚ်​ရ​မျှာၚ်​ကောန်​ကျာ်​တုဲ ဆ​ညး​မ​မိၚ်​တံ​ဂှ် ပ​ယာံ​ကာ​လ​မ​ဂွံ​ဂျိုၚ်​လ​မျီု​ဂှ် စိုပ်​ကၠုၚ်​ရောၚ်။ လ​မုဟ်​ဂှ်​လေ စိုပ်​တုဲ​ရ။ ၂၆ဟိုတ်​မ္ဂး​ဂှ်။ မ​အံက်​ဝွံ ညံၚ်​နဲ​လ​မျီု​မ​နွံ​ဒၟံၚ်​ပ္ဍဲ​ဇ​ကု​ဂှ် ပ္ဍဲ​ကောန်​ဂှ်​လေ အ​ခေါၚ်​လ​မျီု​မ​ဂွံ​နွံပ္ဍဲ​ဇ​ကု​ဂှ် ကဵု​တုဲ​ရ။ ၂၇ပ္ဍဲ​ကောန်​ဝွံ ဟိုတ်​မ​ဒှ်​ကောန်​မၞိဟ်​တုဲ အ​ခေါၚ်​မ​ဂွံ​စဳ​ရေၚ်​သၞောဝ်​ဂှ်​လေ ပ္အပ်​ကဵု​တုဲ​ရ။ ၂၈ဒ​တိတ်​ဒ​ဒှ်​တံ​ဝွံ လ္ပ​ဒှ်​အံ​သဝ်​အိုတ်​ညိ။ ဆ​ညး​မ​နွံ​ပ္ဍဲ​သု​သာန်​အိုတ်​သီု​တံ​ဂှ် မိၚ်​ရ​မျှာၚ်​ကောန်​ကျာ်​တုဲ ၂၉ဒၞာဲ​ညး​မ​ဒ္ဂေတ်​ဒ္ဂေတ်​မ​ခိုဟ်​တံ​ဂှ် ပ္ဍဲ​ဒ​မံၚ်​လ​မျီု​မ​ဂွံ​ဂျိုၚ်​ဂှ်​လေ​ကီု​ဒၞာဲ​ညး​မ​ဒ္ဂေတ်​ဒ္ဂေတ်​မ​ယုတ်​မာ​တံ​ဂှ် ပ္ဍဲ​ဒ​မံၚ်​မ​စဳ​ရေၚ်​ဒုဟ်​ဂှ်​လေ​ကီု​ပ​ယာံ​ကာ​လ​မ​ဒး​တိတ်​ကၠုၚ်​ဂှ် စိုပ်​ဂ​တ​ဝွံ ရောၚ်။ ၃၀အဲ​ဝွံ န​ကဵု​ဇ​ကု​ဂှ် မူ​ပွ​မွဲ​မွဲပ​ဟွံ​မာန်။ အ​တိုၚ်​အဲ​မ​မိၚ်​ဂှ် အဲ​စဳ​ရေၚ်​သၞောဝ်​ရ။ ဒ​ဒှ်​အဲ​မ​စဳ​ရေၚ်​ဂှ်​လေ ညဳ​သာ​ကဵု​ဓဝ်​ရ။ ဟိုတ်​မ္ဂး​ဂှ်။ အဲ​ဝွံ ပၟိက်​ဇ​ကု​ဂှ် ဟွံ​ဗက်​ပၟိက်​မ​အံက်​မ​စ​ကာ​ဗ​လး​နၚ်​အဲ​ဂှ် အဲ​ဗက်​ရ။

၃၁အဲ​ဝွံ ဒ​တိတ်​ဒ​ဒှ်​ဇ​ကု​ဂှ် ဒုၚ်​သက်​သဳ​မ္ဂး သက်​သဳ​အဲ​ဟွံ​တန်။ ၃၂ညး​တၞဟ်​မ​ဒုၚ်​သက်​သဳ​ဒ​တိတ်​ဒ​ဒှ်​အဲ​ဂှ် မ​နွံ​မွဲ​ဇ​ကု​ရ။ သက်​သဳ​ညး​တေံ​မ​ဒုၚ်​ပ္ဍဲ​ဒ​တိတ်​ဒ​ဒှ်​အဲ​ဒ​ဒှ်​မ​တန်ဂှ်​အဲ​တီ​ရ။ ၃၃မၞး​တံ​ဝွံ စ​ကာ​ဏာ​ဇ​ရေၚ်​ယဝ်​ဟာန်​အိုတ်​တုဲ ညး​ဝွံ ဒုၚ်​သက်​သဳ​လ္ပာ်​ဓဝ်​သ​မ္မာ​ရ။ ၃၄ၜိုန်​ဂှ်​လေ သက်​သဳ​မၞိဟ်​မ​ကဵု​ဂှ် အဲ​ဟွံ​ပ​မာ​န။ ညံၚ်​မၞး​တံ​ဂွံ​စိုပ်​ဒ​ဒှ်​မ​ဟံၚ်​ပြာ်​ဂှ် ဂ​လာန်​ဝွံ အဲ​မ​ဟီု​ရ။ ၃၅ယဝ်​ဟာန်​ဝွံ ဒှ်​ပၟတ်​သ္ဍဴ​ပ္ဍေန်​တုဲ ယး​တ​မး​ဒၟံၚ်​ရ။ မၞး​တံ​ဝွံ သၟိက်​ဂွံ​မိပ်​စိုတ်​ပ္ဍဲ​လ​ယး​ညး​မွဲ​ခ​နှ​ဂှ် ပၟိက်​မ​နွံ​အိုတ်ရ။ ၃၆သက်​သဳ​ဇၞော်​လောန်​နူ​ကဵု​သက်​သဳ​ယဝ်​ဟာန်​ဂှ် နွံ​ပ္ဍဲ​အဲ​ရ။ ညံၚ်​အဲ​ဂွံ​ပ္တုဲ​ပွ​မ​အံက်​မ​ပ္အပ်​ကဵု​ပ္ဍဲ​အဲ​ဂှ် ပွ​အဲ​မ​ပ​တံ​ဝွံ ဒ​ဒှ်​မ​အံက်​မ​စ​ကာ​ဗ​လး​အဲ​ဂှ် ဒုၚ်​သက်​သဳ​လ္ပာ်​အဲ​အိုတ်​ရ။ ၃၇မ​အံက်​ဂှ်​လေ ဒုၚ်​သက်​သဳ​လ္ပာ်​အဲ​ရ။ ရ​မျှာၚ်​မ​အံက်​ဂှ် မၞး​တံ​ဟွံ​ကေၚ်​မိၚ်။ အ​ယောၚ်​အ​လာ​မ​အံက်​ဂှ်​လေ ဟွံ​ကေၚ်​ညာတ်။ ၃၈ဂ​လာန်​မ​အံက်​ဂှ်​လေ ဟွံ​တန်​ပ္ဍဲ​မၞး​တံ။ ဟိုတ်​မ္ဂး​ဂှ်။ ညး​မ​အံက်​မ​စ​ကာ​ဗ​လး​နၚ်​ဂှ် မၞး​တံ​ဝွံ ဟွံ​ပ္တေဟ်​တုဲ ဒၟံၚ်​အိုတ်​ရ။

၃၉န​ကဵု​သၠ​ပတ်​ဂှ် ဂွံ​လ​မျီု​ထာ​ဝ​ရ​ရောၚ် သာ်​ဝွံ မၞး​တံ​သ​လေဟ်​ဒၟံၚ်​ပ္ဍဲ​စိုတ်​ဂှ်​ဒှ်​တုဲ သၠ​ပတ်​ဂှ် ရံၚ်​ဗိုန်​ဗိုန်​အိုတ်​ရ။ တေံ​သၠ​ပတ်​ဂှ် ဒှ်​သက်​သဳ​အဲ​ရ။ ၄၀မၞး​တံ​ဝွံ ညံၚ်​ဂွံ​လ​မျီု​ဂှ် ဟွံ​မိက်​ကၠုၚ်​ပ္ဍဲ​ဇ​ရေၚ်​အဲ​အိုတ်။ ၄၁စ​ရာဲ​တြဳ​ဇှ်​မၞိဟ်​မ​ကဵု​ဂှ် အဲ​ဟွံ​ဒုၚ်။ ၄၂ၜိုန်​ဂှ်​လေ မေ​တ္တာ​ဇြ​ဟာန်​မ​ဆာန်​ကျာ်​ဒ​ဒှ်​ဟွံ​မွဲ​ပ္ဍဲ​မၞး​တံ​ဂှ် အဲ​တီ​ရ။ ၄၃အဲ​ဝွံ န​ကဵု​အ​ခေါၚ်​မ​အံက်​ၜိုန်​မ​စိုပ်​ကၠုၚ်​ဂှ်​လေ မၞး​တံ​ဟွံ​ဒုၚ်​တဲ​ကဵု​အဲ​အိုတ်။ န​ကဵု​အ​ခေါၚ်​ဇ​ကု​ဂှ်။ ညး​တၞဟ်​သ္အာၚ်​စိုပ်​ကၠုၚ်​မ္ဂး မၞး​တံ​ဝွံ ဒုၚ်​တဲ​ကဵု​ညး​အိုတ်​ရောၚ်။ ၄၄စ​ရာဲ​တြဳ​ဇှ်​ဇ​ကု​ကဵု​ဇ​ကု​မ​ကဵု​ဂှ် ဒုၚ်​ဒၟံၚ်​မ္ဂး စ​ရာဲ​တြဳ​ဇှ်​ကျာ်​ဂ​မျိုၚ်​မ​ကဵု​ဂှ် ဟွံ​မွဲ​ပၟိက်​တုဲ ပ​သာ်​မၞး​တံ​ပ္တေဟ်​မာန်​ရော။ ၄၅ပ္ဍဲ​ဂ​တ​မ​အံက်​ဂှ် အဲ​နၚ်​ဒုဟ်​ကဵု​မၞး​တံ​ရောၚ် သာ်​ဝွံ လ္ပ​သၠေဟ်​အိုတ်။ ညး​မ​နၚ်​ဒုဟ်​ကဵု​မၞး​တံ​ဂှ် နွံ​မွဲ​ဇ​ကု​ဏီ​ရ။ ညး​တေံ​မ္ဂး​ဂှ် မဝ်​သေဝ်​မၞိဟ်​မၞး​တံ​မ​ပ္တေဟ်​ဂှ် မ​ဂွံ​ဒှ်​ရောၚ်။ ၄၆မၞး​တံ​ဝွံ ပ္တေဟ်​ဂ​လာန်​မဝ်​သေဝ်​မ္ဂး ပ္တေဟ်​ဂ​လာန်​အဲ​ကီု​ရောၚ်။ ဟိုတ်​မ္ဂး​ဂှ်။ မဝ်​သေဝ်​ဝွံ ဒ​တိတ်​ဒ​ဒှ်​အဲဂှ်​ချူ​လဝ်​တုဲ​ရ။ ၄၇သၠ​ပတ်​ညး​မ​ချူ​လဝ်​ဂှ် မၞး​တံ​ဟွံ​ပ္တေဟ်​မ္ဂး ဂ​လာန်​အဲ​ဂှ် ပ​သာ်​ပ္တေဟ်​မာန်​ရော သာ်​ဝွံ ကဵု​မၞိဟ်​ယု​ဍ​တံ​ဂှ် တွံ​ပၟိၚ်​ရ။