ခ​ရေတ်​ဝၚ်​ယဝ်​ဟာန် ၁၂

၁ကၠာ​ဟွံ​စိုပ်​ပေါဲ​ပ​သ​ခါ​တ​ရဴ​တ္ၚဲ​ဂှ် နူ​ကၠာ​ဝွံ ချိုတ်​လောန်​အာ​တုဲ တဳ​လ​ပိုန်​မ​ကဵု​ဂျိုၚ်​တိုန်​ပ္ဍဲ​ဒေ​သ​လာ​ဇ​ရု​မ​နွံ​ကွာန်​ၝေ​သ​နိ​ဂှ် ယေ​သှု​ဝွံ က္ည​စိုပ်​ရ။ ၂ဟိုတ်​ဂှ်​ရ ညး​တံ​ဝွံ သွက်​တဳ​လ​ပိုန်​ဂှ် ပ​ဒှ်​ပေါဲ​တုဲ မာ​သ​ဝွံ ပွ​မ​ကၠောန်​ဗ္စ​ဖာပ်​ဂှ် ပ​ဒၟံၚ်​မ္ဂး လာ​ဇ​ရု​ဝွံ ဒ​လာဲ​ဒၟံၚ်​ကောံ​ကု​တဳ​လ​ပိုန်​မွဲ​စွံ​ရ။ ၃ပ္ဍဲ​ကာ​လ​ဂှ် မာ​ရိ​ဝွံ ကၠေၚ်​မြ​မောဝ်​နာ​ဒု​သ္ဍာံ​ပိ​စှ်ော​ဒ​ကေဝ်​ထိုက်​ကဵု​ၚုဟ်​ဗွဲ​မ​ဂၠိုၚ်​ဂှ် ကေတ်​နၚ်​တုဲ လံက်​ဇိုၚ်​ယေ​သှု​မ္ဂး ဂ​ဇိုတ်​ကဵု​သော်​ဇ​ကု​ရ။ မြ​မောဝ်​ကၠေၚ်​ဂှ် ပေၚ်​အ​လုံ​မွဲ​သ္ၚိ​ရ။ ၄လုပ်​ဂ​ကောံ​တွး​ဂ​မၠိုၚ်​ဂှ်​ဒှ်​တုဲ ညး​မ​ပ္အပ်​တဳ​လ​ပိုန်။ ယု​ဍ​သ​ကာ​ရုက်​ကောန်​သိ​မောန်​ဂှ်​လေ ၅တေံ​ကၠေၚ်​မြ​မောဝ်​ဂှ်။ သွံ​ကဵု​ဍေ​ဏာ​ရဳ​ပိ​ကၠံ​ဂ​တေဟ်​တုဲ ပ္ဍဲ​ကဵု​ညး​ဒိုက်​သာ​သ္ဂုတ်​သွာတ်​တံ​ဂှ် မူ​ဟိုတ်​ဟွံ​ပ​ရံ​ဗ္ဒုၚ်​ရော သာ်​ဝွံ ဟီု​ရ။ ၆ပ္ဍဲ​မ​ဟီု​သာ်​ဂှ် ရန်​ကဵု​ဒ​တုဲ​ကၟဝ်​ညး​မ​ဒိုက်​သာ​သ္ဂုတ်​သွာတ်​တံ​ဂှ်​တုဲ မ​ဟီု​ဟွံ​သေၚ်။ ဇ​ကု​ဝွံ ဒှ်​ဒၟံၚ်​က​မၠတ်​တုဲ ယိုက်​ထိုၚ်​သြန်​တွး​ဂ​မၠိုၚ်​သုၚ်​စ​ရပ်​စပ်​ဒၟံၚ်​တုဲ ဟိုတ်​မ​လေပ်​ဂၠံက်​ကေတ်​ဂှ် မ​ဟီု​ရောၚ်။ ၇ယေ​သှု​ဂှ်​လေ ဗြဴ​တေံ​ဂှ် ကဵု​မံၚ်​ရ။ ဒဵု​ကဵု​တ္ၚဲ​မ​ယိုက်​ဇွ​အဲ ကၠေၚ်​မြ​မောဝ်​ဂှ် ညး​ဒေပ်​လဝ်​တုဲ​ရ။ ၈ညး​မ​ဒိုက်​သာ​သ္ဂုတ်​သွာတ်​တံ​ဂှ် နွံ​ကောံ​ကု​မၞး​တံ​လ္အိတ်​တွဵု​အိုတ်​ရ။ အဲ​မ္ဂး​ဂှ် နွံ​ကောံ​ကု​မၞး​တံ​လ္အိတ်​တွဵု​ဟွံ​သေၚ် သာ်​ဝွံ ဟီု​ပၟိၚ်​ရ။

၉ဒ​ဒှ်​ယေ​သှု​မ​နွံ​ဒၟံၚ်​ပ္ဍဲ​ဒေ​သ​တေံ​ဂှ် မၞိဟ်​ယု​ဍ​ဗွဲ​မ​ဂၠိုၚ်​တံ​ဝွံ တီ​တုဲ ဟိုတ်​နူ​ကဵု​ယေ​သှု​မွဲ​ဂှ် မ​ကၠုၚ် ဟွံ​သေၚ် လာ​ဇ​ရု​မၞိဟ်​တဳ​လ​ပိုန်​မ​ကဵု​ဂျိုၚ်​တိုန်​နူ​ဂ​စိုတ်​ဂှ် ဟိုတ်​သၟိက်​ဂွံ​ညာတ်​တုဲ ကၠုၚ်​အိုတ်​ရ။ ၁၀-၁၁မၞိဟ်​ယု​ဍ​ဗွဲ​မ​ဂၠိုၚ်​တံ​ဝွံ န​ကဵု​လာ​ဇ​ရု​ဂှ် တိတ်​အာ​တုဲ ဟိုတ်​မ​ပ္တေဟ်​ယေ​သှု​ဂှ် ယတ်​ပ​ရော​ဟိတ်​ဇၞော်​တံ​ဝွံ ညံၚ်ဂွံ​ဂ​စိုတ်​လာ​ဇ​ရု​ကီု​ဂှ် ချပ်​ဂ​နန်​အိုတ်​ရ။

၁၂ပ္ဍဲ​တ္ၚဲ​ယး​ဂ​တ​ဒ​ဒှ်​ယေ​သှု​မ​က္ည​ကၠုၚ်​ပ္ဍဲ​ဍုၚ်​ယေ​ရု​သ​လေၚ်​ဂှ် ညး​မ​ကၠုၚ်​ပ္ဍဲ​ပေါဲ​မၞိဟ်​ဗွဲ​မ​ဂၠိုၚ်​တံ​ဝွံ ဂွံ​မိၚ်​တုဲ ၁၃ရပ်​ထာၚ်​တာ​အိုတ်​မ္ဂး တိတ်​ဝါၚ်​ဒုၚ်​တဳ​လ​ပိုန်​အိုတ်​ရ။ ကဵု​ဒှ်​ဟဵု​သာန်​ဏ​ညိ။ ပ္ဍဲ​ဨ​က​ရာတ်​ဣ​သ​ရေ​လ​ညး​မ​က္ည​ကၠုၚ်​ပ္ဍဲ​နာ​မ​ကျာ်​ထာ​ဝ​ရ​ဂှ် ကဵု​ဒှ်​မၚ်္ဂ​လ​ညိ သာ်​ဝွံ လ​ရိုအ်​က​မြဴ​အိုတ်​ရ။ ၁၄-၁၅ကၠုၚ်​ပ္ဍဲ​သၠ​ပတ်​မ္ဂး​ဂှ်။ အဵု​ကောန်​ဝုတ်​က​ညှာ​ဇိ​အောန်။ လ္ပ​ဒွိၚ်​ညိ​ဨ​က​ရာတ်​မၞး​ဝွံ ဍိုက်​မာဲ​သၟတ်​တုဲ ဒ​ဒှ်​မ​က္ည​ကၠုၚ်​ဂှ် ရံၚ်​မွဲ​ရ သာ်​ဝွံ အ​တိုၚ်​မ​ချူ​လဝ်​ဂှ် ယေ​သှု​ဝွံ ဆဵု​မာဲ​သၟတ်​တုဲ ဍိုက်​တဴ​ရ။ ၁၆ဒ​တိတ်​ဒ​ဒှ်​တေံ​ဂှ် တွး​ဂ​မၠိုၚ်​တံ​ဝွံ ပ္ဍဲ​တံ​ပ​ထ​မ​ဟွံ​ကၠိုဟ်​စိုတ်​ၜိုန်​ဒှ်​ကီု ရန်​ကဵု​တဳ​လ​ပိုန်​တုဲ ဒ​ဒှ်​မ​ချူ​လဝ်​သာ်​ဂှ်​လေ​ကီု။ ပ္ဍဲ​ကဵု​တဳ​လ​ပိုန်​ဝွံ ဒ​ဒှ်​မ​ပ​သာ်​ဂှ် အိုတ်​ဂှ်​လေ​ကီု ကာ​လ​တြဳ​ဇှ်​တဳ​လ​ပိုန်​ပြာ​ကတ်​ဂှ် ဂွံသ​တိ​တုဲ သ​မ္တီ​ဒး​အိုတ်​ရ။

၁၇မၞိဟ်​ဂ​မၠိုၚ်​မ​နွံ​ကောံ​ကု​တဳ​လ​ပိုန် ကာ​လ​မ​ကော်​လာ​ဇ​ရု​နူ​က္တိုၚ်​သု​သာန်​ဂှ် ဒ​တိတ်​ဒ​ဒှ်​တဳ​လ​ပိုန်​မ​ကဵု​ညး​ဂျိုၚ်​တိုန်​နူ​ဂ​စိုတ်​ဂှ် ဒုၚ်​သက်​သဳ​အိုတ်​ရ။ ၁၈နိ​မိတ်​လက်​သန် သာ်​ဝွံ ဒ​ဒှ်​တဳ​လ​ပိုန်​မ​ထ​ၜး​ဂှ် မၞိဟ်​ဂ​မၠိုၚ်​တံ​ဝွံ ဟိုတ်​မိၚ်​ပ​ရိုၚ်​တုဲ သၟိက်​ဂွံ​ဝါၚ်​ဒုၚ်​တဳ​လ​ပိုန်​ဂှ် တိတ်​ကၠုၚ်​အိုတ်​ရ။ ၁၉ဟိုတ်​ဂှ်​ရ မၞိဟ်​ဖာ​ရိ​သေဝ်​ဇ​ကု​ကဵု​ဇ​ကု​တံ​ဂှ် မၞး​တံ​ဝွံ ပ​ဟွံ​မာန်​သက်​သက်။ ရံၚ်​မွဲ​အိုတ်။ လော​က​ဝွံ ဗက်​အာ​လက်​က​ရဴ​ညး​တုဲ​ရ သာ်​ဝွံ ဟီု​အိုတ်​ရ။

၂၀ညံၚ်​ဂွံ​ပ​ပွ​မ​ရေဟ်​သေဟ်​ရဴ​ဂဴ​အ​ပ္ဍဲ​ညး​မ​စိုပ်​ကၠုၚ်​ပ္ဍဲ​ပေါဲ​တံ​ဂှ် မၞိဟ်​ဟေ​လ​သ​လ္ၚဵု​တံ​ဝွံ နွံ​ကီု​ရ။ ၂၁ညး​တံ​ဝွံ အာ​ဇ​ရေၚ်​ဖိ​လိ​ပ္ပု​ညး​မ​ဒှ်​ကောန်​ဍုၚ်​ၝေတ်​သာဲ​ဍ​ရး​ဂါ​လိ​လဲ​တုဲ တ​လ​အဲ။ ပိုဲ​ဍိက်​တံ​သၟိက်​ဂွံ​ညာတ်​ယေ​သှု​ညိ သာ်​ဝွံ ဟီု​ပ္တီ​အိုတ်​ရ။ ၂၂ဖိ​လိ​ပ္ပု​အာ​တုဲ ဟီု​ပၟိၚ်​ကဵု​အာ​န္ဒြေ​မ္ဂး တေံ​ညး​ၜါ​တံ​ဝွံ ဟီု​ပ္တီ ယေ​သှု​ရ။ ၂၃ယေ​သှု​ဂှ်​လေ ပ​ယာံ​တြဳ​ဇှ်​ကောန်​မၞိဟ်​ဂွံ​ပြာ​ကတ်​ဂှ် စိုပ်​ကၠုၚ်​တုဲ​ရ။ ၂၄အဲ​ဟီု​ဗွဲ​သၟတ်​မ္ဂး​ဂှ်။ မ​သြောံ​ဒ​တုံ​စှ်ေ​ပ္ဍဲ​တိ​တုဲ ဟွံ​လီု​မ္ဂး ဒၟံၚ်​ဆ​မွဲ​ရောၚ်။ လီု​မ္ဂး သတ်​ဗွဲ​မ​ဂၠိုၚ်​ဂှ် မ​လေပ်​သတ်​ရ။ ၂၅ညး​မ​ဆာန်​လ​မျီု​ဇ​ကု​ဂှ် လ​မျီု​ဒး​ဟုံ​ရောၚ်။ ညး​မ​က္ဍုဟ်​မၠေံ​လ​မျီု​ဇ​ကု​ပ္ဍဲ​လော​က​ဝွံ​ဂှ် မၚ်​မွဲ​လ​မျီု​ထာ​ဝ​ရ​ရောၚ်။ ၂၆ညး​မ​ပ္တုဲ​ကေ​စ္စ​အဲ​ဂှ် ဒး​ဗက်​လက်​က​ရဴ​အဲ​ရောၚ်။ ဒ​မံၚ်​ဒေ​သ​အဲ​မ​နွံ​ဂှ် ညး​မ​ဒုၚ်​စ​ကာ​အဲ​ဂွံ​နွံ​ကီု​ရောၚ်။ ညး​မ​ပ္တုဲ​ကေ​စ္စ​အဲ​ဂှ် မ​အံက်​အဲ​ဝွံ ထိုၚ်​သး​ညး​ရောၚ်။

၂၇ပ္ဍဲ​လ​မုဟ်​ဝွံ အဲ​ဒှ်​တဴ​လ​မောၚ်​စိုတ်​ရ။ ပ​သာ်​အဲ​ဂွံ​ပ္တီ​ညိ​ရော။ နူ​ပ​ယာံ​ဝွံ​ဂှ် ဟံၚ်​ပြာ်​အဲ​ဍိက်​ညိ​မ​အံက်။ သာ်​ဝွံ ဂွံ​ပ္တီ​ဟာ။ ဟိုတ်​နူ​ပ​ယာံ​ဝွံ​တုဲ အဲ​စိုပ်​ကၠုၚ်​ရောၚ်။ ၂၈အဵု​မ​အံက်။ နာ​မ​တဳ​လ​ဂုန်​ဂှ် ကဵု​ဒှ်​အ​ထိုၚ်​သး​ညိ သာ်​ဝွံ ဟီု​ပၟိၚ်​ရ။ ပ္ဍဲ​ကာ​လ​ဂှ် ရ​မျှာၚ်​နူ​အ​ကာ​သ​မ္ဂး​ဂှ်။ အဲ​ကဵု​ဒှ်​အ​ထိုၚ်​သး​တုဲ​ရ။ ကဵု​ဒှ်​အ​ထိုၚ်​သး​မွဲ​ဝါ​ပၠန်​ရောၚ်။ သာ်​ဝွံ မ​ကၠုၚ်​ရ။ ၂၉မၞိဟ်​ပွဳ​ဗွိုၚ်​တံ​ဝွံ မိၚ်​တုဲ ဓ​ဂဵု​ဗြု​ရောၚ် သာ်​ဝွံ ဟီု​အိုတ်​ရ။ ညး​လ္ၚဵု​တံ​ဂှ်​လေ က​လုတ်​အ​ကာ​သ​မ​ဟီု​ကဵု​ညး​ရောၚ်။ သာ်​ဝွံ ဟီု​အိုတ်​ရ။ ၃၀ယေ​သှု​ဂှ်​လေ ရ​မျှာၚ်​ဝွံ ကၠုၚ်​သွက်​ပၟိက်​အဲ​ဟွံ​သေၚ်။ ကၠုၚ်​သွက်​ပၟိက်​မၞး​တံ​ရောၚ်။ ၃၁လ​မုဟ်​ဝွံ​ဂှ် လော​က​ဝွံ ဒး​ဒုၚ်​စဳ​ရေၚ်​သၞောဝ်​ရောၚ်။ လ​မုဟ်​ဝွံ သၟီ​မ​ဂွံ​အ​ဝဵု​ပ္ဍဲ​လော​က​ဝွံ​ဂှ် ဒး​ဒုၚ်​ဗက်​ပ္တိတ်​မ္ၚး​ရောၚ်။ ၃၂အဲ​ဝွံ ဒုၚ်​ပၚ်​ပ္တိုန်​နူ​တိ​ဇၞော်​မ္ဂး မၞိဟ်​ဂ​မၠိုၚ်​တံ​ဂှ် အဲ​တံၚ်​နၚ်​ဇ​ရေၚ်​အဲ​ရောၚ် သာ်​ဝွံ ဟီု​ပၟိၚ်​ရ။ ၃၃ပ္ဍဲ​မ​ဟီု​ပၟိၚ်​သာ်​ဂှ် ပ​သာ်​ဇ​ကု​ဒး​ချိုတ်​ဂှ် ထ​ၜး​ဂၠံၚ်​ရောၚ်။ ၃၄မၞိဟ်​ဂ​မၠိုၚ်​တံ​ဂှ်​လေ ခ​ရေတ်​ဝွံ တန်​တြန်​လ္အိတ်​တွဵု​ရောၚ် သာ်​ဝွံ ဒ​ဒှ်​မ​ကၠုၚ်​ပ္ဍဲ​သၠ​ပတ်​ပ​ည​တ္တိ​ဂှ် ပိုဲ​ဍိက်​တံ​ဂွံ​မိၚ်​တုဲ​ရ။ ဒှ်​သာ်​ဂှ်​တုဲ ကောန်​မၞိဟ်​ဝွံ ဒး​ဒုၚ်​တံၚ်​ပ္တိုန်​လဝ်​ရောၚ် သာ်​ဝွံ ပ​သာ်​မၞး​ဂွံ​ဟီု​ပၠန်​ရော။ တေံ​ကောန်​မၞိဟ်​ဂှ် ညး​ဂှ်​ရော။ သာ်​ဝွံ ဟီု​အိုတ်​ရ။ ၃၅ယေ​သှု​ဂှ်​လေ လ​ယး​ဝွံ နွံ​ကောံ​ကု​မၞး​တံ​မွဲ​ခ​နှ​ရ။ ကာ​လ​လ​ယး​နွံ​ဒၟံၚ်​ဂှ် ကၠုၚ်​အာ​အိုတ်​ရ။ ဟွံ​ဒှ်​သာ်​ဂှ် ဒ​မၠု​ဝွံ ဂြောပ်​ဂ​လီု​မၞး​တံ​ရောၚ်။ ညး​မ​အာ​ပ္ဍဲ​ဒ​မၠု​မ္ဂး​ဂှ် မူ​ဒၞာဲ​ဇ​ကု​မ​အာ​ဂှ် ဇ​ကု​ဟွံ​တီ။ ၃၆ကာ​လ​လ​ယး​နွံ​ဒၟံၚ်​ညံၚ်​ဂွံ​ဒှ်​ကောန်​လ​ယး​မ္ဂး ပ္တေဟ်​လ​ယး​အိုတ် သာ်​ဝွံ ဟီု​ပၟိၚ်​ရ။ သာ်​ဝွံ ဟီု​ပၟိၚ်​တုဲ ယေ​သှု​ဝွံ ဟွံ​ကဵု​ညး​တီ​ညာတ်​မ္ဂး က္ည​တိတ်​အာ​နူ​မၞိဟ်​တံ​ဂှ်​ရ။

၃၇တေံ​နိ​မိတ်​လက်​သန်။ ဇၞော်​ဗွဲ​မ​လောန်​တံ​ဂှ် ၜိုန်​မ​ထ​ၜး​ဂ​တ​မတ်​ညး​တံ​ဂှ်​လေ ညး​တံ​ဝွံ ဟွံ​ပ္တေဟ်​တဳ​လ​ပိုန်​အိုတ်။ ၃၈ပ​ရော​ဗက်​ဟေ​သှာ​ယျ​မ​ကေၚ်​တွံ​မ္ဂး​ဂှ်။ အဵု​ကျာ်​ထာ​ဝ​ရ။ ဂ​လာန်​ပိုဲ​ဍိက်​တံ​မ​ဟီု​တွံ​တံ​ဂှ် မူ​ရဴ​ညး​မွဲ​ပ္တေဟ်​ညိ​ရော။ တဲ​ကျာ်​ထာ​ဝ​ရ​ဝွံ ပ္ဍဲ​မူ​ရဴ​ညး​မွဲ​ပြာ​ကတ်​ရော​ဂ​လာန် သာ်​ဝွံ​ဂှ် စိုပ်​ဒ​ဒှ်​မ​ဍိုက်​ပေၚ်​ရ။ ၃၉ပ​ရော​ဗက်​ဟေ​သှာ​ယျ​တွံ​မွဲ​ဝါ​ပၠန်​မ္ဂး​ဂှ်။ မတ်​ညး​တံ​ဂှ် ဟွံ​ညာတ်။ ကောန်​စိုတ်​ညး​တံ​ဂှ် ကြံၚ်​မ္ၚိုဟ်​တုဲ။ ၄၀ဒ္ဂေတ်​ဟွံ​ဂွံ​ပြံၚ်​လှာဲ။ ယဲ​ရော​ဂါ​ညး​ဂှ် ဒဵု​ကဵု​အဲ​ဟွံ​ဂွံ​ကဵု​ဗၠး​သၠး​ဂှ် မတ်​ညး​တံ​ဝွံ ကဵု​ဗ္ဒန်​အာ​ရ။ စိုတ်​ညး​တံ​ဂှ်​လေ ညး​တံ​ကဵု​ဒ​မၠု​ရ။ ဟိုတ်​နူ​ဂ​လာန် သာ်​ဝွံ တေံ​မၞိဟ်​တံ​ဂှ် စိုပ်​ဒ​ဒှ်​ပ္တေဟ်​ဟွံ​မာန်​အိုတ်။ ၄၁ဟေ​သှာ​ယျ​ဝွံ ညာတ်​တြဳ​ဇှ်​အ​နု​ဘဴ​တဳ​လ​ပိုန်​တုဲ ပ္ဍဲ​မ​ဟီု​ဒၟံၚ်​ဒ​တိတ်​ဒ​ဒှ်​တဳ​လ​ပိုန်​ဂှ် ဟီု​တွံ​ဂ​လာန်​တံ​ဂှ်​ရောၚ်။ ၄၂ၜိုန်​ဂှ်​လေ တ​လ​ယၟု​ဗွဲ​မ​ဂၠိုၚ်​တံ​ဂှ် ပ္တေဟ်​တဳ​လ​ပိုန်​အိုတ်​ရ။ မၞိဟ်​ဖာ​ရိ​သေဝ်​တံ​ဝွံ ဒ​ဒှ်​မ​ဗက်​ပ္တိတ်​နူ​ဇြပ်​ဓဝ်​ဂှ် ဟိုတ်​မ​ဒွိၚ်​တုဲ သီု​မ​ပြာ​ကတ်​ဂှ် ဟွံ​ဂံၚ်​ဒုၚ်​လ​ယိုၚ်​အိုတ်။ ၄၃ဟိုတ်​မ္ဂး​ဂှ်။ လောန်​နူ​စ​ရာဲ​တြဳ​ဇှ်​ကျာ်ဂမျိုၚ်မကဵုဂှ် စရာဲတြဳဇှ်မၞိဟ်​မ​ကဵု​ဂှ် သ္ဍိုက်​မ​လိုက်​ဗွဲ​မ​လောန်​အိုတ်​ရ။

၄၄ယေ​သှု​ဂှ်​လေ ညး​မ​ပ္တေဟ်​အဲ​တံ​ဝွံ ဆ​အဲ​ဂှ် ပ္တေဟ်​ဟွံ​သေၚ်။ ညး​မ​စ​ကာ​ဗ​လး​နၚ်​အဲ​ဂှ်​လေ ပ္တေဟ်​ကီု​ရ။ ၄၅ညး​မ​ညာတ်​အဲ​ဂှ် ညး​မ​စ​ကာ​ဗ​လး​နၚ်​အဲ​ဂှ်​လေ ညာတ်​ကီု​ရ။ ၄၆ဆ​ညး​မ​ပ္တေဟ်​အဲ​တံ​ဝွံ ညံၚ်​ဟွံ​ဒး​မံၚ်​ပ္ဍဲ​ဒ​မၠု​ဂှ် အဲ​ဒှ်​လ​ယး​မ​က္ည​ကၠုၚ်​ပ္ဍဲ​လော​က​ဝွံ​ရ။ ၄၇မိၚ်​ဂ​လာန်​အဲ​တုဲ ညး​ဟွံ​ပ္တေဟ်ဂှ် အဲ​ဟွံ​စဳ​ရေၚ်။ သွက်​ဂွံ​စဳ​ရေၚ်​ကောန်​လော​ကဳ​တံ​ဂှ် အဲ​မ​က္ည​ကၠုၚ်​ဟွံ​သေၚ်။ ညံၚ်​ဂွံ​ဟံၚ်​ပြာ်​ကောန်​လော​ကဳ​တံ​ဂှ် အဲ​က္ည​ကၠုၚ်​ရောၚ်။ ၄၈ပါဲ​အဲ​တုဲ ပ္ဍဲ​ညး​ဟွံ​ဒုၚ်​ကေတ်​ဂ​လာန်​အဲ​တံ​ဂှ် ညး​မ​စဳ​ရေၚ်​ဒုဟ်​နွံ​ဒၟံၚ်​ဏီ​ရ။ ဂ​လာန်​အဲ​မ​ဟီု​တွံ​ဂှ် ပ္ဍဲ​တ္ၚဲ​ကြဴ​အိုတ်​စဳ​ရေၚ်​ဒုဟ်​ပ္ဍဲ​မၞိဟ်​ဂှ်​ရောၚ်။ ၄၉မူ​ဟိုတ်​ရော​မ္ဂး​ဂှ်။ အဲ​ဝွံ န​ကဵု​ပၟိက်​ဇ​ကု​ဂှ် ဟီု​တွံ​ဟွံ​သေၚ်။ မ​အံက်​မ​စ​ကာ​ဗ​လး​နၚ်​အဲ​ဝွံ ပ​သာ်​အဲ​ဂွံ​ဟီု​တွံ​ဂှ် ပ္ညပ်​လဝ်​တုဲ​ရ။ ၅၀ပ​ညပ်​မ​အံက်​ဝွံ ဒ​ဒှ်​မ​ဒှ်​လ​မျီု​ထာ​ဝ​ရ​ဂှ် အဲ​တီ​ရ။ ဟိုတ်​ဂှ်​ရ ဆ​အဲမ​ဟီု​တွံ​အိုတ်​သီု​တံ​ဂှ် အ​တိုၚ်​မ​အံက်​အဲ​မ​ဗ္ကန်​လဝ်​ဂှ် အဲ​ဟီု​တွံ​ရောၚ်။ သာ်​ဝွံ က​မြဴ​တုဲ ဟီု​ပၟိၚ်​ရ။