၁ယဝ်ၜမနွံယၟုညးမွဲဂှ် မံၚ်ပ္ဍဲရးဥဇရ။ တေံညးဝွံ နွံပွစိစုံသ္တပ်လ္ဂူရ။ ဒှ်ညးမဖေက်ဒ္ညကျာ်ဂမျိုၚ်၊ ညးမပါဲဝေၚ်ဒ္ဂေတ်ဟွံခိုဟ်တံဂှ်ရ။ ၂ကောန်တြုံညးထပှ်ကဵုကောန်ဗြဴညးပိမနွံရ။ ၃ဒြပ်ညးမ္ဂးဂှ်၊ သဵုထပှ်လ္ၚီ၊ အုတ်ပိလ္ၚီ၊ ဂၠဴမသုန်ကၠံလ္ၚောဝ်၊ မာဲၝောံမသုန်ကၠံ၊ ကောန်ရဲဟွံတီလၟိဟ်နွံဗွဲမဂၠိုၚ်ဂှ်ဒှ်တုဲ၊ တေံညးဝွံ လောန်နူကောန်ရးဒေသဗၟံက်ဒှ်ညးမဇၞော်ရ။
၄ကောန်ယဝ်ၜတံဝွံ၊ ရိုဟ်ရိုဟ်သၞာံစိုပ်တ္ၚဲမဒှ်မၞိဟ်တၞဟ်တၞဟ်မ္ဂး၊ ဗဒှ်ပေါဲပ္ဍဲသ္ၚိဇကုတုဲ၊ ၝဲညးပိဂှ်လေကော်တုဲ ကေၚ်စသုၚ်ဒၟံၚ်မွဲစွံအိုတ်ရ။ ၅ကာလတ္ၚဲမဗဒှ်ပေါဲမလောန်အာဂှ်၊ ယဝ်ၜဝွံ ကော်ညးတံဂှ်တုဲ၊ ကဵုသ္အးဇ္ၚးတုဲမ္ဂး၊ က္တဵုနူဂယးပြဟ်တုဲ၊ အတိုၚ်လၟိဟ်ညးတံယတ်မစံၚ်ပၟတ်ဂှ်လေ ပူဇဴဒၟံၚ်ရ။ ဟိုတ်မ္ဂးဂှ်၊ ကောန်အဲတံဝွံ မှာအာတုဲ ပ္ဍဲကောန်စိုတ်ပါဲဝေၚ်ကျာ်ဂမျိုၚ်ဂှ်တုဲအိုတ်ရဟာ သာ်ဝွံ၊ ယဝ်ၜဗှ်သၞာရ။ သာ်ဂှ် ယဝ်ၜဝွံလေပ်ပဒၟံၚ်လ္အိတ်တွဵုရ။
၆ကောန်ကျာ်ဂမျိုၚ်တံဝွံ ညံၚ်ဂွံခစပ္ဍဲထာန်ကျာ်ထာဝရစိုပ်အခိၚ်တ္ၚဲဒးကၠုၚ်မ္ဂး၊ သာတာန်ဝွံလေ နှဴရဴကဵုညးတံတုဲကၠုၚ်ရ။ ၇ကျာ်ထာဝရဂှ်လေ၊ မၞးဝွံ မူနူဒေသမကၠုၚ်ရောသာ်ဝွံ သၟာန်သာတာန်ဂှ်မ္ဂး၊ သာတာန်ဝွံ ဂေတ်ဂၚေၚ်ပ္ဍဲလတူတိဇၞော်တုဲ ကၠုၚ်နူအပ္ဍဲပွမအာကၠုၚ်ဇၟာပ်ဇၟာပ်ဒေသရသာ်ဝွံ ကလေၚ်ပ္တီရ။ ၈ကျာ်ထာဝရဝွံလေ၊ ဍိက်အဲယဝ်ၜဂှ် ဗစာရနာတုဲရဟာ။ ပ္ဍဲလတူတိဇၞော်ညးမတုပ်သၟဟ်ကဵုညးဆမွဲဟွံမွဲ။ စိစုံသ္တပ်လ္ဂူရ။ ဒှ်ညးမဖေက်ဒ္ညကျာ်ဂမျိုၚ်၊ ညးမပါဲဝေၚ်ဒ္ဂေတ်ဟွံခိုဟ်ဂှ်ရသာ်ဝွံ ကျာ်ထာဝရဟီုပၟိၚ်ပ္ဍဲသာတာန်ရ။ ၉သာတာန်ဂှ်လေ၊ ယဝ်ၜဝွံ ဟွံဂွံဂုန်တုဲ ပဝတ်ကဵုကျာ်ဟာ။ ၁၀တဳလဂုန်ဝွံ မပ္တံကဵုဇကုညးတုဲ၊ ပ္ဍဲပွဳဗွိုၚ်သ္ၚိညးကဵုဒြပ်ညးဆမနွံမၚ်မွဲစဵုဗ္ဒန်လဝ်ရဟွံသေၚ်ဟာ။ ဆညးမပတံဂှ် ကဵုပသေက်ပသဝ်တုဲရ။ မပ္တံကဵုသဵုဂၠဴညးတိရစ္ဆာန်တံဝွံ တောတက်ဂၠိုၚ်တိုန် ပ္ဍဲလတူတိဇၞော်ဗွဲမလောန်အိုတ်တုဲရ။ ၁၁လၟုဟ်မ္ဂးဂှ်၊ ပၠးတဲတဳလဂုန်တုဲ၊ ဒြပ်ညးဆမနွံတံဂှ် ဒိဒးမ္ဂး၊ ညးဝွံ ပ္ဍဲဂတမုက္ခဝါ၊ ပါဲထောံတဳလဂုန်ရောၚ်သာ်ဝွံ ကလေၚ်ပ္တီကျာ်ထာဝရရ။ ၁၂ကျာ်ထာဝရဂှ်လေ၊ ဒြပ်ညးဆမနွံဂှ် နွံပ္ဍဲတဲမၞးရ။ ဆဇကုညးမွဲကီုလ္ပဒိဒးညိ သာ်ဝွံ ဟီုပၟိၚ်မ္ဂး၊ သာတာန်ဝွံ တိတ်အာနူကျာ်ထာဝရရ။
၁၃ပ္ဍဲကာလမွဲတ္ၚဲကောန်တြုံကောန်ဗြဴယဝ်ၜတံဝွံ စပ္ဍဲသ္ၚိကောဇၞော်တုဲ ကာလသုၚ်ဒၟံၚ်ဍာ်ဇဗျေတ်အိုတ်ဂှ်၊ ၁၄ကလုတ်မွဲကၠုၚ်ပ္ဍဲထာန်ယဝ်ၜတုဲ၊ ဂၠဴတံဝွံ ထဲတိတုဲ၊ ပ္ဍဲဇရေၚ်ညးတံမာဲၝောံတံဝွံ ကာလမစဒၟံၚ်စဏအိုတ်ဂှ်၊ ၁၅ကောန်ဂကူသှေၜတံဝွံ ဗတိုက်ကေတ်ဏာအိုတ်တုဲရ။ မၞိဟ်ဒုၚ်စကာတံဂှ်လေ ဂစိုတ်ကဵုသ္ဇၚ်တုဲ၊ သိဟ်ဒၟံၚ်အဲဍိက်ညးမွဲတုဲ၊ ဂွံဟီုပရိုၚ်ပ္ဍဲတဳလဂုန်ရသာ်ဝွံ ပ္တီရ။ ၁၆ကာလမပ္တီဒၟံၚ်သာ်ဂှ်၊ ညးတၞဟ်သ္အာၚ်မွဲဝွံ ကၠုၚ်တုဲ၊ ပၟတ်ကျာ်ဂမျိုၚ်ဝွံ စှ်ေနူအကာသတုဲ၊ သဵုဂမၠိုၚ်ကဵုမၞိဟ်ဒုၚ်စကာဂမၠိုၚ်တံဂှ် တူတုဲ၊ ညးတံဝွံ သ္ၚေက်အိုတ်တုဲရ။ သိဟ်ဒၟံၚ်အဲဍိက်ညးမွဲတုဲ၊ ဂွံဟီုပရိုၚ်ပ္ဍဲတဳလဂုန် ရသာ်ဝွံ ပ္တီရ။ ၁၇ကာလမပ္တီသာ်ဂှ်၊ ညးတၞဟ်သ္အာၚ်မွဲကၠုၚ်တုဲ၊ ကောန်ဂကူခါလဍာဲပိဒပ်တံဝွံ ဇက်ကၠုၚ်တုဲ၊ အုတ်တံဂှ် ဗတိုက်ကေတ်ဏာတုဲ အိုတ်ရ။ မၞိဟ်ဒုၚ်စကာတံဂှ်လေ ဂစိုတ်ကဵုသ္ဇၚ်တုဲ၊ သိဟ်ဒၟံၚ်အဲဍိက်မွဲတုဲ၊ ဂွံဟီုပရိုၚ်ပ္ဍဲတဳလဂုန်ရ သာ်ဝွံ ပ္တီရ။ ၁၈ကာလမဟီုပ္တီသာ်ဂှ်၊ ညးတၞဟ်သ္အာၚ်မွဲကၠုၚ်တုဲ၊ ကောန်တြုံကောန်ဗြဴတဳလဂုန်တံဝွံ စပ္ဍဲသ္ၚိကောဇၞော်တုဲ ကာလမသုၚ်ဒၟံၚ်ဍာ်ဇဗျေတ်အိုတ်ဂှ်၊ ၁၉ကျာဇၞော်ကၠုၚ်နူဂြိုပ်တုဲ ဗတိုက်သ္ၚိပန်ဒကဴမ္ဂး၊ သ္ၚိဝွံ ဒေါံလာ်စှ်ေပ္ဍဲလတူမၚ်ဗၠာဲတေံဂှ်ရ။ ညးတံဝွံ ချိုတ်တုဲ၊ သိဟ်ဒၟံၚ်အဲဍိက်ညးမွဲတုဲ၊ ဂွံဟီုပရိုၚ်ပ္ဍဲတဳလဂုန်ရသာ်ဝွံ ပ္တီရ။ ၂၀ကာလဂှ် ယဝ်ၜဝွံ က္တဵုတုဲ၊ ယာတ်ဇကုဂှ် ဂစာ်ရ။ သော်ဂှ်လေကးတုဲ အောပ်မာပ္ဍဲလတူတိတုဲ၊ ရေဟ်သေဟ်တုဲမ္ဂး၊ အဲဝွံ ဟွံမွဲဗွိုက်လတက်တုဲ သၠးတိတ်ကၠုၚ်နူဂၠံဂဝ်မိရ။ ၂၁ဟွံမွဲကဵုဗွိုက်လတက်တုဲ ကလေၚ်စဴအာပ္ဍဲဂၠံဂဝ်မိပၠန်ရောၚ်။ ကျာ်ထာဝရကဵုရ။ ကျာ်ထာဝရလေ ရုပ်သီတဴရ။ နာမကျာ်ထာဝရဝွံ ကဵုနွံမၚ်္ဂလညိသာ်ဝွံ ဟီုရ။ ၂၂ယဝ်ၜဝွံ ၜိုန်မဒးဆဵုအမှုဂမၠိုၚ်ဝွံဂှ်လေ ဟွံမှာရာအာ။ ပ္ဍဲကျာ်ထာဝရဂှ် ဟွံနၚ်ဒုဟ်တုဲ မံၚ်ရ။