၁-၂မွဲဝါပၠန်ဨလိဟုဆက်တုဲ ဟီုတွံမ္ဂးဂှ်၊ ညးမနွံပညာဂွံတီဂွံမိၚ်ဂၠိုၚ်တံဂလာန်အဲဂှ် ကလၚ်ဒုၚ်ကေတ်အိုတ်ရ။ ၃ခဍောၚ်ကအ်ညံၚ်နဲမစေပ်စဏဂှ် က္တောဝ်မလေပ်စံၜတ်ဂလာန်ရ။ ၄ပိုဲညးတံဝွံ သွက်ဇကုဂှ် စၟဳစၟတ်တုဲ၊ စဳရေၚ်ဗဗွဲဓဝ်အိုတ်စိုအ်။ အရာမခိုဟ်ဂှ် နကဵုဇကုသမ္တီအိုတ်စိုအ်။ ၅ယဝ်ၜဝွံ၊ အဲသ္တပ်လ္ဂူရ။ ကျာ်ဂမျိုၚ်ကဵုအဲကျအမှုရ။ ၆အဲဝွံ တၞံနသၟိက်ကဵုဂုန်ဇကုလီုဂှ် ဒးဟီုဂလာန်မုသာရောၚ်ဟာ။ ၜိုန်အဲဟွံမှာရာဂှ်လေ၊ ယဲရောဂါဗၠးဟွံမာန်ဂှ် သၞေန်စပ်ရသွံ သာ်ဝွံ ဟီုဒးတုဲရ။ ၇ညးမတုပ်ကဵုယဝ်ၜယြဴညးမွဲမွဲနွံရောၚ်ဟာ။ ညံၚ်နဲမသုၚ်ဍာ်မလေပ်ၚိတ်ဖျေံအရာမပစရဵုဂှ်ရ။ ၈ပံၚ်ဖက်ကဵုညးဟွံမွဲကဵုဒ္ဂေတ်ဗဗွဲဓဝ်တံဂှ်တုဲ၊ လေပ်အာကၠုၚ်ကဵုမၞိဟ်သၟာ်တံဂှ်ရ။ ၉မၞိဟ်ဝွံ မိပ်ဇြိပ်ပ္ဍဲကျာ်ဂမျိုၚ်တုဲ၊ ဂုန်ဟွံမွဲသာ်ဝွံ ယဝ်ၜဟီုဒးတုဲရ။ ၁၀ဒှ်သာ်ဂှ်တုဲ ညးပညာမခိုဟ်တံ၊ ဂလာန်အဲဂှ် ကလၚ်အိုတ်ရ။ ဒုစရိုတ်ဝွံ ကဵုကျာ်ဂမျိုၚ်ဂှ်လေကီု၊ ဒုဟ်ဝွံ ကဵုတလဣဓိအနန္တဂှ်လေကီုကဵုသ္ၚဲညိ။ ၁၁ဒုဟ်ဒတုဲကၟဝ် ပွမၞိဟ်မပဂှ် တဳလပိုန်ကဵုဒုၚ်ရောၚ်။ ဇၟာပ်မၞိဟ်ကြိုက်ကဵုဒုဟ်ဇကုမဒ္ဂေတ်ကဵုဒုၚ်ရောၚ်။ ၁၂ဒှ်ကွေံသ္ဍာံသၟတ်ကျာ်ဂမျိုၚ်ဝွံ ဒုစရိုတ်ဂှ် ဟွံပ၊ တလဣဓိအနန္တဝွံ ဟွံမွဲကဵုဗဗွဲဓဝ်တုဲ ဟွံစဳရေၚ်။ ၁၃တိဇၞော်ဂှ် မူရဴညးမွဲပအပ်ပ္ဍဲကျာ်ဂမျိုၚ်ရော။ လောကဓါတ်အိုတ်သီုဂှ် မူရဴညးမွဲစဳရေၚ်ပြုပြေၚ်ရော။ ၁၄ကျာ်ဂမျိုၚ်ဝွံ ဟွံမွဲပၟိက်ကဵုမၞိဟ်တုဲ၊ လမျီုဝိညာန်မၞိဟ်ဂှ် ရုပ်သီဏာမ္ဂး၊ ၁၅မၞိဟ်သတ္တံအိုတ်သီုတံဝွံ ချိုတ်ကၠေံဗွဲပြဟ်တုဲ၊ ဒးစိုပ်ပ္ဍဲခၞိက်တိမွဲဝါပၠန်ရောၚ်။ ၁၆လၟုဟ်မ္ဂးဂှ် မၞးဝွံ နွံညာန်ဂှ်ဒှ်တုဲ စၚ်ခြၚ်ကၠာရ။ ရမျှာၚ်ဂလာန်အဲဂှ် ကလၚ်ကၠာရ။ ၁၇ညးမက္ဍုဟ်မၠေံဓဝ်ဂှ် ဂွံအဝဵုရောၚ်ဟာ။ စဳရေၚ်ဗဗွဲဓဝ်တုဲ ပ္ဍဲညးမဇၞော်ကဵုဣဓိဂှ် ဂပ်ဂေါဝ်နၚ်ဒုဟ်ဟာ။ ၁၈မၞးဝွံ ဒှ်မၞိဟ်တမြံရောၚ်သာ်ဝွံ ပ္ဍဲဨကရာတ်ဂှ်လေကီု၊ မၞးတံဝွံ ဒှ်မၞိဟ်အဓမ္မအိုတ်ရသာ်ဝွံ ပ္ဍဲသၟီတံဂှ်လေကီုဂပ်ဂေါဝ်ဟီုဟာ။ ၁၉လောန်နူဂှ်၊ ရန်ကဵုမုက္ခဝါသၟီတုဲ ဟွံရံၚ်၊ လောန်နူမညှာစိုတ်ကောန်တလဒဒိုက်၊ ပ္ဍဲကျာ်ဂမျိုၚ်ဟွံညှာစိုတ်တလတသိုက်ဂှ် ဟွံဂပ်ဂေါဝ်ဟီုရဟွံသေၚ်ဟာ။ ကျာ်ဂမျိုၚ်ဝွံ သတ္တံအိုတ်သီုဂှ် က္တဵုဗဒှ်လဝ်တုဲရ။ ၂၀ပ္ဍဲမွဲချိုန်ခဏဂှ် သတ္တံဝွံ မလေပ်ချိုတ်အိုတ်ရ။ ပ္ဍဲအခိၚ်သ္ဂာတ္ၚဲမၞိဟ်မွဲမွဲဂကူချဳဒရာၚ်ကၠေံဗ္ဒန်အာတုဲ၊ ညးမဇၞော်ကဵုဒြဟတ်ဂှ်လေ၊ မူရဴညးမွဲဟွံပတုဲ မလေပ်စိုတ်ပ္ဍဲမပါဲစလးကၠေံအိုတ်ရ။ ၂၁ဟိုတ်မ္ဂးဂှ်၊ ပ္ဍဲဂၠံၚ်မၞိဟ်မအာတံဂှ် ကျာ်ဂမျိုၚ်ရံၚ်စံၚ်တုဲ၊ ဒၞာဲဇိုၚ်မၞိဟ်ဆမနွံတံဂှ် ညာတ်ရ။ ၂၂အရာဒမၠုမအောပ်ဗ္ဒန်၊ ညးမဒ္ဂေတ်ဟွံမွဲကဵုဗဗွဲဓဝ်၊ သၞိၚ်သၟီဂမ္စိုတ်ဆမွဲမွဲဟွံမွဲ။ ၂၃ပ္ဍဲဂတကျာ်ဂမျိုၚ်ကာလမၞိဟ်မဒးဒုၚ်စဳရေၚ်သၞောဝ်၊ သၟိက်ဂွံစၟဳစၟတ်ထပ်ကဵုထပ်ဟွံမွဲ၊ ၂၄ညးမဇၞော်ကဵုဒြဟတ်တံဂှ်လေ ဟွံစၟဳစၟတ်ဝးပလီုတုဲ၊ ပ္ဍဲဒၞာဲညးတံခါန်ကၞက်လဝ်ညးတၞဟ်သ္အာၚ်ရ။ ၂၅ဒှ်သာ်ဂှ်တုဲ ဆညးတံမပဂှ် တီတုဲ ဒမၠုဗ္တံဂှ် ကဵုစိုပ်တုဲ ပလီုပလာ်ရ။ ၂၆-၂၇ဟိုတ်နူဒုဟ်ညးတံကဵုဒန်ပ္ဍဲဂတပူရိသာတ်ရ။ ဟိုတ်မ္ဂးဂှ် ညးတံဝွံ ကယျာန်ပါဲကျာ်ဂမျိုၚ်အိုတ်ရ။ အမှုတဳလပိုန်မပတံဂှ် ဟွံစၚ်ခြၚ်လးလးအိုတ်။ ၂၈ဟိုတ်မပသာ်ဂှ် ရမျှာၚ်ကောန်တလဒဒိုက်တံလရိုအ်ဂှ် တိုန်ပ္ဍဲဂတကျာ်တုဲ၊ ရမျှာၚ်ညးဒးဒုၚ်ပယဲခရဂှ် မိၚ်ရ။ ၂၉ကျာ်ဂမျိုၚ်ဝွံ ကဵုလလံသွာမ္ဂး၊ မူရဴညးမွဲကၞုက်ကၞာဲမာန်ရော။ ဖျေၚ်ကၠေံမုက္ခဝါမ္ဂး အိုတ်မွဲဂကူကဵုဒှ်၊ ဆညးမွဲကဵုဒှ်၊ မူရဴညးမွဲညာတ်မုက္ခဝါကျာ်မာန်ရော။ ၃၀သာ်ဂှ် ညံၚ်ဟွံဂွံမှာရာပ္ဍဲကောန်တလဒဒိုက်တံဂှ်၊ သၟီအဓမ္မတံဂှ် ဖျဝ်ဖျေံရ။
၃၁-၃၂အဲဍိက်ဝွံ ဂွံဒုၚ်ဝေတ်ဗ္တောန်တုဲရ။ ကြဴမွဲဝါဟွံမှာရာရ။ အရာအဲဍိက်ဟွံကၠိုဟ်စိုတ်တံဂှ် ဗ္တောန်ညိ။ ပဒးဒုစရိုတ်ဂှ်တုဲ၊ ကြဴမွဲဝါဟွံပတုဲ မံၚ်ရောၚ် သာ်ဝွံ ဂပ်ဂေါဝ်ဟီုပ္တီပ္ဍဲကျာ်ဂမျိုၚ်ရဟွံသေၚ်ဟာ။ ၃၃မၞးဝွံ ကယျာန်ပါဲတုဲ ကဵုဒှ်ရုဲကေတ်ကဵုဒှ်၊ ကျာ်ဂမျိုၚ်ဗက်ပ္တိတ်စိုတ်မၞးတုဲ၊ ဟွံဗက်ပၟိက်စိုတ်တုဲ ဒးကဵုဒုဟ်ဒန်ရောၚ်ဟာ။ ဒှ်သာ်ဂှ်မ္ဂး၊ အတိုၚ်မကၠိုဟ်စိုတ်ဟီုညိ။ ၃၄ညးညာန်ခိုဟ်တံဂှ် ကဵုဟီုဂလာန်ညိ။ ညးနွံပညာတံဝွံ ဂလာန်အဲဂှ် ကဵုကလၚ်ညိ။ ၃၅ယဝ်ၜဝွံ ဟွံကၠိုဟ်စိုတ်တုဲ ဟီုဒးတုဲရ။ ဂလာန်ညးမဟီုဂှ် ဂလာန်ပညာဟွံသေၚ်။ ၃၆ယဝ်ၜဝွံ ညံၚ်နဲညးဟွံမွဲကဵုဗဗွဲဓဝ်ဟိုတ်မလေပ်ဟီုဂှ်၊ ဒဵုကဵုအိုတ်ကၞောတ်ညံၚ်ဂွံစံၜတ်ဂှ် အဲနွံပၟိက်ရ။ ၃၇လောန်နူမပဒုစရိုတ်၊ ဒုဟ်ပသပုန်နွံဏီရ။ ပေါဲဇၞးဂှ် ပ္ဍဲပိုဲတုဲ၊ နကဵုဂလာန်မှာရာကျာ်ဂမျိုၚ်ဂှ် လေပ်ဟီုဗွဲလောန်ရသာ်ဝွံ ဟီုတွံရ။