၁ကျာ်ထာဝရဝွံ နူအပ္ဍဲတာဲဒမံၚ်မပကောံဓရီု၊ နွံအသံကော်မဝ်သှေတုဲ။ ၂မၞးဝွံ ဒးဟီုပၟိၚ်ကဵုကောန်ဂကူဣသရေလတံမ္ဂးဂှ်၊ ပ္ဍဲမၞးတံယြဴညးမွဲသၟိက်ဂွံပပူဇဴသကာပ္ဍဲကဵုကျာ်ထာဝရမ္ဂး နူကဵုဒကံဂၠဴ၊ ဒကံသဵုဗၜေံတံဂှ် ဒးဆက်ကဵုတိရစ္ဆာန်ရောၚ်။
၃ပပူဇဴကဵုဂၠဴစံၚ်ကဵုပၟတ်ယဝ်ရသဒှ်၊ ကၟက်ဟွံမွဲကဵုဒုဟ်ကေတ်တုဲ၊ တၞံနသၟိက်ဂွံဆဵုဒးကဵုစိုတ်ကျာ်ထာဝရဂှ်၊ ပ္ဍဲဇရေၚ်တရၚ်တာဲဒမံၚ်မ ပလောံဓရီုဒး ဆက်ကဵုရောၚ်။ ၄ပ္ဍဲလတူက္ဍိုပ်ဂၠဴမပူဇဴဂှ် ပ္တိုန်တဲဇကုမ္ဂး၊ ညံၚ်ဂွံပရေဒုဟ်ညးကျာ်ဒုၚ်တဲရောၚ်။ ၅ပ္ဍဲဂတကျာ်ထာဝရဂှ် ဂစိုတ်ဂၠဴဂှ်တုဲမ္ဂး၊ ကောန်အာရောန်၊ ယတ်ပရာဟိတ်တံဝွံ ကေတ်ဆီတုဲ၊ ဒးဖရဲဝုတ်ဒိုဟ်ပ္ဍဲလတူပၞၚ်ယတ်မနွံပ္ဍဲဇရေၚ်တရၚ်တာဲဒမံၚ်မဂကောံဓရီုဂှ်ရောၚ်။ ၆မၞိဟ်မပူဇဴဝွံ သံက်သၞာံယတ်ဂှ်တုဲ၊ ဒးဒန်ဒကုတ်ဒကုတ်ရောၚ်။ ၇ကောန်အာရောန် ယတ်ပရောဟိတ်တံဝွံ စုတ်ပၟတ်လတူပၞၚ်ယတ်ဂှ် မ္ဂး၊ ပ္တိုန်စွံလဝ်အောဟ်ပ္ဍဲလတူပၟတ်တုဲ၊ ၈ပ္ဍဲလတူအောဟ်က္ဍိုပ်ကၠေၚ်၊ ဖျုန် ဒကုတ်ဒကုတ်ဂမၠိုၚ်တံဂှ် ဒးပ္တိုန်လဝ်ရောၚ်။ ၉ကြုတ်ဍေံ၊ ဒးကြာတ် ကဵုဍာ်ရောၚ်။ ယတ်ပရောဟိတ်ဝွံ တေံယတ်သီုဖအိုတ်ဂှ် ဒးစံၚ်ကဵုပၟတ်ပ္ဍဲလတူပၞၚ်ယတ်ရောၚ်။ ဒှ်ယတ်မစံၚ်ပၟတ်ရောၚ်။ ပ္ဍဲကဵုကျာ်ထာဝရဆက်ဗ္ဂိန်တုဲ၊ ဒှ်ယတ်မနွံအမြာဲမြမောဝ်ရောၚ်။
၁၀ပပူဇဴကဵုသဵု ဗၜေံစံၚ်ကဵုပၟတ် ယဝ်ရသဒှ်၊ ကၟက်ဟွံမွဲကဵုဒုဟ် ကေတ်နၚ်တုဲ၊ ၁၁ပ္ဍဲဂတကျာ် ထာဝရပ္ဍဲယတ်ဒိုဟ်သၟတ်ကျာ်ဂှ် ဂစိုတ်တုဲမ္ဂး၊ ကောန်အာရောန်ယတ်ပရောဟိတ်တံဝွံ ဝုတ်ဒိုဟ်ပၞၚ်ယတ် ပ္ဍဲလတူဒးဖရဲဆီရောၚ် ၁၂မၞိဟ်မပူဇဴသကာဝွံ ဒန်ဒကုတ်ဒကုတ်တုဲ၊ က္ဍိုပ်ကဵုကၠေၚ်ပကောံထဝ်တုဲမ္ဂး၊ ယတ်ပရောဟိတ်ဝွံ ပ္ဍဲလတူ အောဟ်ပၟတ် မနွံလတူပၞၚ်ယတ်ဂှ် ဒးလးရောၚ်။ ၁၃ကြုတ်ကဵုဇိုၚ်တံဂှ် ဒးကြာတ်ကဵုဍာ်ရောၚ်။ ယတ်ပရောဟိတ်ဝွံ ကေတ်နၚ်တေံယတ်သီုဖအိုတ်တံဂှ်တုဲ၊ ပ္ဍဲလတူပၞၚ်ယတ်ဒးစံၚ် ကဵုပၟတ်ရောၚ်။ ဒှ်ယတ်မစံၚ် ပၟတ်ရောၚ်။ ပ္ဍဲကဵုကျာ်ထာဝရဆက်ဗ္ဂိန်တုဲ ဒှ်ယတ်မနွံအမြာဲမြမောဝ်ရောၚ်။
၁၄ပပူဇဴဂစေံမစံၚ်ကဵုပၟတ်ပ္ဍဲကဵုကျာ်ထာဝရယဝ်ရသဒှ်၊ ဖရာပ် သၟတ်ကဵုဒှ်၊ ပူကဵုဒှ်ကေတ်နၚ်တုဲ ဒးဆက်ကဵုရောၚ်။ ၁၅ယတ်ပရောဟိတ်ဝွံ ကေတ်နၚ်ပ္ဍဲပၞၚ်ယတ်တုဲ၊ ဝတ် ဒပိုတ်က္ဍိုပ်တုဲမ္ဂး၊ ဒးစံၚ်ကဵုပၟတ် ပ္ဍဲလတူ ပၞၚ်ယတ်ရောၚ်။ ဆီဂှ် ဒးပတ်စုတ်ပ္ဍဲဇရေၚ်ပၞၚ်ယတ်ရောၚ်။ ၁၆ဖျေဲသီုကဵုအရာမနွံပ္ဍဲဖျေဲဂှ် ကေတ်ပ္တိတ်တုဲ၊ ပ္ဍဲဒၞာဲမဗဝ်ပ္တေၚ်၊ ပ္ဍဲဇရေၚ်ပၞၚ်ယတ်ဒိုဟ်ဗၟံက်ဂှ် ဒးထောံဖျေံရောၚ်။ ၁၇သီုကဵုသၞေၚ်ဂၜိဟ်ပံက်တုဲ၊ ယတ်ပရောဟိတ် ဝွံပ္ဍဲလတူပၟတ်မနွံလတူပၞၚ်ယတ်ဒးစံၚ်ပၟတ်ရောၚ်။ ဒှ်ယတ်စံၚ်ပၟတ်ရောၚ်။ ပ္ဍဲကဵုကျာ်ထာဝရဆက်ဗ္ဂိန်တုဲ၊ ဒှ်ယတ်မနွံအမြာဲမြမောဝ်ရောၚ်။