၁ဂလာန်ပျးဒိုဟ်ကျာ်ထာဝရမကဵု ပ္ဍဲဂကူဣသရေလပ္ဍဲတဲမာလခိဂှ် မိဂ္ဂးရောၚ်။ ၂ဂလာန်ကျာ်ထာဝရမဟီုပၟိၚ်မ္ဂးဂှ်၊ အဲဆာန်မၞးတံတုဲရ။ ပသာ်တဳလပိုန်မဆာန် ပိုဲဍိက်တံရော သာ်ဝွံ မၞးတံသၟာန်မ္ဂး၊ ဨသဝ်ဝွံ မဒှ်ကောယျာကောပ်ဟွံသေၚ်ဟာ။ ၜိုန်ဂှ်လေ ယျာကောပ်ဂှ် အဲဆာန်ရ။ ၃ဨသဝ်ဂှ် အဲက္ဍုဟ်တုဲ ဒဵုညးမမံၚ်ဂှ် အဲကဵုဒှ်လလေၚ်ရ။ တိညးမဒုၚ်အာဲကၟာဲဂှ် အဲပ္အပ် ကဵု ပ္ဍဲကၠဵုကၠိၚ်ရ သာ်ဝွံ ကျာ်ထာဝရဟီုပၟိၚ်ရ။ ၄ကောန်ဂကူဨဍောမ်တံဝွံ၊ ပိုဲညးတံဝွံ လီုအာၜိုန်ဒှ်ကီုဒေသမလီုအာဂှ် ပိုဲညးတံကလေၚ်ဒက် ပ္တန်မွဲဝါပၠန်ရောၚ် သာ်ဝွံ ဟီုတုဲ၊ ကျာ်ထာဝရတလဗဵုလဗးအကာသဟီုပၟိၚ်မ္ဂးဂှ်၊ ညးတံဝွံ ဒက်ပ္တန်ၜိုန်ဒှ်ကီုအဲပလီုပလာ်ရောၚ်။ ညးတံဂှ် ကောန်ရးဒုစရိုတ်၊ ဂကူမၞိဟ်ပၞောတ် ကျာ်မတိတ် တွဵု သာ်ဝွံ မၞိဟ် ဂမၠိုၚ်ကော်ခဴရောၚ်။ ၅ကာလမၞးတံမညာတ်တေံပွဂှ် ကျာ်ထာဝရဝွံ ဇၞော်ကဵုဣဓိတြဳဇှ်မ္ၚးရးဣသရေလရ သာ်ဝွံ ဟီုအိုတ်ရောၚ်။
၆ကောန်ဝွံ မလေပ်အဲပရဲမရ၊ ဍိက်ဝွံ မလေပ်ဖေက်နာဲရ၊ ယဝ်ရအဲဒှ်မသ္ဍာံမ္ဂး၊ မူရဴညးမွဲမအဲပရဲ အဲရော။ ယဝ်ရအဲဒှ်နာဲသ္ဍာံမ္ဂး၊ မူရဴညးမွဲမဖေက်ဒၟံက်အဲရော သာ်ဝွံ ကျာ်ထာဝရတလဗဵုလဗးအကာသမသၟာန်ပ္ဍဲယတ်ပရောဟိတ်ဟွံပမာနကဵုနာမအဲတံဂှ်ရ။ ပိုဲဍိက်တံဝွံ ပသာ်ဟွံပမာန ပ္ဍဲနာမတဳလပိုန် ရော သာ်ဝွံ မၞးတံသၟာန်တုဲ၊ ၇စဏစမကၠိပပ်မၞးတံမပလံၚ်နၚ်ပ္ဍဲပၞၚ်ယတ်အဲရသွံ။ ပိုဲဍိက်တံဝွံ ပသာ်မပျုတ်ဖျေဟ်တဳလပိုန်ရော သာ်ဝွံ သၟာန်တုဲ၊ လ္ဗံက်ကျာ်ထာဝရမယုတ်မာ သာ်ဝွံ ဟိုတ်မဟီုဂှ် မပျုတ်ဖျေဟ်အဲအိုတ်ရ။ ၈သတ်မတ်ကၠက်ဂှ် ပူဇဴယတ်မ္ဂး ဒုဟ်နွံဟွံသေၚ်ဟာ။ သတ်ဇိုၚ်ခေံကဵုသတ်မနွံယဲသရဂှ် ပူဇဴယတ်မ္ဂး ဒုဟ်နွံဟွံသေၚ်ဟာ။ ပ္ဍဲကဵုဒကိုပ်ဍုၚ်ဂှ် ဆက်ကဵုညိ။ ဒးကဵုစိုတ်သၟီရောၚ်ဟာ။ သၟီရံၚ်မွဲမုက်မၞးတံဟာ သာ်ဝွံ ကျာ်ထာဝရတလဗဵုလဗးအကာသဟီုပၟိၚ်ရ။ ၉လၟုတ်ဝွံ ညံၚ် ကျာ်ဂမျိုၚ် ဂွံဆာန်ဍူ ဟံၚ်ပြာ် ပိုဲညးတံဂှ် ဒုၚ်ဂုန်ပ္ဍဲဂတ ကျာ်ထာဝရအိုတ်ညိ။ ဟိုတ်မၞးတံမဒုၚ်တဲဂှ် မဒှ် သာ်ဝွံ ရ။ ဒးရံၚ်မုက်မၞးတံရောၚ်ဟာ သာ်ဝွံ ကျာ်ထာဝရတလဗဵုလဗးအကာသမဟီုပၟိၚ်ရ။ ၁၀ပ္ဍဲမၞးတံဂှ် မူရဴ ညးမွဲမဂွံပံက်တရၚ်အဲတံဂှ် ရော။ မၞးတံဝွံ ပ္ဍဲလတူ ပၞၚ်ယတ်အဲဂှ် ဟွံဒးပ္ဍေန် ပၟတ်သမးသမးအိုတ်။ မၞးတံဂှ် အဲပၟိက်ဟွံမွဲ။ ပူဇဴသကာမၞးတံမပဂှ် အဲဟွံဒုၚ်တဲ သာ်ဝွံ ကျာ်ထာဝရတလဗဵုလဗးအကာသဟီုပၟိၚ်ရ။
၁၁နူကဵုဒေသတ္ၚဲမတိုန်ကဵုဒေသတ္ၚဲမပၠိုတ်အာဂှ် ပ္ဍဲကောန်ဂကူတၞဟ်သ္အာၚ်တံဂှ် နာမအဲမဇၞော်ပြဲရ။ ပ္ဍဲဇၟာပ်ဇၟာပ်ဒေသတံဂှ် ဂကူမြမောဝ်စံၚ်ပၟတ် ပ္ဍဲနာမအဲတုဲ၊ ပူဇဴသကာမသ္အးဇ္ၚးဂှ် ဂွံဆက်ဗ္ဂိန်အိုတ်ရောၚ်။ နာမအဲဝွံ ပ္ဍဲကောန်ဂကူတၞဟ်သ္အာၚ်ဇၞော်ပြဲရ သာ်ဝွံ ကျာ်ထာဝရတလဗဵုလဗးအကာသဟီုပၟိၚ်ရ။ ၁၂မၞးတံဝွံ၊ လ္ဗံက်ကျာ်ထာဝရကၠိပပ်ရ။ ပူဇဴသကာဘောဇိုန်မပ္တိုန်စွံလဝ်ဂှ် ယုတ်မာရ သာ်ဝွံ ဟိုတ်မၞးတံမဟီုဂှ် ပျုတ်ဖျေတ်လ္ဗံက်ကျာ်အိုတ်ရ။ ၁၃မွဲဝါပၠန်၊ မၞးတံဝွံ၊ မၚ်မွဲဝတ်ကျာ်တုဲ ဍောၚ်ၜိုန်ရသွံ သာ်ဝွံ ဟီုမ္ဂး၊ လေပ်ဗရုရမျှာၚ် မစောဒနာအိုတ်ရ သာ်ဝွံ ကျာ်ထာဝရတလဗဵုလဗးအကာသမဟီုပၟိၚ်ရ။ သတ်မပၠံၚ်ၜးကေတ်၊ သတ်ဇိုၚ်ခေံ။ သတ်မယဲသရဂှ် မၞးတံကေတ်နၚ်အိုတ်ရ။ ပူဇဴသကာသာ်ဂှ် မၞးတံကေတ်နၚ်အိုတ်ရသွံ။ နူအပ္ဍဲတဲမၞးတံဂှ် အဲဒုၚ်တဲဟာ သာ်ဝွံ ကျာ်ထာဝရသၟာန်တဴရ။ ၁၄စွံလဝ်ဂတိသစ္စတုဲ ပ္ဍဲဒကံသဵုဇကုကၟက်နွံမ္ဂး လီစတုဲ၊ ညးမပူဇဴသတ်ဟွံဍိုက်ပေၚ်ပ္ဍဲကဵုကျာ်ထာဝရဂှ် ကဵုနွံအမၚ်္ဂလရောၚ်။ အဲဝွံ ဒှ်ဨကရာတ်မဇၞော်ပြဲရ။ နာမအဲဝွံ ပ္ဍဲဂကူမၞိဟ် ဂမၠိုၚ်ဂှ် ဒှ်ဒမံၚ်မဖေက်ဒၟံက်ရ သာ်ဝွံ ကျာ်ထာဝရတလဗဵုလဗးအကာသဟီုပၟိၚ်ရ။