၁နူကဵုအာဗြဟာန်ကဵုဍာဝိက် မဆက်ဆေန်ကၠုၚ်စရၚ်တၞောဝ်ဒတောဝ်ယေသှုခရေတ်မ္ဂးဂှ်။ ၂ကောန်အာဗြဟာန် ဣဇက်။ ကောန်ဣဇက် ယျာကုက်။ ကောန်ယျာကုက် ယုဍကဵုကောဒေံမွဲရဲ။ ၃ယုဍဝွံ ပ္ဍဲတာမာဂှ် မဂွံညာတ်မုက်ကောန်ဖာရေတ်ကဵုဇာရ။ ကောန်ဖာရေတ် ဟေဇရောန် ကောန်ဟေဇရောန် အာရာံ ၄ကောန်အာရာံ အမိဏဍာပ်။ ကောန်အမိဏဍာပ် ဏာသှုၚ်၊ ကောန်ဏာသှုၚ် သာလမောန်။ ၅သာလမောန်ဝွံ ပ္ဍဲကဵုသမ္ဘာဇကုရာခါတ်ဂှ် မဂွံညာတ်မုက်ကောန်ၜဝ်ဇ။ ၜဝ်ဇဝွံ ပ္ဍဲကဵုသမ္ဘာဇကုရုထဂှ် မဂွံညာတ်မုက်ကောန်သြၜေတ် ကောန်သြၜေတ် ယေသှာဲ။ ၆ကောန်ယေသှာဲ ဨကရာတ်ဍာဝိက်ဂှ် မဂွံဒှ်ရ။
ဨကရာတ်ဍာဝိက်ဝွံ ပ္ဍဲကဵုညးမကေၚ်ဒှ် သမ္ဘာဥရိယဂှ် မဂွံညာတ်မုက် ကောန်သဝ်လဝ်မုၚ်။ ၇ကောန်သဝ်လဝ်မုၚ် ရောဝ်ၜေါမ်။ ကောန်ရောဝ်ၜေါမ် အၜိယျ။ ကောန်အၜိယျ အာသာပ်။ ၈ကောန်အာသာပ် ယဝ်သဖာတ်။ ကောန်ယဝ်သဖာတ် ယဝ်ရာံ။ ကောန်ယဝ်ရာံ အဝ်ဇိ။ ၉ကောန်အဝ်ဇိ ယဝ်သာံ။ ကောန်ယဝ်သာံ အာခါတ်။ ကောန်အာခါတ် ဟေဇကိ။ ၁၀ကောန်ဟေဇကိ မနာသှေ။ ကောန်မနာသှေ အာမောန်။ ကောန်အာမောန် ယဝ်သိ ၁၁ကောန်ယဝ်သိ ယဝ်ယျကိန်ကဵုကောဒေံမွဲရဲ။ ယဝ်ယျကိန်ဝွံ ပ္ဍဲမညောန်ကဵုပြံၚ်အာဍုၚ်ၜါၜုလုၚ်ဂှ် မဂွံညာတ်မုက်ကောန်ယေခဝ်နိရ။
၁၂ပြံၚ်အာဍုၚ်ၜါၜုလုၚ်တုဲ။ ကောန်ယေခဝ်နိသလသေလ၊ ကောန်သလသေလဇေရဝ်ၜၜေလ ၁၃ကောန်ဇေရဝ်ၜၜေလ အၜါဲအုက်။ ကောန်အၜါဲအုက် ဨလျာကီ ကောန်ဨလျာကီ အာဇဝ် ၁၄ကောန်အာဇဝ် ဇာဒုက်။ ကောန်ဇာဒုက် အာခိမ်။ ကောန်အာခိမ် ဨလုက် ၁၅ကောန်ဨလုက် ဨလာဇာ။ ကောန်ဨလာဇာ မာတ်သာန်။ ကောန်မာတ်သာန် ယျာကုက် ၁၆ကောန်ယျာကုက် ယဝ်သာတ်သမ္ဘာမာရိဂှ် မဂွံဒှ်ရ။ မာရိဝွံ မိယေသှုမကောက်ခဴခရေတ်ဂှ် မဂွံဒှ်ရ။ ၁၇တၞောဝ်ဒတောဝ်ဂကူဝေါၚ်သမဆက်ဆေန်ကၠုၚ်နူကဵုအာဗြဟာန်ဒဵုကဵုဍာဝိက်ဂှ် စှ်ပန်အဆက်။ နူကဵုဍာဝိက်ဒဵုကဵုမပြံၚ်အာဍုၚ်ၜါၜုလုၚ်ဂှ် စှ်ပန်အဆက်။ နူကဵုမပြံၚ်အာဍုၚ်ၜါၜုလုၚ်ဒဵုကဵုခရေတ်ဂှ် စှ်ပန်အဆက်ဂှ် မဂွံဒှ်ရ။
၁၈ဒတိတ်ဒဒှ်ယေသှုခရေတ်မဒုၚ်သၠးဂဗ္ဘမ္ဂးဂှ်။ မိညးမာရိဝွံ ပသၟတ်သစ္စကဵုယဝ်သာတ်တုဲ နူကၠာဟွံဂွံပပရေၚ်ဝိဝါဟနကဵုဝိညာန်မသ္အးဇ္ၚးဂှ် မဂွံတန်ပ္တိသန္ဓိရ။ ၁၉သမ္ဘာညးယဝ်သာတ်ဝွံဂှ် ဒှ်မၞိဟ်မသ္တပ်လ္ဂူတုဲ ဟိုတ်ဟွံမိက်ကဵုစရာဲမာရိလီုမ္ဂး သၟိက်ဂွံပါဲထောံကၞပ်ကၞပ်ရောၚ် သာ်ဝွံ မနွံကသပ်ရ။ ၂၀ပ္ဍဲကာလမချပ်ဗ္စာရဏာဒၟံၚ် သာ်ဝွံ ညာတ်ကေတ်သွပ်လ္ပံမ္ဂးဂှ်။ ကလုတ်ကျာ်ထာဝရမံက်ကၠုၚ်တုဲ။ ယဝ်သာတ်ကောန်ဍာဝိက်အပ္ဍဲကေစ္စသီက္ၜတ်သမ္ဘာမၞး မာရိဂှ် လ္ပဒွိၚ်။ ပ္တိသန္ဓိမတန်လမုဟ်ဝွံ နကဵုဝိညာန်မသ္အးဇ္ၚးဂှ် မဂွံဒှ်ရောၚ်။
၂၁သၠးဂဗ္ဘကောန်တြုံရောၚ်။ တေံကောန်ဝွံ ဟိုတ်မဒှ်ညးမဟံၚ်ပြာ်ဗလးမၞိဟ်ဇကုနူကဵုဒုဟ်ဂှ် ယေသှုမဒးခုတ်ယၟုရောၚ် သာ်ဝွံ ကလုတ်အကာသမဟီုရ။
၂၂ပ္ဍဲဒတိတ်ဒဒှ်ဝွံဂှ်။ ပယးဒိုဟ်ကျာ်ထာဝရမစွံလဝ်နကဵုပရောဗက်ဂှ် စိုပ်ဒဒှ်မဍိုက်ပေၚ်ရ။ ၂၃ဂလာန်ပယျးဒိုဟ်မ္ဂးဂှ်။ ရံၚ်မွဲရ။ ဗြဴကညာမွဲဂှ် တန်ပ္တိသန္ဓိတုဲ သၠးကောန်တြုံရောၚ်။ ကောန်ဂှ် ဨမာနိုဲလမခုတ်ယၟုအိုတ်ရောၚ် သာ်ဝွံ မကၠုၚ်ရ။ ရထဨမာနိုဲလမ္ဂးဂှ် ကျာ်ဂမျိုၚ်မနွံကောံကုအဲညးမွဲစွံရောၚ် သာ်ဝွံ သၟိက်ဂးရ။ ၂၄ယဝ်သာတ်ဝွံ နူမသ္တိက်လှိၚ်ဂှ် ၚုဟ်တုဲ အတိုၚ်ကလုတ်အကာသမဗ္ကန်လဝ်ဂှ် ပမ္ဂး။ သမ္ဘာဇကုဂှ် သီက္ၜတ်ရ ၂၅ၜိုန်ဂှ်လေ ဒဵုကဵုမသၠးဂဗ္ဘကောန်ဂၠုဂှ် ဟွံပသံၚ်ဝါသတုဲ ဒၟံၚ်တဴရ။ ကောန်တြုံဂှ်လေ ယေသှု သာ်ဝွံ မခုတ်ယၟုရ။