၁ပဝ်လုကဵုတိမဝ်သေဝ်ဍိက်ယေသှုခရေတ်တံဝွံ ပၟိၚ် ဏာကဵုညးမသ္အးဇ္ၚးပ္ဍဲယေသှုခရေတ်ဆမနွံပ္ဍဲဍုၚ်ဖိလိပ္ပိသီုကဵု အစာမအုပ်လဒံသၚ်။ ကဵုအစာထၜသဘာ်သၚ်မ္ဂးဂှ်။ ၂ဂုန်ကဵုဒဒှ်မၜိုဟ်သြိုဟ်နူမအံက်ပိုဲညးကျာ်ဂမျိုၚ်ကဵုနာဲပိုဲယေသှုခရေတ်ဝွံဂှ် တန်ဒၟံၚ်ပ္ဍဲမၞးတံ အိုတ်ညိ။ ၃အဲဝွံ ရိုဟ်ရိုဟ်မဗှ်သဏာမၞးတံထိုၚ်သးဂုန်ကျာ်ဂမျိုၚ်စဏးမၞးတံတုဲ။ ၄-၅ပ္ဍဲအဲမရာဒၞာဇၟာပ်ဇၟာပ်ကာလနူတ္ၚဲပထမဒဵုကဵုလမုဟ်နကဵု စိုတ်မအိုဟ်တၟိုဟ်ဂှ် ဟိုတ် နူမၞးတံမဆက်ဆံ ကဵုဓဝ်ဨဝံၚ်ဂေလိတုဲ အဲမလေပ်ရာဒၞာစဏးမၞးတံရောၚ်။ ၆ဟိုတ်မ္ဂးဂှ်။ ညးမပ္တံပပွမခိုဟ်ပ္ဍဲမၞးတံဒဵုကဵုတ္ၚဲယေသှုခရေတ်။ တေံအရာမခိုဟ်ဂှ် ပ္တုဲတဴရောၚ် သာ်ဝွံ အဲဖျေံစိုတ်တုဲရ။ ၇သာ်ဂှ် အဲဖျေံစိုတ်လ္ပာ်မၞးတံဂှ် ဒှ်ဂပ်ဂေါဝ်ရောၚ်။ ဟိုတ်မ္ဂးဂှ်။ မၞးတံအိုတ်သီုဆက်ဆံ ကဵုဂုန်အဲတုဲ ပ္ဍဲအဲမဒုၚ်ခရေဟ်ဂှ်လေကီု။ ပ္ဍဲအဲမဒုၚ်သက်သဳလ္ပာ်ဓဝ်ဨဝံၚ်ဂေလိဂှ်လေကီု။ ပ္ဍဲဒမံၚ်မကဵုဓဝ်ဂှ် တန်ဒၟံၚ် ဂှ်လေကီု။ အဲဗှ်သဏားမၞးတံ လ္အိတ်တွဵုရောၚ်။ ၈နကဵုမေတ္တာကရုတ်ဏာယေသှုဝွံ အဲဗှ်သဏာမၞး တံဗၞတ်မွဲစိဂလိုၚ် ဂှ် ကျာ်ဂမျိုၚ် ဒှ်သက်သဳအဲရာၚ်။ ၉ဒတိတ်ဒဒှ်အဲရာဒၞာစဏးမၞးတံမ္ဂးဂှ်။ နကဵုညာန်ပညာမကၠိုဟ်ခၠၚ်ဇၟာပ်ဇၟာပ်ဂကူကဵုမေတ္တာ ဇြဟာန်ဂှ် မၞးတံတောတက်တုဲ။ ၁၀ပ္ဍဲလ္ပာ်အရာမခိုဟ်ပြဲဖျေံစိုတ်မ္ဂး ဒဵုကဵုတ္ၚဲခရေတ်ဒဒှ် ပါရမဳမသ္အးဇ္ၚးသ္ဇုၚ်ဂွုဗၠးနူအခေါၚ်နၚ်ဒုဟ်ဂှ်လေကီု။ ၁၁တၞဟ်နသၟိက်ကဵုတြဳဇှ်အနူဘဴ ကျာ်ဂမျိုၚ်ပြာကတ်ဂှ် မၞးတံဝွံ နကဵုယေသှုခရေတ်ညံၚ်ဂွံဍိုက်ပေၚ်ကဵုသတ်သဳလတံဂှ်လေကီု။ အဲရာဒၞာစဏးမၞးတံရောၚ်။ ၁၂ကောဒေံတံ။ အမှုအရာမစိုပ်ပ္ဍဲအဲဝွံဂှ်။ လောန်နူဟွံဆဳဒနာဓဝ်ဨဝံၚ်ဂေလိဒဒှ်မဒက် ပ္တန်ဓဝ်ဂှ် သၟိက်ဂွံကဵုမၞးတံတီတုဲ ပၟိက်အဲမနွံရ။ ၁၃ဟိုတ်နူခရေတ်ဝွံ ဒဒှ်အဲမဒးဒုၚ် ကၠေၚ်ဒက်ဂှ် ပ္ဍဲနန်ဂှ်လေကီု။ ပ္ဍဲဇၟာပ်ဒၞာဲဒေသအိုတ်သီုတံဂှ်လေကီု။ ပြာကတ် တုဲ ၁၄ကောဒေံဂမၠိုၚ်တံဝွံ ဟိုတ်နူအဲမဒးဒုၚ်ခရေဟ်ဂှ် ဗၠးသၠးနူကဵုစိုတ်သၠေဟ်ပၟာတုဲ ဒဒှ်မဖေက်ဒၟံက်ဟွံမွဲမ္ဂး နကဵုစိုတ်မဂံၚ်သြာဲပ္ဍဲတဳလပိုန်ဝွံ။ ဂလာန် ကျာ်ဝွံဂှ် ဂံၚ်ဟီုတွံအိုတ်ရ။ ၁၅မၞိဟ်လ္ၚဵုတံဝွံ နကဵုစိုတ်စောန်ဒမြဴကယျာန်ဓဝါတ်ဂှ် ဟီုတွံဓဝ်ခရေတ်အိုတ်ရ။ လ္ၚဵုတံဝွံ နကဵုစိုတ်မေတ္တာဂှ် ဟီုတွံအိုတ်ရ။ ၁၆အဲဝွံ သွက်ဂွံထၜသဘာ်ဓဝ်ဨဝံၚ်ဂေလိဒဒှ်မဒုၚ်ပ္တိုန်လဝ်ဒၞာဲဂှ်။ ညးတံဝွံ တီမ္ဂး နကဵုစိုတ်မေတ္တာဂှ် ဟီုတွံဓဝ်ခရေတ်အိုတ်ရ။ ၁၇ညးမွဲရဲတံဂှ်လေ ဟွံမွဲကဵုစိုတ်သ္ဇုၚ်ဂွုတုဲ ပ္ဍဲလတူအဲမဒးဒုၚ်ခရေဟ်ဂှ် သၟိက်ဂွံတၚ်ထပ်ဒဒိုက်ဗွဲမလောန်ရောၚ်။ သာ်ဝွံ မနွံကသပ်တုဲ။ နကဵုစိုတ်သၟိက်ဂွံသေက်ဇဵုဂှ် ဟီုတွံဓဝ်ခရေတ်အိုတ်ရ။ ၁၈ဒှ်သာ်ဂှ်တုဲ ပသာ်ရောမ္ဂးဂှ်။ နကဵုစိုတ်ပၞုက်ဗ္ဒန်ကဵုဒှ်။ နကဵုသစ္စကဵုဒှ်။ သာ်ဝွံ မွဲမွဲမဟီုတွံဓဝ်ခရေတ်မ္ဂး လမုဟ်ဝွံ အဲအိုဟ်တၟိုဟ်ရ။ ကြဴဂှ်လေ အဲအိုဟ်တၟိုဟ်ရောၚ်။ ၁၉-၂၀မူဟိုတ်ရောမ္ဂးဂှ်။ ပ္ဍဲအဲဝွံ ဒဒှ်မဖေက်ဂွဟွံမွဲ။ ဒဒှ်မဂံၚ်သြာဲဂှ် ဍိုက်ပေၚ်တုဲ ပ္ဍဲလမျီုမဂျိုၚ်ကဵုဒှ်။ ပ္ဍဲမချိုတ်ကဵုဒှ်။ ပ္ဍဲဇကုကာယျအဲဂှ် လ္အိတ်တွဵုဟွံသ္ဂုတ်ညံၚ်ဂုန်စရာဲခရေတ်ဂွံပြာကတ်။ အတိုၚ်အဲမရံၚ်လၟဳဇၞော်ကဵုဒြဟတ်ဂှ် ဗှ်သဏာမ္ဂး။ ဟိုတ်နူမၞးတံရာဒၞာဂှ်လေကီု။ ဟိုတ်နူဝိညာန်ယေသှုခရေတ်မထၜသဘာ်အဲဂှ်လေကီု။ ဒတိတ်ဒဒှ် သာ်ဝွံဂှ် ဒှ်ဒတိတ်ဒဒှ်မဟံၚ်ပြာ်အဲရောၚ်။ သာ်ဝွံ အဲတီရ။ ၂၁အရာအဲမဂျိုၚ်လမျီုဂှ် ခရေတ်ရ။ ချိုတ်မ္ဂးဂှ် ဒှ်ဒတုဲကၟဝ်ရောၚ်။ ၂၂ပ္ဍဲဇကုကာယျဝွံ အဲဂျိုၚ်မ္ဂး အရာဝွံဂှ် ဒှ်ဖဵုဒ္ဂေတ်အဲရောၚ်။ ဟိုတ်ဂှ်ရ မူအရာအဲ ဂွံရုဲကံက်ဂှ် အဲဟွံတီ။ ၂၃ပ္ဍဲအကြာၜါဂှ် အဲက္ဍန်ဂြက်မံၚ်ရ။ ချိုတ်တုဲ သၟိက်ဂွံစိုပ်ထာန်ခရေတ်ဂှ် ပၟိက်အဲနွံဗွဲမလောန်ရ။ အရာဝွံဂှ် ဒှ်ပြဲလောန်ရ။ ၂၄ၜိုန်ဂှ်လေ အဲဂွံမံၚ်ပ္ဍဲဇကုကာယျမ္ဂး ပ္ဍဲမၞးတံဂှ် ဒှ်ဖဵုဇၞော်ဗွဲမလောန် ရောၚ်။ ၂၅သာ်ဂှ် ပ္တေဟ်တုဲ တၞဟ်နသၟိက်ကဵုမၞးတံ တောတက်ပ္ဍဲဒဒှ်မအိုဟ်တၟိုဟ် မဆေၚ်ကဵုဒဒှ်မပ္တေဟ်ဂှ်လေကီု။ ၂၆ဟိုတ်နူအဲကၠုၚ်ထာန်မၞးတံပၠန် ဂှ်တၞဟ်နသၟိက်ကဵုမၞးတံသ္အဵုသ္အာ်ပ္ဍဲယေသှုခရေတ်စဏးအဲဂှ်လေကီု။ အဲမံၚ်ပ္ဍဲဇကုကာယျတုဲ ဂွံမံၚ်ကေံာကုမၞးတံမွဲစွံရောၚ် သာ်ဝွံ အဲတီရ။
၂၇အဲကၠုၚ်တုဲ ညာတ်မုက်မၞးတံပၠန်ကဵုဒှ်။ သ္ဍးသြာဲနူမၞးတံ ကဵုဒှ်။ ဒတိတ်ဒဒှ် မၞးတံပ္ဍဲအရာမွဲမွဲ ဟွံဖေက်သတ်တြု။ ဒဒှ်မဗိုန်ဂၠိတန်ကြန်ပ္ဍဲဝိညာန်မွဲဂှ်လေကီု။ ဒတိတ်ဒဒှ်မၞး တံနကဵုပၟိက်စိုတ်မွဲဂှ် ကၠေံစိုတ်စဏးဒဒှ်မပ္တေဟ်မဆေၚ်ကဵုဓဝ်ဨဝံၚ်ဂေလိဂှ်လေကီု။ ညံၚ်အဲဂွံမိၚ်။ အတိုၚ်မကြိုက်ကဵုဓဝ်ဨဝံၚ်ဂေလိခရေတ်ဝွံဂှ် ဒ္ဂေတ်မံၚ်အိုတ်ရ။ ၂၈ဒတိတ်ဒဒှ်ပ္ဍဲအရာမွဲမွဲမၞးတံဟွံဖေက်သတ်တြုဂှ် ပ္ဍဲလ္ပာ်သတ်တြုဝွံ ဒှ်လက္သန်လီုလာ်ရောၚ်။ ပ္ဍဲလ္ပာ်မၞး တံ နကဵုဂုန် ကျာ်ဂမျိုၚ်ဝွံဂှ် ဂွံဒှ် လက္သန်မဟံၚ်ပြာ်ရောၚ်။ ၂၉အတိုၚ်းမၞးတံညာတ်ကၠာဂှ်လေကီု။ အတိုၚ်မမိၚ်လမုဟ်ဂှ်လေကီု။ ၃၀ညံၚ်နဲအဲမဒုၚ်ဗတိုက်ဗတုန်တုဲ ညံၚ်နဲသာ်ဂှ် မၞးတံဒးဒုၚ်ဗတိုက်ဗတုန်အိုတ်ရောၚ်။ ဟိုတ်မ္ဂးဂှ်။ ဝေၚ်နူအခေါၚ်ဂွံပ္တေဟ်ခရေတ်။ အခေါၚ်မဒးဒုၚ်ဒဒိုက်သွက်ခရေတ်ဝွံ နကဵုဂုန်ကျာ်ဂှ် မၞးတံဂွံအိုတ်တုဲရ။