သၠ​ပတ်​ဆာ​လာမ် ၉

၁အဵု​ကျာ်​ထာ​ဝ​ရ၊ အဲ​ဍိက်​ဝွံ ဒဵု​ကဵု​မ​အိုတ်​ကောန်​စိုတ်​ထိုၚ်​သး​တဳ​လ​ပိုန်​ရောၚ်။ ပွ​ဒ​မံၚ်​မ​ဒး​ပ​အံ​သဝ်​ဆ​မ​နွံ​တံ​ဂှ် စ​ဏောန်​ထ​ၜး​ရောၚ်။ ၂ပ​သ​လဲ​ကု​တဳ​လ​ပိုန်​တုဲ မိပ်​စိုတ်​ရာၚ်​ဆာဲ​ရောၚ်။ နာ​မ​တဳ​လ​ပိုန်​ဂှ် ဒ​ယေဟ်​ဒွက်​က​ရီု​ညိ​ရောၚ်။ ကျာ်​မ​သၠုၚ်​အိုတ်။ ၃ဟိုတ်​မ္ဂး​ဂှ်၊ သတ်​တြု​အဲ​ဍိက်​တံ​ဝွံ ဆုတ်​က​လေၚ်​တုဲ လောတ်​အိုတ်​ရ။ ပ္ဍဲ​ဂ​တ​တဳ​လ​ပိုန်​ဂှ် လီု​လာ်​အိုတ်​ရ။ ၄တဳ​လ​ပိုန်​ဝွံ စဳ​ရေၚ်​ဒ​ကုတ်​သၞောဝ်​လ​ပါ်​အဲ​ဍိက်​တုဲ​ရ။ ဂ​ဇံ​ဒၟံၚ်​လ​တူ​ပၞၚ်​တုဲ ဗွဲ​မ​သ္ဍာံ​သၟတ်​ဂှ် စဳ​ရေၚ်​တုဲ​ရ။ ၅ဂ​ကူ​ညး​တၞဟ်​သ္အာၚ်​တံ​ဂှ် ဝေတ်​ဗ္တောန်​တုဲ​ရ။ ၆သတ်​တြု​တံ​ဝွံ ဒဵု​ကဵု​မ​အိုတ်​သ္အး​ဂှ် စိုပ်​ဒ​ဒှ်​မ​လီု​လာ်​အိုတ်​တုဲ​ရ။ ကျာ်​တိုဟ်​ပ​လီု​ကၠေံ​ဍုၚ်​တံ​ဂှ်​တုဲ၊ ဗၞတ်​ဆ​သ​မ္တီ​ညး​တံ​ဂှ် ဟွံ​မွဲ​ကၠေံ​အာ​တုဲ​ရ။ ၇ကျာ်​ထာ​ဝ​ရ​ဝွံ လ္အိတ်​တွဵု​ကာ​လ​တန်​ဒၟံၚ်​ရ။ ပၞၚ်​ဗ​ဗွဲ​ဓဝ်​ဂှ် စဳ​ရေၚ်​ပြု​ပြေၚ်​တုဲ၊ ၈ကောန်​တိ​ဇၞော်​တံ​ဂှ် ကျာ်​မ​စဳ​ရေၚ်​ဗ​ဗွဲ​ဓဝ်​ရ။ အ​ပ္ဍဲ​ကဵု​ဂ​ကူ​မၞိဟ်​တံ​ဂှ် ဒ​ဒှ်​မ​စဳ​ရေၚ်​ဗွဲ​သၟတ်​ဂှ် မ​ပ​တဴ​ရ။ ၉ကျာ်​ထာ​ဝ​ရ​ဝွံ ဒ​မံၚ်​ညး​မ​ဒုၚ်​ပ​ယဲ​ပ​ယျာံ​တံ​မ​ဂွံ​ပ​လ္ကံ​ဗ္ဒး၊ ကာ​လ​ဘဲ​အ​န္တ​ရာဲ​မ​စိုပ်​ဂှ် ဒ​မံၚ်​ဂွံ​ပ​လ္ကံ​ဗ္ဒး​မ​ဒှ်​ရ။ ၁၀ညး​မ​တီ​နာ​မ​တဳ​လ​ပိုန်​တံ​ဂှ် ပ္တေဟ်​တဳ​လ​ပိုန်​အိုတ်​ရောၚ်။ ဟိုတ်​မ္ဂး​ဂှ် အဵု​ကျာ်​ထာ​ဝ​ရ၊ ညး​မ​ဂၠာဲ​တီ​လ​ပိုန်​တံ​ဂှ် တဳ​လ​ပိုန်​ဟွံ​လေပ်​ထောံ​လ​သာ​ကၠေံ။

၁၁ကျာ်​ထာ​ဝ​ရ​မ​မံၚ်​ပ္ဍဲ​ဍုၚ်​ဇိ​အောန်​ဂှ် ဒ​ယေဟ်​ဒွက်​က​ရီု​အိုတ်။ ကေ​စ္စ​ကျာ်​အိုတ်​သီု​တံ​ဂှ် ဟီု​တွံ​ပ္ဍဲ​ဂ​ကူ​မၞိဟ်​ဂ​မၠိုၚ်​အိုတ်။ ၁၂ပွ​မ​ဂ​စိုတ်​လ​မျီု​မၞိဟ်​ဂှ် စၟတ်​တုဲ ညး​မ​ဒး​ဒုၚ်​ဂ​စိုတ်​တံ​ဂှ် ကျာ်​ဗှ်​သၞာ​ရ။ ရ​မျှာၚ်​ညး​မ​ဗ္ဒေက်​ဖျဝ်​တံ​မ​လ​ရိုအ်​ဂ​တေဝ်​ဂှ် တဳ​လ​ပိုန်​ဟွံ​ဝိုတ်​လ​လုဲ။ ၁၃အဵု​ကျာ်​ထာ​ဝ​ရ၊ ဟံၚ်​ပြာ်​အဲ​ဍိက်​ညိ။ ညး​မ​က္ဍုဟ်​မၠေံ​အဲ​ဍိက်​တံ​ပွ​မ​ပ​ယဲ​ခ​ရ​ဂှ် ရံၚ်​သ​မ္တီ​တုဲ၊ ပြာ်​ကေတ်​အဲ​ဍိက်​နူ​တဲ​သၟီ​ဂ​စိုတ်​ညိ။ ၁၄ဒှ်​သာ်​ဂှ်​တုဲ၊ ဂုန်​ဒ​တုဲ​ကၟဝ်​အိုတ်​သီု ပ္ဍဲ​ပါၚ်​တ​ရၚ်​ဍုၚ်​ဇိ​အောန်​ဂှ် အဲ​ဍိက်​စ​ဏောန်​ထ​ၜး​ရောၚ်။ ပ​သ​လဲ​ကဵု​ဂုန်​ဒ​ဒှ်​မ​ဟံၚ်​ပြာ်​ဂှ်​တုဲ အိုဟ်​တၟိုဟ်​ရောၚ်။

၁၅ဂ​ကူ​ဝေါၚ်​သ​တၞဟ်​သ္အာၚ်​တံ​ဝွံ အ​ပ္ဍဲ​က္တိုၚ်​ဇ​ကု​မ​ခါဲ​ဂှ် ဇ​ကု​ဒ​တုံ​အိုတ်​ရ။ အ​ပ္ဍဲ​ပး​ဒ​နက်​ဇ​ကု​ပၞုက်​လဝ်​ဂှ် ဇိုၚ်​ဇ​ကု​တံ​ဒ​နက်​ဒး​အိုတ်​ရ။ ၁၆ကျာ်​ထာ​ဝ​ရ​ဝွံ န​ကဵု​မ​စဳ​ရေၚ်​ဒ​ကုတ်​သၞောဝ်​ဂှ် ပြာ​ကတ်​တဴ​ရ။ ညး​ဟွံ​ဓဝ်​သၟတ်​ဂှ် အ​ပ္ဍဲ​က​လောန်​ဇ​ကု​မ​ကၠောန်​ဂှ် ဒ​နက်​ဒး​ရ။ ၁၇ညး​ဟွံ​ဓဝ်​သၟတ်​တံ​ကဵု​ဂ​ကူ​ဝေါၚ်​သ​မ​ဝိုတ်​လ​လုဲ​ကျာ်​ဂ​မျိုၚ်​အိုတ်​သီု​တံ​ဝွံ ဒ​ဒှ်​မ​ဗက်​ဖျေံ​ပ္ဍဲ​ဍုၚ်​မာ​ရ​ဏ​ဂှ် ဒး​ဒုၚ်​အိုတ်​ရောၚ်။ ၁၈ညး​မ​ကၠောဝ်​ဗျဵု​တံ​ဂှ် ကျာ်​ဝိုတ်​လ​လုဲ လ​အိတ်​တွဵု​ရောၚ် ဟွံ​သေၚ်။ ညး​မ​ဒိုက်​သာ​တံ​ဝွံ လၟဳ​ဗ​နုဟ်​လ္အိတ်​တွဵုတုဲ​ဟွံ​ဂွံ​မ္ဂး ဂွံ​မံၚ်​အိုတ်​ဟွံ​သေၚ်။

၁၉အဵု​ကျာ်​ထာ​ဝ​ရ၊ က္တဵု​ညိ​ရ။ မၞိဟ်​လ္ပ​ကဵု​မာန်​ညိ။ ဂ​ကူ​ဝေါၚ်​သ​တၞဟ်​သ္အာၚ်​တံ​ဂှ် ပ္ဍဲ​ဂ​တ​မုက်​တဳ​လ​ပိုန်​ဒ​ဒှ်​မ​စဳ​ရေၚ်​စၟဳ​စၟတ်​ဂှ် ကဵု​ဒး​ဒုၚ်​အိုတ်​ညိ။ ၂၀အဵု​ကျာ်​ထာ​ဝ​ရ၊ ဘ​ပ​လ​ညး​တံ​ဂှ်​ညိ။ ဒှ်​သာ်​ဂှ်​တုဲ ဇ​ကု​တံ​ဂှ် ဒ​ဒှ်​မ​ဒှ်​မၞိဟ်​သက်​သက်​ဂ​ကူ​မၞိဟ်​တံ​ဂှ် ဒး​တီ​အိုတ်​ရောၚ်။