သၠ​ပတ်​ပ​ယျး​ဒိုဟ် ၁၈

၁ကြဴ​ဂှ် က​လုတ်​အ​ကာ​သ​မွဲ​ဇ​ကု​မ​ဇၞော် ကဵု​ဣ​ဓိ​ဒ​ဒှ် မ​စှ်ေ​ဒ​ဒက်​တဴ​နူ​အ​ကာ​သ​ဂှ် အဲ​ညာတ်​ရ။ န​ကဵု​တြဳ​ဇှ်​ညး​ဂှ် တိ​ဇၞော်​ယး​တ​မး​ရ။ ၂ညး​ဝွံ န​ကဵု​ရ​မျှာၚ်​မ​ဇၞော်​ဂှ် ဍုၚ်​ဇၞော်​ၜါ​ၜု​လုၚ်​ဝွံ ဒေါံ​လာ်​တုဲ​ရ။ ဒေါံ​လာ်​တုဲ​ရ။ သာ်​ဝွံ လ​လောၚ်​က​မြဴ​ရ။ ဒ​မံၚ်​က​လော်​ဒ​မြိုဟ်​မ​မံၚ်​ဂှ်​လေ​ကီု။ က​တိုၚ်​ဝိ​ညာန်​မ​ကၠိ​ပပ်​ဇၟာပ်​ဇၟာပ်​ဂ​ကူ​မ​မံၚ်​ဂှ်​လေ​ကီု။ ဒ​မံၚ်​ဂ​စေံ​မ​က္ဍုဟ်​မၠေံ​ဇၟာပ်​ဇၟာပ်​ဂ​ကူ​မ​ဒီု​ဒက်​ဂှ်​လေ​ကီု။ မ​ဂွံ​ဒှ်​ရ။ ၃ဟိုတ်​မ္ဂး​ဂှ်။ ဍာ်​ဇ​ဗျေတ်​ပၞောတ်​ဒေါ​သ​မေ​ထုန်​ညး​ဟွံ​မွဲ​ကဵု​ဗ​ဗွဲ​ဓဝ်​ဂှ် မၞိဟ်​ဇၟာပ်​ဇၟာပ်​ဂ​ကူ​တံ​ဝွံ သုၚ်​အိုတ်​တုဲ​ရ။ ဨ​က​ရာတ်​လော​ကဳ​တံ​ဝွံ ကောံ ကု​ညး​မွဲ​စွံ​ပွ​မေ​ထုန်​ဟွံ​မွဲ​ကဵု​ဗ​ဗွဲ​ဓဝ်​ဂှ် ပ​အိုတ်​တုဲ​ရ။ ညး​မ​ပ​ဗ​နိက်​ပ္ဍဲ​တိ​ဇၞော်​တံ​ဝွံ န​ကဵု​တ​သိုက်​ကာ​မ​ဂုန်​မ​ဍိုက်​ပေၚ်​ဒၟံၚ်​ပ္ဍဲ​ဍုၚ်​ဝွံ​ဂှ် ဂွံ​ပိုန်​ဒြပ်​အိုတ်​တုဲ​ရ သာ်​ဝွံ ဟီု​ဂး​ရ။

၄ရ​မျှာၚ်​တၞဟ်​သ္အာၚ်​နူ​အ​ကာ​သ​မ္ဂး​ဂှ်။ မၞိဟ်​အဲ​တံ။ ညံၚ်​ဟွံ​ဂွံ​ဆက်​ဆံ​ကဵု​ဒုဟ်​ညး​တံ​ဂှ်​လေ​ကီု။ ညံၚ်​ဟွံ​ဂွံ​ဒး​ဒုၚ်​ဘဲ​ဒန်​ညး​ဂှ်​လေ​ကီု။ နူ​အ​ပ္ဍဲ​ဍုၚ်​ဂှ် တိတ်​ကၠုၚ်​အိုတ်​ရ။ ၅ဒုဟ်​ညး​ဝွံ စိုပ်​ဒဵု​ကဵု​အ​ကာ​သ​ဂှ်​ဒှ်​တုဲ ပွ​ညး​ဟွံ​မွဲ​ကဵု​ဗ​ဗွဲ​ဓဝ်​တံ​ဂှ် ကျာ်​ဗှ်​သၞာ​တုဲ​ရ။ ၆အ​တိုၚ်​ညး​မ​လေပ်​ကဵု​ဂှ်။ က​လေၚ်​ကဵု​ပ္ဍဲ​ညး​အိုတ်​ရ။ အ​တိုၚ်​ဒ္ဂေတ်​ညး​ဂှ် ၜါ​ဆ​ထပ်​ကဵု​အိုတ်​ရ။ လှိုၚ်​ညး​မ​ပ္ကောံ​ဂှ် သွက်​ညး​ဂှ် ပ္ကောံ​ၜါ​ဆ​အိုတ်​ရ။ ၇ညး​ဝွံ ထိုၚ်​သး​ဇ​ကု​တုဲ အ​တိုၚ်​မ​လေပ်​ဒုၚ်​စ​တ​သိုက်​ကာ​မ​ဂုန်​ဂှ် ဒ​ဒိုက်​ဝေ​ဒ​နာ​မ​သ္ကာတ်​မြဟ်​ကဵု​စိုတ်​မ​က္တဴ​စံၚ်​တူ​ဂှ် ကဵု​ပ္ဍဲ​ညး​အိုတ်​ရ။ ဟိုတ်​မ္ဂး​ဂှ်။ အဲ​ဝွံ ဒှ်​ဂၞ​ကျာ်​ရောၚ်။ ဗြဴ​ကၟာဲ​ဟွံ​သေၚ်။ ဒ​ဒှ်​စိုတ်​မ​က္တဴ​စံၚ်​တူ​ဂှ် အဲ​ဟွံ​ဒး​ဆဵု​ရ။ သာ်​ဝွံ မ​လေပ်​ဟီု​ပ္ဍဲ​ကောန်​စိုတ်​ဇ​ကု​ရ။ ၈ဒှ်​သာ်​ဂှ်​တုဲ ဘဲ​ဒန်​ညး​မ​ဒး​ဒုၚ် မ​တွံ​ဂး​ဒ​ဒှ်​မ​ချိုတ်။ ဒ​ဒှ်​စိုတ်​မ​က္တဴ​စံၚ်​တူ။ စ​ဏ​စ​ဒ​ဒှ်​မ​ခတ်​က္ဍန်။ ကဵု​ဒ​ဒှ်​မ​တူ​ပၟတ်။ အ​ပ္ဍဲ​မွဲ​တ္ၚဲ​ဂှ် စိုပ်​ကၠုၚ်​ရောၚ်။ ဟိုတ်​မ္ဂး​ဂှ်။ နာဲ​ထာ​ဝ​ရ​ကျာ်​ဂ​မျိုၚ်​မ​စဳ​ရေၚ်​ညး​ဂှ် ဍိုက်​ပေၚ်​ကဵု​ဣ​ဓိ​ဒြ​ဟတ်​ရောၚ်။

၉ကောံ​ကု​ညး​မွဲ​စွံ​ပွ​မေ​ထုန်​ဟွံ​မွဲ​ကဵု​ဗ​ဗွဲ​ဓဝ်​ဂှ် ပ​တုဲ ဨ​က​ရာတ်​လော​ကဳ​မ​ဒုၚ်​စ​တ​သိုက်​ကာ​မ​ဂုန်​တံ​ဝွံ ကာ​လ​မ​ညာတ်​ယက်​ဒ​ဒှ်​ညး​မ​တူ​ပၟတ်​ဟိုတ်​နူ​ဒ​ဒိုက်​ဝေ​ဒ​နာ​ညး​မ​ဒး​ဒုၚ်​ဂှ် ဖေက်​ဒၟံက်​မ္ဂး ဒ​တဴ​ဒၟံၚ်​နူ​ဇ​မ္ၚဲ​တုဲ။ ၁၀အော​ယာဲ။ အော​ယာဲ​ဍုၚ်​ဇၞော်​ၜါ​ၜု​လုၚ်။ ဍုၚ်​မ​ဗိုန်​ဇၟံ။ ဒုဟ်​ဒန်​မၞး​အ​ပ္ဍဲ​မွဲ​နာ​ဍဳ​ဂှ် စိုပ်​ကၠုၚ်​ရောၚ် သွံ။ သာ်​ဝွံ ဟိုတ်​နူ​ညး​ဂှ် ဒး​ယာံ​ဒက်​ဒေါန်​က​ရောတ်​က​သဝ်​အိုတ်​ရောၚ်။ ၁၁ညံၚ်​နဲ​သာ်​ဂှ် ညး​ဗ​နိက်​လော​ကဳ​တံ​ဝွံ ဟိုတ်​နူ​ညး​ဂှ် ဒး​ယာံ​ဒက်​ဒေါန်​က​ရောတ်​က​သဝ်​အိုတ်​ရောၚ်။ ၁၂ဟိုတ်​မ္ဂး​ဂှ်။ ဒြပ်​ဗ​နိက်​ညး​တံ​ဝွံ မ​တွံ​ဂး။ ထဝ်။ သြန်။ မတ်​မ​ပြဲ။ မတ်​ဗၠဲ။ ယာတ်​ကာန်​က​မု။ ခ​တေဝ်​ပး​ဗ္ကေတ်။ ယာတ်​သုတ်။ ယာတ်​ဗ္ကေတ်​ယောံ။ ဆု​မြ​မောဝ်​ဇၟာပ်​ဇၟာပ်​ဂ​ကူ။ အ​ပေါတ်​မ​ကၠောန်​န​ကဵု​ဂြၚ်​စိၚ်​ဇၟာပ်​ဇၟာပ်​ဂ​ကူ။ အ​ပေါတ်​မ​ကၠောန်​န​ကဵု​ဆု​မ​ခိုဟ်​ပြဲ​ဇၟာပ်​ဇၟာပ်​ဂ​ကူ။ အ​ပေါတ်​သၠုဲ။ အ​ပေါတ်​ပ​သဲ။ အ​ပေါတ်​တၟံ​ဗ္တာၚ်။ ၁၃ခ​ဍၚ်​ရာ။ အ​ဓဵု​မာန်။ မြ​မောဝ်။ မူ​ရာန်။ လဝ်​ၜါန်။ ဍာ်​ဇ​ဗျေတ်။ ကၠေၚ်။ ကွာၚ်​ခ​ဏိက်။ သြောံ​ဂျုၚ်။ ဂၠဴ။ သဵု။ ချေံ။ ကွဳ​ရတ်။ ဍိက်​မ​ဒုၚ်​စ​ကာ။ ဝိ​ညာန်​မၞိဟ်​တံ​ဂှ် ကြဴ​မွဲ​ဝါ​ဆ​ဗၞတ်​ညး​မွဲ​ဟွံ​ရာန်။ ၁၄သတ်​ဆု​မ​မက်​မတ်​ဗွဲ​မ​လောန်​တံ​ဂှ် ကၠေံ​အာ​နူ​မၞး​တုဲ​ရ။ အ​ရာ​မ​ဍာတ်​ကြောံ​ဆ​မ​နွံ​တံ​ဂှ်​လေ ကၠေံ​အာ​နူ​မၞး​အိုတ်​တုဲ​ရ။ ၁၅တေံ​အ​ရာ​တံ​ဂှ် ကြဴ​မွဲ​ဝါ​မၞး​ဟွံ​ဂွံ​ဆဵု။ ညး​မ​ပ​ဗ​နိက်​ကဵု​အ​ရာ​တေံ​တံ​ဂှ်​လေ​ကီု။ ပ​သ​လဲ​ကဵု​ဍုၚ်​ဂှ်​တုဲ ညး​မ​ဂွံ​တ​သိုက်​တံ​ဂှ်​လေ​ကီု။ ဟိုတ်​နူ​ဒ​ဒိုက်​ဝေ​ဒ​နာ​မ​စိုပ်​ပ္ဍဲ​ဍုၚ်​ဂှ် ဖေက်​လ​ကိုတ်​တုဲ ဒ​တဴ​ဒၟံၚ်​နူ​ဇ​မ္ၚောဲ​မ္ဂး ၁၆အော​ယာဲ။ အော​ယာဲ။ ယာတ်​ကာန်​က​မု။ ယာတ်​ဗ္ကေတ်။ ယာတ်​ဗ္ကေတ်​ယောံ​ဂှ်။ ဗိုက်​ကေတ်​တုဲ။ ဍုၚ်​ဇၞော်​မ​ဂ​ညိ​ကေတ်​အ​ပေါတ်​ထဝ်။ မတ်​မ​ပြဲ။ မတ်​ဗၠဲ ၁၇ပိုန်​ဒြပ်​ဂ​လိုၚ်​ဝွံ အ​ပ္ဍဲ​မွဲ​နာ​ဍဳ​ဂှ် ကၠေံ​လာဲ​လေၚ်​အာ​အိုတ်​ရောၚ် သွံ သာ်​ဝွံ ယာံဒက်​ဒေါန်​တုဲ က​ရောတ်​က​သဝ်​အိုတ်​ရ။ ဇၟာပ်​ဇ​မၞော်​က္ၜၚ်​တံ​ဂှ်​လေ​ကီု။ ဇၟာပ်​ညး​မ​နွံ​လ​တူ​က္ၜၚ်​ကဵု​ကောန်​က္ၜၚ်​ဂ​မၠိုၚ်​တံ​ဝွံ ဒ​တဴ​ဒၟံၚ်​နူ​ဇ​မ္ၚဲ​တုဲ။ ၁၈ညာတ်​ယက်​ဍုၚ်​ဂှ် တူ​မ္ဂး။ မူ​ရဴ​ဍုၚ်​မွဲ​မ​တုပ်​ကဵု​ဍုၚ်​ဂှ် ရော သာ်​ဝွံ ယာံ​ဒက်​ဒေါန်​က​ရောတ်​က​သဝ်​အိုတ်​ရ။ ၁၉ညး​တံဂှ်​လေ ဗိုတ်​ပ္တိုန်​ခ​ဏိက်​တိ​ပ္ဍဲ​လ​တူ​က္ဍိုပ်​ဇ​ကု​တုဲ။ ယာံ​ဒက်​ဒေါန်​မ္ဂး။ အော​ယာဲ။ အော​ယာဲ။ အ​ပ္ဍဲ​ဆ​ညး​မ​ပိုၚ်​က္ၜၚ်​လ​တူ​မှာ​သ္မိတ်​အိုတ်​သီု​တံ​ဝွံ န​ကဵု​ပိုန်​ဒြပ်​ဇ​ကု​ဍုၚ်​ဇၞော် မ​လေပ်​ကဵု​တ​သိုက်​အ​ပ္ဍဲ​မွဲ​နာ​ဍဳဂှ် စိုပ်​ဒ​ဒှ်​မ​လီု​လာ်​ရောၚ် သွံ သာ်​ဝွံ လ​ရိုအ်​ဂ​တေဝ်​အိုတ်​ရ။ ၂၀အ​ကာ​သ။ ညး​မ​သ္အး​ဇ္ၚး။ က​လုတ်​ကဵု​ပ​ရော​ဗက်​တံ။ ရံၚ်​ညး​တုဲ အိုဟ်​တၟိုဟ်​အိုတ်။ ဟိုတ်​မ္ဂး​ဂှ်။ ကျာ်​ဂ​မျိုၚ်​ဝွံ နွံ​ဒၟံၚ် လ​ပါ်​မၞး​တံ​တုဲ စဳ​ရေၚ်​ဒုဟ်​ဒန်​ပ္ဍဲ​ညး​တံ​ဂှ်​တုဲ​ရ သာ်​ဝွံ ဒ​ဒှ်​မ​ဟီု​ဂှ် အဲ​မိၚ်​ရ။ ၂၁က​လုတ်​အ​ကာ​သ​မ​ဇၞော်​ကဵု​ဒြ​ဟတ်​မွဲ​ဇ​ကု​ဝွံ တၟံ​ညံၚ်​နဲ​တၟံ​ဂ​ဝုတ်​ဇၞော်​မွဲ​ဂှ် ပၚ်​ကေတ်​တုဲ ဗိုတ်​ဖျေံ​ပ္ဍဲ​မှာ​သ္မိတ်​မ္ဂး။ ညံၚ်​နဲ သာ်​ဝွံ ဍုၚ်​ဇၞော်​ၜါ​ၜု​လုၚ်​ဂှ် ဗိုတ်​ဖျေံ​သီု​ကဵု​ဒြ​ဟတ်​တုဲ။ ကြဴ​မွဲ​ဝါ​ဂှ် ဟွံ​ဂွံ​ဆဵု​ရ။ ၂၂ရ​မျှာၚ်​ညး​မ​တိၚ်​စံၚ်။ ညး​မ​ဇက်​ဂြဝ်။ ရ​မျှာၚ်​ညး​မ​ဗ​ဂိုဟ်​က​လောတ်​ခ​ပဵု​တံ​ဂှ်​လေ ကြဴ​မွဲ​ဝါ​အ​ပ္ဍဲ​မၞး​ဂှ် ဟွံ​ဂွံ​မိၚ်​ရ။ အ​ပ္ဍဲ​ညး​မ​လေပ်​ကွတ်​တဲ​ဇၟာပ်​ဇၟာပ်​ဂ​ကူ​တံ​ဂှ် ကြဴ​မွဲ​ဝါ​ဆ​ဗၞတ်​ညး​မွဲ​ဟွံ​ဂွံ​ဆဵု​အ​ပ္ဍဲ​မၞး​ရ။ ရ​မျှာၚ်​ဂ​ဝုတ်​ဂှ်​လေ ကြဴ​မွဲ​ဝါ​ဟွံ​ဂွံ​မိၚ်​အ​ပ္ဍဲ​မၞး​ရ။ ၂၃လ​ယး​ပၟတ်​ခ​ဍေက်​ဂှ်​လေ ကြဴ​မွဲ​ဝါ​ဟွံ​ဂွံ​ယး​တ​မး​အ​ပ္ဍဲ​မၞး​ရ။ ရ​မျှာၚ်​မၚ်​ဗၠာဲ​ပ​ကာ​ဝါ​မ္ၚဵု​ကဵု​ရ​မျှာၚ်​ကောန်​ဗြဴ​ဝုတ်​ပ​ကာ​ဝါ​မ္ၚဵု​ဂှ်​လေ ကြဴ​မွဲ​ဝါ​အ​ပ္ဍဲ​မၞး​ဂှ် ဟွံ​ဂွံ​မိၚ်​ရ။ ဟိုတ်​မ္ဂး​ဂှ်။ ညး​ဗ​နိက်​မၞး​တံ​ဝွံ ပ္ဍဲ​လော​ကဳ​ဂှ် ဒှ်​ညး​မ​ဇၞော်​အိုတ်​ရ။ မၞိဟ်​ဇၟာပ်​ဇၟာပ်​ဂ​ကူ​တံ​ဝွံ န​ကဵု ဥ​ပ္ပာဲ​မၞး​မ​စုတ်​ဂ​အုဲ​ဂှ် ဒုၚ် လှေံ​စ​အိုတ်​တုဲ​ရ။ သာ်​ဝွံ က​လုတ်​အ​ကာ​သ​မ​ဟီု​ရ။ ၂၄ဆီ​ပ​ရော​ဗက်။ ဆီ​ညး​မ​သ္အး​ဇ္ၚး။ ဆီ​ညး​မ​ဒုၚ်​ဂ​စိုတ်​ပ္ဍဲ​လ​တူ​တိ​ဇၞော်​အိုတ်​သီု​တံ​ဝွံ ဆဵု​ဒး​ပ္ဍဲ​ဍုၚ်​ဂှ်​ရ။