၁-၂ဍိက်ယေသှုခရေတ်ကလုတ်မရုဲကံက်ခါန်ကၞက်လဝ်သွက်ဂွံတွံဓဝ်ဨဝံၚ်ဂေလိကျာ်ဂမျိုၚ်။ တေံဓဝ်ဨဝံၚ်ဂေလိဂှ် ရန်ကဵုကောန် ဇကုနာဲပိုဲယေသှုခရေတ်တုဲ နူကၠာတေံဂှ် နကဵုပရောဗက်ပ္ဍဲကဵု သၠပတ်မသ္အးဇ္ၚးတံဂှ် ကျာ်ဂမျိုၚ်ဟီုထၜးတုဲရ။ ၃တေံကောန်ဝွံ အတိုၚ်ဇာတိမၞိဟ်ဂှ် မဂွံဒှ်ဂကူဍာဝိက်ရောၚ်။ ၄ဂျိုၚ်တိုန်နူဂစိုတ်တုဲ အတိုၚ်ဇာတိဝိညာန်မသ္အးဇ္ၚး သီုဣဓိမပြာကတ်ယးတမးကောန်ကျာ်ဂမျိုၚ်ဂှ် မဂွံဒှ်ရောၚ်။ ၅သွက်မၞိဟ်ဇၟာပ်ဇၟာပ်ဂကူဂွံကလၚ်ဓဝ်ပ္တေဟ်ဂှ် ပိုဲညးဝွံ နကဵုနာဲတေံဂှ် ဂုန်ဂှ်လေကီု။ ဒမံၚ်ကလုတ်ဂှ်လေကီု ဂွံဒုၚ်အိုတ်တုဲရ။ ၆အပ္ဍဲဂကူမၞိဟ်တံဂှ် မၞးတံဝွံ မၞိဟ်နာဲပိုဲယေသှုခရေတ်မကော်တုဲဂှ် မဂွံဒှ်အိုတ်ရောၚ်။ ၇အဲပဝ်လုဝွံ ပ္ဍဲကဵု မၞိဟ်ကျာ်မဆာန်ပ္ဍဲဒမံၚ်မသ္အးဇ္ၚးမခါန်ကၞက်လဝ်ဆမနွံပ္ဍဲဍုၚ်ရဝ်မတံဝွံ ပၟိၚ်ဏာမ္ဂးဂှ်။ ဂုန်ကဵုဒဒှ်မၜိုဟ်သြိုဟ်နူကျာ်ဂမျိုၚ်မအံက်ပိုဲညးကဵုနာဲ ပိုဲယေသှုခရေတ်ဂှ် ကဵုတန်ပ္ဍဲမၞးတံညိ။ ၈ဒဒှ်မၞးတံမပ္တေဟ်ပ္ဍဲအလုံမွဲဂၠးတိဇၞော် ပြာကတ်ဒၟံၚ်ဂှ်ဒှ်တုဲ ဟိုတ်နူမၞးတံအိုတ်သီုဂှ် နကဵုယေသှုခရေတ်ဝွံ ဂုန်ကျာ်အဲပ္ဍဲကိုပ်ကၠာဂှ် အဲထိုၚ်သးဒၟံၚ်ရ။ ၉-၁၀အဲဝွံ ဟွံပိုတ်ဟွံသ္ဂုတ် ဗှ်သၞာမၞးတံတုဲ လ္အိတ်တွဵု ပ္ဍဲမရာဒၞာမိက်ဂှ် ဟွံဂပ်လံပၟိက်ကျာ်နွံမ္ဂး အခေါၚ်ဂွံစိုပ်ထာန်မၞးတံ ဒဒှ်အဲမအာတ်ဒၟံၚ်ဂှ် ကျာ်အဲမရေဟ်သေဟ်ဂှ် ဒှ်သက်သဳအဲရ။ ပ္ဍဲမတွံဓဝ်ဨဝံၚ်ဂေလိကောန်ကျာ်ဂှ် ကေစ္စကျာ်ဝွံ အဲပ္တုဲသီုကဵုစိုတ်ဝိညာန်ရောၚ်။ ၁၁ညံၚ်မၞးတံဂွံခိုၚ်ကၠိုက်ဗိုန် ဇၟံလာပ် မဆေၚ်ကဵုဝိညာန်မွဲမွဲဂှ် မနွံ ပၟိက်သၟိက်ဂွံပ္အပ်ကဵုပ္ဍဲမၞးတံတုဲ ဒဒှ်သၟိက်ဂွံဆဵုညာတ်မၞးတံဂှ် ပၟိက်အဲနွံဗွဲမလောန်ရောၚ်။ ၁၂ပ္ဍဲမဟီုသာ်ဂှ် နကဵုစိုတ်ပ္တေဟ်အဲကဵုစိုတ်ပ္တေဟ်မၞးတံညးမွဲကဵုညးမွဲဇကုကဵုဇကုညံၚ်ဂွံကဵုလလံသွာဂှ် သၟိက်ဂွံဟီုရောၚ်။
၁၃ကောဒေံတံ။ ပ္ဍဲဂကူတၞဟ်သ္အာၚ်ညံၚ်နဲအဲဂွံဖဵုဂှ် ပ္ဍဲမၞးတံဂှ်လေ သၟိက်ကဵုဂွံဖဵုမွဲမွဲမ္ဂး ပၟိက်နွံတုဲ ပ္ဍဲထာန်မၞးတံဂှ် အဲကၠုၚ်ရောၚ် သာ်ဝွံ ဂၠိုၚ်ကဵုဝါၜိုန်မနွံက္သပ်ဂှ် ဒဵုကဵုလမုဟ်အရာမဆဳဒနာမနွံရ။ သာ်ဝွံ မၞးတံဟွံတီတုဲ အဲဟွံမိက်ကဵုမံၚ်။ ၁၄မၞိဟ်ဟေလသကဵုဒှ်။ မၞိဟ်အရိုၚ်ကဵုဒှ်။ မၞိဟ်မနွံကဵုပညာကဵုဒှ်။ မၞိဟ်ဟွံမွဲကဵုပညာကဵုဒှ်။ ဂတဟ်မၞိဟ်ဇၟာပ်ဇၟာပ်ဂကူတံဝွံ တၚ်ပ္ဍဲအဲရ။ ၁၅ဒှ်သာ်ဂှ်တုဲ အတိုၚ်အဲမပမာန်ဓဝ်ဨဝံၚ်ဂေလိဂှ် သၟိက်ဂွံဟီုတွံပ္ဍဲမၞးတံကောန်ဍုၚ်ရဝ်မတံဂှ် ပၟိက်အဲမနွံရ။ ၁၆အဲဝွံ ကဵုဓဝ်ဨဝံၚ်ဂေလိခရေတ်ဂှ် ဟွံဂွ။ ဟိုတ်မ္ဂးဂှ်။ ဓဝ်တေံဝွံ ပ္ဍဲကိုပ်ကၠာပ္ဍဲမၞိဟ်ယုဍကြဴပ္ဍဲမၞိဟ်ဟေလသပ္ဍဲဆညးမပ္တေဟ်အိုတ်သီုတံဝွံ ဣဓိကျာ်မဟံၚ်ပြာ်ဂှ် မဂွံဒှ်ရ။ ၁၇ပသာ်မဒှ်ရောမ္ဂးဂှ်။ မၞိဟ်မသ္တပ်လ္ဂူနကဵုဒဒှ်မပ္တေဟ်ဂှ် ဂွံဂျိုၚ်လမျီုရောၚ် သာ်ဝွံ အတိုၚ်မကၠုၚ်ပ္ဍဲသၠပတ်ဂှ် ဓဝ်မသ္တပ်လ္ဂူကျာ်မတန်နကဵုပ္တေဟ်ဂှ် သွက်ဒဒှ်မပ္တေဟ်နကဵုဓဝ်ဨဝံၚ်ဂေလိဂှ် ပြာကတ်ဒၟံၚ်ရ။
၁၈နကဵုအရာဟွံဓဝ်သၟတ်ဂှ် ဆဳဒနာဓဝ်သမ္မာတုဲ ပ္ဍဲမွဲလ္ပာ်ပွဟွံရေဟ်သေဟ်ကျာ် ပွဟွံဓဝ်သၟတ် ဇၟာပ်ဇၟာပ်ဂကူမၞိဟ်မလေပ်ပတံဂှ် ပၞောတ်ကျာ်ဂမျိုၚ်ပြာကတ်ဒၟံၚ်နူအကာသတုဲရ။ ၁၉ဟိုတ်မ္ဂးဂှ်။ ဒတိတ်ဒဒှ်ကျာ်ဂမျိုၚ်မဂပ်ဂေါဝ်ဂွံတီဂှ် ပြာကတ်ပ္ဍဲညးတံဂှ်တုဲရ။ ကျာ်ဂမျိုၚ်ဝွံ ပ္ဍဲညးတံဂှ် ထၜးတုဲရ။ ၂၀ဟိုတ်မ္ဂးဂှ်။ အရာမဆေၚ်ကဵုကျာ်ဂမျိုၚ်နကဵုမတ်ညာတ်ဟွံမာန်မတွံဂးဣဓိထာဝရဂှ်။ ကဵုဒဒှ်မဒှ်ကျာ်ထာဝရ။ နူကာလကဝ်မတန်ဂှ်ဒှ်တုဲ နကဵုအရာမက္တဵုပဒှ်ဂှ် ပြာကတ်ဒၟံၚ်အိုတ်ရ။ ဒှ်သာ်ဂှ်တုဲ ညးတံဝွံ ဒုဟ်ဇကုဂှ် ဂြောပ်ဒလီုဟွံမာန်ရ။ ၂၁ဟိုတ်မ္ဂးဂှ်။ ညးတံဝွံ တီဒၟံၚ်ကျာ်တုဲ အတိုၚ်မဂပ်ဂေါဝ် ထိုၚ်သးကျာ်ဂှ် ဟွံထိုၚ်သး။ ဂုန်ကျာ်ဂှ်လေ ဟွံတီတုဲ က္သပ်ဂနန်ဟွံမွဲကဵုဟိုတ်ဖဵုဂှ် ချပ်ဒၟံၚ်မ္ဂး ကောန်စိုတ်ညးတံဂှ် ဟွံမွဲကဵုသတိတုဲ စိုပ်ဒဒှ်မဂၠုသ္ကိုပ်အိုတ်ရ။ ၂၂-၂၃ပလွေဟ် တလပညာတုဲ ဒှ်ဒၟံၚ်မၞိဟ်သမၠီုအိုတ်မ္ဂး တြဳဇှ်ကျာ်မလီုလာ်ပၠန်ဂတးဟွံမာန်ဂှ် ပါဲဝေၚ်တုဲ ရုပ်မၞိဟ်မလေပ်စိုပ်လီုလာ်ပၠန်ဂတးဂှ်လေကီု။ ရုပ်ဂစေံဂှ်လေကီု။ ရုပ်သတ်ဇိုၚ်ပန်ဂှ်လေကီု။ ရုပ်သတ်ဟွံမွဲကဵုဇိုၚ်ဂှ်လေကီု။ ကၠောန်တုဲ ပ္ဍဲဒမံၚ်ကျာ်ဂှ် ပ္တိုန်လဝ်အိုတ်ရ။ ၂၄ဟိုတ်ဂှ်ရ။ ညးတံဝွံ ဇကုကာယျဇကုဂှ် ဇကုကဵုဇကုညံၚ်ဂွံပျုတ်ဗ္ဒေက်မ္ဂး ပ္ဍဲတဲ ကိလေသစိုတ်ဇကုမကၠိခဍက်ကၠိုက်လ္ၚေၚ်ဂှ် ကျာ်ဂမျိုၚ်ပ္အပ်လဝ်ညးတံဂှ်ရ။ ၂၅ညးတံဝွံ ပ္ဍဲဒမံၚ်ကျာ်မသ္ဍာံသၟတ်ဂှ် ကျာ်ဟွံသ္ဍာံသၟတ်ဂှ် ပ္တိုန်လဝ်မ္ဂး နာဲမလေပ်က္တဵုပဒှ်ဂှ် ပါဲဝေၚ်တုဲ အရာမဒုၚ်က္တဵုပဒှ်ဂှ် မလေပ်ရေဟ်သေဟ်အိုတ်ရ။ နာဲတေံဝွံ နွံကဵုမၚ်္ဂလထာဝရရောၚ်။ အာမေန်။
၂၆ဟိုတ်မပသာ်ဂှ် အိုတ်တုဲ ပ္ဍဲစိုတ်ကိလေသမကၠိပပ်ကၠိုက်လ္ၚေၚ်ဂှ် ကျာ်ပ္အပ်ညးတံဂှ်ရ။ ဟိုတ်မ္ဂးဂှ်။ ဗြဴညးတံဝွံ နဲကဲဇာတိပက္ကတိဂှ် ထောံတုဲ နဲကဲမစးဇာတိပက္ကတိဂှ် ဗက်အိုတ်ရ။ ၂၇ညံၚ်နဲသာ်ဂှ် တြုံတံဝွံ နဲကဲဇာတိပက္ကတိမဆက်ဆံကဵုဗြဴဂှ် ထောံတုဲ ဇကုကဵုဇကုစိုတ်ကိလေသက္တဴစံၚ်တူမ္ဂး တြုံကဵုတြုံပွသွက်ဂွံဖေက်ဂွဂှ် ပအိုတ်တုဲ အတိုၚ်မမှာရာဂှ် ဇကုဒးဒုဟ်ဒန်အိုတ်ရ။ ၂၈ညးတံဝွံ ဟွံမိက်တီကျာ်ဂှ်ဒှ်တုဲ သွက်ဂွံပပွဟွံဂပ်ဂေါဝ်ပ္ဍဲတဲစိုတ်မောဟဂှ် ကျာ်ပ္အပ်ညးတံဂှ် မ္ဂး ၂၉ညးတံဝွံ နကဵုပွဟွံဓဝ်သၟတ်ဇၟာပ်ဇၟာပ်ဂကူဂှ်လေကီု။ နကဵုမေထုန်ဟွံမွဲကဵုဗဗွဲဓဝ်ဂှ်လေကီု။ နကဵုဒဒှ်မကြံကြဂှ်လေကီု။ နကဵုလောဘမခလိုၚ်လောန်ဂှ်လေကီု နကဵုဒဒှ်စိုတ်ဟွံဒးကဵုဒဒှ်စိုတ်မစောန်ဒမြဴဂှ်လေကီု။ နကဵုဒဒှ်မဂစိုတ်လမျီုမၞိဟ်နကဵုဒဒှ်မသေက်ဇဵုဂှ်လေကီု။ နကဵုဒဒှ်မလှေံစကဵုဒဒှ်မက္ဍုဟ်မၠေံညးတၞဟ်သ္အာၚ်ဂှ်လေကီု ဍိုက်ပေၚ်ဒၟံၚ်တုဲ၊ ၃၀မၞိဟ်မဗ္စုက်ဗ္စတ်ညး။ မၞိဟ်မဟီုဂလာန်ပျုတ်ဗ္ဒေက်ညး။ မၞိဟ်မက္ဍုဟ်မၠေံကျာ်။ မၞိဟ်မကြံကြ။ မၞိဟ်မသၠုၚ်ကဵုမာန။ မၞိဟ်မလေပ်ထိုၚ်သးဇကု။ မၞိဟ်မလေပ် စဳရေၚ်ကွတ်ဟွံခိုဟ်။ မၞိဟ်ဟွံကလၚ်ဂလာန်မိမ။ မၞိဟ်ဟွံမွဲကဵုပညာ။ မၞိဟ်မလေပ်ပလီုသစ္စ။ ၃၁မၞိဟ်ဟွံလေပ်ဆာန်ကလောကောဒေံ။ မၞိဟ်ပၞောတ်ဒေါသဟွံလေပ်ဟဲ။ မၞိဟ်ဟွံမွဲကဵုကရုတ်ဏာဂှ် မဂွံဒှ်အိုတ်ရ။ ၃၂ညးမလေပ်ပပွသာ်ဂှ် ဂပ်ဂေါဝ်ဒးဒုၚ်ဂစိုတ်ရောၚ် သာ်ဝွံ ဒဒှ်ကျာ်မစဳရေၚ်ၜိုန်ဇကုမတီဒၟံၚ်လောန်နူကဵုဇကုမပ။ ပ္ဍဲကဵုညးမလေပ်ပပွသာ်ဂှ် မနွံစိုတ်သ္ဍိုက်မၠိုက်အိုတ်ရ။