၁-၂ပ္ဍဲဒွက်ဂမၠိုၚ်ဒွက်သှဝ်လမောန်မဒှ်ကၞောတ်သၠုၚ်ပြဲအိုတ်ရ။ တဳလပိုန်ဒဒှ်အဆက်ပါၚ်နကဵုဆုၚ်ဂှ် ကဵုဆုၚ်အဲဍိက်ဗြဴညိ။ မေတ္တာတဳလဂုန်ဝွံ ခိုဟ်လောန်နူဍာ်ဇဗျေတ်ရ။ ၃ပ္ဍဲတဳလဂုန်ညံၚ်နဲ ကၠေၚ်စလန်မြမဝ်ဂှ်၊ နာမဝွံ ဒှ်ကၠေၚ်စလန်မစရိုဟ်စဝ်ရ။ ဟိုတ်ဂှ်ရ ကောန်ဗြဴ ဝုတ်ကညာတံဝွံ ဆာန် တဳလဂုန်အိုတ်ရ။ ၄ပ္အေါဝ်လဴ အဲဍိက်ဗြဴညိ။ ပိုဲဍိက်ဗြဴတံဝွံ ဒြေပ် ပ္ဍဲလက်ကရဴတဳလဂုန် တုဲ ဗက်အိုတ်ရောၚ်။ မသှာတ်သၟီဇၞော်ဝွံ ပ္ဍဲဂၠံၚ်ကျာ်သြဳဂှ် ပလံၚ်နၚ်အဲဍိက်ဗြဴတုဲရ။ ပိုဲဍိက်ဗြဴတံဝွံ ဟိုတ်နူတဳလဂုန်ဂှ် မိပ်စိုတ်အိုဟ်တၟိုဟ်ရောၚ်။ မေတ္တာတဳလဂုန်ဂှ် ထိုၚ်သးလောန်နူဍာ်ဇဗျေတ်အိုတ်ရောၚ်။ ကောန်ဗြဴဝုတ်ကညာတံဝွံ ဆာန်တဳလဂုန်ဂှ် ဒှ်သ္ဍာံသၟတ်အိုတ်ရ။
၅အဵုကောန်ဗြဴဍုၚ်ယေရုယှလေမ်တံ၊ အဲဝွံ ညံၚ်နဲတာဲကေဍောၜိုန်မနွံအရံၚ်လစံက်ဂှ်လေ၊ ညံၚ်နဲခၞိက်သၟီသှဝ်လမောန်ဂှ် ဂေါဝ်ဆာဲဏီရ။ ၆အဲဝွံ ဒုၚ်ဂမ္တဴတ္ၚဲတုဲ ဟိုတ်မနွံအရံၚ်လစံက်ဂှ်၊ လပရံၚ်အဲအိုတ်ညိ။ ကောန်ဇာတ်မိအဲတံဝွံ နွံစိုတ်စောန်ဒမြံကဵုအဲတုဲ၊ ကဵုမၚ်ကၠံဇဗျေတ်တံဂှ်ရ။ ကၠံဇကုဂှ် ဟွံဂွံမၚ်ရ။
၇နာဲအဲဍိက်မသ္ဍိုက်မၠိုက်၊ တဳလဂုန်ဝွံ သဵုဂမၠိုၚ်တံဂှ် မူဒၞာဲမမၚ်ဂှ်လေကီုပ္ဍဲအခိၚ်တ္ၚဲကတဴဂှ် မူဒၞာဲမကဵုဇူဒီုပ္ဍဲသၞိၚ်ဂှ်လေကီုထၜးညိ။ အဲဍိက်ဗြဴဝွံ ပ္ဍဲလက်ကရဴပၟၚ်သဵုတၞဟ်သ္အာၚ်ဂှ် မူဟိုတ်ဗလေတ်ဂၠံၚ်တုဲ ဒးဗက်အာရရော။
၈ၝဲလောန်နူမၞိဟ်ဗြဴတၞဟ်သ္အာၚ်ရုပ်သာ်မဂေါဝ်ဆာဲ၊ မၞးဝွံ ဟွံတီမ္ဂး၊ ဗက်အာပ္ဍဲဒၞာဲဇိုၚ်သဵုဂမၠိုၚ်တုဲ၊ ပ္ဍဲဇရေၚ်တာဲပၟၚ်သဵုဂမၠိုၚ်ဂှ် ဗ္စဖာပ်သဵုသၟတ်တံဂှ်ရ။ ၉ၝဲအဲမဆာန်၊ မၞးဂှ် အဲပတုပ် ကီုချေံမဒံၚ်သလာ် ပ္ဍဲကွဳသၟီဖာရောဝ် ရောၚ်။ ၁၀ပ္ဍဲကၞိၚ်မ္ဂးဂှ် ကျိုၚ်ကျဝ်ကမက်ဂွါတုဲ၊ ကွက်ဗၠဲပ္ဍဲကအ်ဇုက်ကဵုဇုက်တုဲ မၞးဝွံ ဂေါဝ်ဆာဲရ။ ၁၁ကမက်ကအ်ထဝ်မတွံလမှ်ကဵုသြန်ဂှ်လေ ကၠောန်ကွက်ဇုက်ကဵုဇုက်တုဲ ကဵုပၠန်ရောၚ်။
၁၂တဳလဂုန်သၟီဇၞော်ဝွံ ကာလဂဇံဒၟံၚ်ဇရေၚ်လ္ဗံက်ဂှ်၊ ကျာကၠေၚ်နာဒုမြမောဝ်အဲမစကာဂှ် မောဝ်ကွဳုဟ်တ္ၜန်တ္ၜောဲတဴရ။ ၁၃နဲအဲမဆာန်ဒှ်ဗွဝ်မြမောဝ်မုရာန်ပ္ဍဲအဲတုဲ၊ ပ္ဍဲအကြာဂၠးသြိုဟ်အဲဒးတိတ်အလုံမွဲဗ္တံရောၚ်။ ၁၄နာဲအဲမဆာန်၊ ညံၚ်နဲစန်တၞးဟေန္နမဒှ်ပ္ဍဲကၠံအေန်ဂေဒိဂှ် ဒှ်တဴရ။
၁၅ၝဲအဲမဆာန်၊ မၞးဝွံ ရုပ်သာ်ဂဝ်ဆာဲရ။ ကျေဝ်ဗွဲမလောန်ရ။ ဍိုက်ပေၚ်ကဵုမတ်ဂစေံပူရ။
၁၆နာဲအဲမဆာန်ဂှ် ရုပ်သာ်ဂဝ်ဆာဲတုဲ၊ ဍိုက်ပေၚ်ကဵုလက်သန်မဆာန်ရ။ ဒမံၚ်သ္တိက် ပိုဲညးတံဝွံ နွံအရံၚ်သ္ၚေက်ရ။ ၁၇ဒယိုၚ်လွဳမာန် ပိုဲညးတံဝွံ တၞံအာရေတ်ကမဳမ ပတုဲလဝ်ကဵုတၞံပၞာၚ်သေံရ။