၁ပ္ဍဲသၟီဇၞော်ဍာရိမဂဇံနန်ၜါသၞာံ၊ ပ္ဍဲဂိတုအတ္ထမ၊ ဂလာန်ကျာ်ထာဝရမကၠုၚ်စိုပ်ပ္ဍဲပရဝ်ဖေတ်ဇာခရိကောန်ၜါရခိကောန်ဣဒေါမ္ဂးဂှ်၊ ၂ကျာ်ထာဝရပၞောတ်တိတ်ပ္ဍဲဇုဇဗဴလမၞးတံ ဂမၠိုၚ်ဗွဲမလောန်ရ။ ၃ၜိုန်ဂှ်လေ၊ အသံကျာ်ထာဝရတလဗဵုလဗးအကာသမဟီုပၟိၚ်ကဵုညးတံမ္ဂးဂှ်၊ ကလေၚ်ကၠုၚ်ပ္ဍဲထာန်အဲအိုတ် သာ်ဝွံ ကျာ်ထာဝရတလဗဵုလဗးအကာသမဖျေံအသံရ။ အဲတုန်လေ၊ ကလေၚ်ကၠုၚ်ပ္ဍဲထာန်မၞးရောၚ် သာ်ဝွံ ကျာ်ထာဝရတလဗဵုလဗးအကာသဟီုပၟိၚ်ရ။ ၄ပရဝ်ဖေတ်ကိုပ်ကၠာတံဝွံ၊ နူကဵုဂၠံၚ်မၞးဟွံခိုဟ်ဂမၠိုၚ်ဂှ်၊ ဒ္ဂေတ်မၞးဟွံခိုဟ်ဂမၠိုၚ်ဂှ် လၟုဟ်ဝွံ ပါဲဝေၚ်အိုတ် သာ်ဝွံ ဟီုတုဲ ၜိုန်မလလောၚ်ကမြဴအသံကျာ်ထာဝရတလဗဵုလဗးအကာသဟွံပၚ်မိၚ်၊ ညံၚ်နဲဇုဇဗဴလမၞးတံဂမၠိုၚ်ဟွံကလၚ်ဂှ် လ္ပပအိုတ် သာ်ဝွံ ကျာ်ထာဝရဟီုပၟိၚ်ရ။ ၅ဇုဇဗဴလမၞးတံဂမၠိုၚ်မူဒေသမနွံရော။ ပရဝ်ဖေတ်တံဝွံ လမိုန်ကာလမလေပ်ဂျိုၚ်လမျီုအိုတ်ဟာ။ ၆ဂလာန်ပညပ်အဲမဗ္ကန်လဝ်ပ္ဍဲပရဝ်ဖေတ်ဍိက် အဲဂမၠိုၚ်တံဝွံ ဂတာပ်ဇုဇဗဴလ မၞးတံဂမၠိုၚ်ဟွံသေၚ်ဟာ။ ညးတံဝွံ ဂွံသတိတုဲ၊ အတိုၚ်ပွပိုဲညးမပ၊ ဒ္ဂေတ်မဒ္ဂေတ်၊ ကျာ်ထာဝရကျာ်ဂမျိုၚ်တလဗဵုလဗးအကာသစဳရေၚ်ပ္ဍဲပိုဲညးရောၚ် သာ်ဝွံ အတိုၚ်ကသပ်ကျာ်မနွံဂှ် စဳရေၚ်တုဲရ သာ်ဝွံ မဟီုအိုတ်ဟွံသေၚ်ဟာ သာ်ဝွံ ဟီုပၟိၚ်လဝ်ရ။
၇ပ္ဍဲသၟီဇၞော်ဍာရိမဂဇံနန်ၜါသၞာံ၊ ပ္ဍဲဂိတုမရနုက်စှ်မွဲမတွံဂးဂိတုသှေၜါတ်ၜါစှ်ောပန်တ္ၚဲ၊ ဂလာန်ကျာ်ထာဝရကၠုၚ်စိုပ်ပ္ဍဲပရဝ်ဖေတ်ဇာခရိကောန်ဣဒေါတုဲ၊ ၈ရုပ္ပါရီုမဂွံမိၚ်ပ္ဍဲပယာံဗ္တံမ္ဂးဂှ်၊ မၞိဟ်ဍိုက်ချေံဗ္ကေတ်မွဲတလပြာကတ်တုဲ ပ္ဍဲဂြိုပ်မုရတုမနွံ ပ္ဍဲခလံက်ဂှ် ဒတဴဒၟံၚ်ရ။ ပ္ဍဲလက်ကရဴညးချေံဗ္ကေတ်၊ ချေံချီု၊ ချေံဗုဂမၠိုၚ်နွံဒၟံၚ်ရ။ ၉အဲဝွံလေ ယွံတလအဲ၊ ညးတံဝွံ ညးဂှ်ရော သာ်ဝွံ ကာလအဲမသၟာန်ဂှ်၊ ကလုတ်အကာသမဟီုအရေဝ်ကဵုအဲဂှ်၊ ညးတံဝွံ ဒဒှ်မဒှ်ညးဂှ် အဲထၜးရောၚ် သာ်ဝွံ ဟီုတုဲမ္ဂး၊ ၁၀မၞိဟ်မဒတဴဒၟံၚ် ပ္ဍဲဂြိုပ်မုရတုဝွံ၊ ညးတံဝွံ တၞံနသၟိက်ဂွံလန်ဂၚေၚ်ပ္ဍဲတိဇၞော်ဇၟာပ်ဇၟာပ်ဒေသတံဂှ် ဒှ်ညးကျာ်ထာဝရစကာဗလးနၚ်ရ သာ်ဝွံ ကလေၚ်ဟီုရ။ ၁၁တေံညးတံဂှ်လေ၊ ပိုဲဍိက်တံဝွံ ဂၚေၚ်အာပ္ဍဲတိဇၞော်ဇၟာပ်ဇၟာပ်ဒေသတုဲရ။ အလုံမွဲတိဇၞော်ဂဗုတ်ဟွံမွဲရ။ နွံတဴဗွဲမသ္ၚိတ်ဇြရ သာ်ဝွံ ကလေၚ်ပတီကဵုကလုတ်ကျာ်ထာဝရမဒတဴမံၚ်ပ္ဍဲဂြိုပ်မုရတုဂှ် အိုတ်ရ။
၁၂မွဲဝါပၠန်၊ ကလုတ်ကျာ်ထာဝရဝွံ၊ အဵုကျာ်ထာဝရတလဗဵုလဗးအကာသတဳလဂုန်ဝွံ ပ္ဍဲကဵုဍုၚ်ယေရုသှလေမ်ကဵုဍုၚ်ယုဍဂမၠိုၚ်ပၞောတ်တဳလအဲမတိတ်လုကဴထပှ်စှ်ောသၞာံမွဲစိလလံဟွံဆာန်ဍူတုဲ မမံၚ်ရော သာ်ဝွံ ကာလမသၟာန်ပ္တီဂှ်၊ ၁၃ကျာ်ထာဝရဝွံ ပ္ဍဲကဵုကလုတ်အကာသမဟီုအရေဝ်ကဵုအဲဂှ် နကဵုဂလာန်မခိုဟ်ဂလာန်မကဵုၜိုဟ်သြိုဟ်ဂှ် ကလေၚ်ဟီုပၟိၚ်ရ။ ၁၄ကလုတ်အကာသမဟီုအရေဝ်ကဵုအဲဂှ်၊ ဟီုအသံကျာ်ထာဝရတလဗဵုလဗးအကာသတုဲ လလောၚ်ကမြဴမ္ဂးဂှ် အဲဝွံ သွက်ဍုၚ်ယေရုသှလေမ်ကဵုဒဵုဇိအောန်စိုတ်ဇၞော် ကဵုဒြဟတ်ဗွဲမလောန်ရ။ ၁၅ပ္ဍဲကဵုကောန်ဂကူတၞဟ်သ္အာၚ် မမံၚ်တဴဗွဲမသ္ၚိတ်ဇြပၞောတ်တိတ်ဗွဲမလောန်ရ။ ဟိုတ်မ္ဂးဂှ်၊ ကာလပၞောတ်အဲအောန် အောန်မတိတ်ပ္ဍဲဍုၚ်တေံဂှ် ညးတံဗိုၚ်တုဲ မပယဲခရအိုတ်ရ။ ၁၆ဟိုတ်ဂှ်ရ၊ ကျာ်ထာဝရဟီုပၟိၚ်မ္ဂးဂှ် နကဵုစိုတ်သၟိက်ဂွံပဂုန်ဂှ် အဲကလေၚ်ကၠုၚ်ပ္ဍဲဍုၚ်ယေရုသှလေမ်တုဲရ။ ပ္ဍဲဍုၚ်ဝွံ ဒးဒက်ပ္တန်သ္ၚိအဲရောၚ်။ ဒးၜတ်ကေတ်ဂအာၚ်ဍုၚ်ယေရုသှလေမ်ရောၚ် သာ်ဝွံ ကျာ်ထာဝရတလဗဵုလဗးအကာသမဟီုပၟိၚ်ရ။ ၁၇မွဲဝါပၠန်၊ ဟီုအသံကျာ်ထာဝရတလဗဵုလဗးအကာသတုဲ လလောၚ်ကမြဴမ္ဂးဂှ်၊ ဍုၚ်ကွာန်အဲတံဝွံ ပြးချာဲဇၟာပ်ဇၟာပ်ဒေသတုဲ ဂီုကၠီုတိုန်ရောၚ်။ ကျာ်ထာဝရဝွံ ကောန်ဒဵုဇိအောန်တံဂှ် ကဵုၜိုဟ်သြိုဟ်ရောၚ်။ ကောန်ဍုၚ်ယေရုသှလေမ်တံဂှ် ရုဲကံက်တုဲ ဝဳပရာရောၚ် သာ်ဝွံ ဟီုပၟိၚ်ရ။
၁၈-၁၉မွဲဝါပၠန်၊ အဲလၟဳရံၚ်တုဲ ညာတ်ဒြၚ်ပန်ရ။ ပ္ဍဲကဵုကလုတ်အကာသမဟီုအရေဝ်ကဵုအဲဂှ်လေ၊ တေံဒြၚ်တံဂှ် ပသာ်ရော သာ်ဝွံ ကာလအဲမသၟာန်ဂှ်၊ တေံဒြၚ်တံဝွံ ဒှ်ဒြၚ်မကဵုရးယုဍ၊ ရးဣသရေလ၊ ဍုၚ်ယေရုသှလေမ်ပြးချာဲဇၟာပ်ဇၟာပ်ဒေသရ သာ်ဝွံ ကလေၚ်ဟီုရ။ ၂၀ကျာ်ထာဝရတုန်လေ၊ သမာကွတ်ပန်တလတံဂှ် ထၜးတဴရ။ ၂၁အဲဂှ်လေ၊ ညးတံဝွံ မူပွမကၠုၚ်ပညိရော သာ်ဝွံ ကာလမသၟာန်ဂှ်၊ ကလုတ်အကာသဝွံ၊ တေံဒြၚ်တံဝွံ ဒဵုကဵုမူရဴညးမွဲဟွံဂံၚ်လၟဳရံၚ်ဂှ် မဒှ်ဒြၚ်မကဵုကောန်ရးယုဍပြးချာဲအိုတ်ရ။ တေံသမာကွတ်တံဝွံ ဘဗလဒြၚ်မဗတိုက်ညံၚ်ဂွံကဵုကောန်ရး ယုဍပြးချာဲတုဲ၊ ဒှ်ညးမဖျဝ်ဖျေံဒြၚ်ဂကူ ညးတၞဟ်သ္အာၚ်အိုတ်ရောၚ် သာ်ဝွံ ကလေၚ်ဟီုရ။